Hatutan.com, (18 Maiu 2022), Díli—Reprezentante Vatikanu iha Timor Leste Mgr. Marco Sprizzi hato’o katak, Papa Francisco haksolok tanba Timor-Leste (TL) sei Integra dokumentu Fraternidade Umana ba kurrikulu nasionál edukasaun.

Premiadu Nobel da Pás Tinan 1996, Dr. José Ramos-Horta, hetan fiar hosi Papa Francisco atu sai hanesan memebru Juri internasional Award of Human Fraternity. 

“Papa Francisco haksolok no hato’o gratidaun ba Timor-Leste tanba liu hosi inisiativa Prezidente eleitu no deputadu sira iha Parlamentu Nasionál simu ho ksolok tebes dokumentu fratenidade umana ba kurrikulu nasaionál iha edukasaun Timor Leste,” Marco Sprizzi, hateten iha Igreja Katedrál, Villa Verde, Díli, Kuarta (18/05/2022).

Lee Mós: TL Sei Adopta Dokumentu Fraternidade Umana iha Kurríkulu Nasionál

Liu hosi dokumentu fraternidade umana ne’ebé sei adopta ba kurrikulu nasionál, sei transforma valór sira no deklarasaun sira kona-bá fraternidade umana ne’ebé Santu Padre no Gran Iman inisia.

Timor-Leste sei sai país dahuluk iha mundu ne’ebé adopta testu sira kona-bá kontestu fundamentál hosi Repúblika ida-ne’e no ida-ne’e mós korfirma vokasaun Timor Leste nian nu’udár testamuña rekonsiliasaun no pas ba mundu tomak.

Nune’e mós Arsebispu Arkedioseze Matropolitana Díli, Dom Virgílio do Carmo da Silva, SDB sente orgullu tanba Prezidente eleitu rasik hola parte iha juri hodi hili dokumentu ida-ne’e atu sai dokumentu ofisiál fraternidade umana ba  mundu.

Sente orgullu mós tanba Timor-Leste nu’udár nasaun kiik oan ida iha mundu, maibé nia ema hola parte mós iha promosaun fraternidade.

Timor-Leste iha liu referénsia ba dokumentu ne’e no garante ba implementasaun dokumentu fraternidade umana sei lori susesu boot ba nasaun no Uma-Kreda, ida-ne’e sei lori liután esperansa ba moris fraternal povu iha rai ne’e nian.

“Ita konsidera nu’udár grasa ida, hein katak ita bele aproveita meius hotu ne’ebé oferese ba ita, ba nasaun nia di’ak no povu nia di’ak,” Dom Virgílio do Carmo da Silva, hateten.

Jornalista: Vito Salvadór