Hatutan.com, (19 Maiu 2022), Díli— Prezidente Repúblika (PR), Francisco Guterres Lú Olo, iha 18 Maiu 2022, promulga ona Dekretu-Lei subsídiu iha tinan nia rohan ba uma-kain ho montante fiksu $200.

Prezidente Repúblika (PR), Francisco Guterres Lú Olo. Foto/Média PR.

Subsídiu ba uma-kain iha tinan nia rohan ho objetivu atu apoiu ekonomia ba famílias ne’ebé vulnerável liu hodi hetan benefísiu osan ba selebrasaun festa iha tinan nia rohan.

Lee Mós: Governu Aprova Projetu Dekretu-Lei Kona-bá Pagamentu Subsídiu $200 Bá Kada Uma-kain

“Anualmente iha tinan nia nia rohan Governu aprova  halo pagamentu estraordináriu ho saláriu adisionál ba funsionáriu no ajente Administrasaun Públika  no traballadores nacionais sira seluk. Maibé halo pagamentu husi parte Estadu ba traballadores husi instituisoins públikas kria desigualdade no injustisa sosiál ba sidadaun sira seluk, espesialmente ba sira ne’ebé la hetan rendimentu mensál regular ka laiha serbisu, tanba sira ne’e mak tenke hetan benefísiu sosiál husi Estadu,” Hatutan.com sita komunikadu hosi Palásiu Prezidensiál Nicolau Lobato.

Benefisíariu sira hosi subsídiu iha tinan nia rohan mak uma-kain sira ne’ebé rejistadu iha “Livru Rejistu Uma Ka’in” iha suku sira iha territóriu nasionál  tuir Diploma Ministerial númeru 49/2017, 23 agostu, no prezente hela iha territóriu nasionál bainhira halo pagamentu.

Uma-Kain sira ne’ebé sei hetan subsídiu ne’e mak uma kain ho rejistu efetuadu to’o 28 fevereiru 2022. Bainhira auzente iha tempu halo pagamentu tenke aprezenta justifikasaun ne’ebé bele simu. 

Jornalista: Vito Salvadór