Hatutan.com (20 Juñu 2022), Díli—Advogadu privadu Câncio Freitas, hatama ona rekursu ba Tribunál Rekursu (TR), iha loron 15 fulan ne’e tanba la simu desizaun Tribunál Distritál Díli (TDD) ne’ebé kondena ona nia kliente Mariano de Jesus ho pena prizaun efetivu tinan 25 tanba utiliza pistola hodi hamate Mateus de Deus, Camilo da Conceição de Deus no hakanek lezadu Januário Pereira iha Lahane Orientál iha tinan 2021.

Konteúdu hosi rekursu ne’e maka husu halo alterasaun kualifikasaun jurídiku hosi krime omesídiu agravadu ba krime omesídiu neglijente, tanba Tribunál la konsidera arguidu nia deklarasaun iha audiénsia katak antes nia tiru, vítima sira halo asaun hasoru nia, tanba ne’e atu salva nia a’an maka nia tenke tiru.

Lee Mós:Omesídiu Lahane, Tribunál Kondena Membru PNTL ho Prizaun Tinan 25

“Konteúdu hosi rekursu ne’e maka primeiru ha’u husu atu halo alterasaun kualifikasaun jurídiku hosi krime omesídiu agravadu ba fali krime omesídiu neglijente. Segundu ho alterasaun ne’e husu atu hatun pena ne’ebé antes ne’e Tribunál hatun ona ba ha’u nia kliente,” Câncio Freitas hateten ba Hatutan.com iha TDD, Segunda (20/06/2022).

Antes ne’e, iha loron 30 fulan Marsu tinan ne’e, liu hosi leitura sentensa ne’ebé lee hosi juiza koletiva Ana Paula Fonseca, Maria Solana, Zulmira Auxiliadora kondena membru Polísia Nasionál Timor-Leste (PNTL), arguidu Mariano de Jesus ho pena prizaun efetivu tinan 25, tanba utiliza pistola hodi hamate vítima Mateus de Deus, Camilo da Conceição de Deus no hakanek lezadu Januário Pereira iha Lahane Orientál iha tinan 2021.

Razaun Tribunál kondena arguidu ho pena refere, tanba konsidera faktus hotu ne’ebé konsta iha akuzasaun provadu hotu bazeia ba konviksaun arguidu ne’ebé konfesa totalmente, katak, loos duni momentu ne’ebá nia utiliza pistola hodi tiru mate vítima Mateus de Deus, Camilo da Conceição de Deus no hakanek lezadu Januário Pereira iha Lahane Orientál.

Jornalista: Carmelita Isaac