Hatutan.com (28 Juñu 2022), Díli-Iha  relatóriu finál  ne’ebé Komisaun Anti Korrupsaun (CAC, sigla Portugés) submete bá Ministériu Públiku, Sesta (24/06/2022),  identifika katak projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P) fó prejuizu bá Estadu ho montante $682,261.00.

Lee Mós : CAC Submete Bá MP Relatóriu Finál Kazu Projetu Set-top Box RTTL,E.P

Set-top Box/ dexodificador RTTL,E.P ne’ebé rai de’it iha Sede Suku Fatuhada, Dili. Foto/Dok.Hatutan.com

“Primeiru CAC identifika prejuizu direta bá Estadu ho montante $7,680.00 ne’ebé identifikadu liu husi Set Top Box hamutuk 256 ne’ebé kompañia indikadu seidauk halo instalasaun, maibé prejuízu ne’e sei aumenta maka’as bainhira kontinua halo inspesaun no kontinuasaun bá benefisiáriu hirak ne’ebe simu ona STB iha Suku sira besik atus ida resin iha Munisípiu lima hanesan Dili, Aileu, Ermera, Liquiça no Bobonaro, tanba STB barak maka seidauk halo instalasaun no benefisiáriu rasik maka halo instalasaun la’ós kompañia,” Diretór Jerál Investigasaun CAC, José Verdial haktuir bá Hatutan.com iha Dili, Tersa (28/6/2022).

Nia afirma tan, segundu prejuizu indireta seluk ne’ebé Estadu sofre hamutuk $674,581.7 no prejuízu ida-ne’e hetan bainhira halo komparasaun entre estimasaun kustu bá instalasaun STB ne’ebe halo husi RTTL,E.P ho valor $225.400 ho valor kontratu bá projetu ne’ebé maka asina husi MAPKOMS no kompañia DILI ETERNAL INNOVATION INFORMATION (DEII), Lda ho valor $ 899.981.70.  

Lee Mós : MAPKOMS La Fó Komentáriu Kona-bá Kazu Projetu Instalasaun Set-top Box RTTL,E.P

Bainhira projetu instalasaun STB ne’e la implementa husi RTTL,E.P, tuir estimasaun CAC nian maka sei la hamosu prejuizu boot bá Estadu no bele poupa osan hodi aloka ba nesesidade RTTL,E.P hanesan modernizasaun ekipamentu Radio no Televizaun inklui estúdiu.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nu’udár sósiu husi Melánia da Silva Fernandes Capela nu’udár Sekretaria iha Gabinete Prezidente FFTL.

Lee Mós :  CAC Identifika Arguidu Na’in-haat Bá Projetu Instalasaun Set-top Box RTTL,E.P

Jornalista : Carmelita Isaac