Hatutan.com, (02 Setembru 2022), Díli—Polísia Nasionál Timor-Leste (PNTL), liuhosi Komandu Munisípiu Díli husu no fó hanoin ba Ofisiál Polísia Suku (OPS) sira, atu kontinua hametin relasaun ho ema hotu-hotu iha nível komunidade, inklui autoridade lokál sira.

Komandante Munisípiu Díli, Superintendente Xefe Polísia, Henrique da Costa.

Komandante Munisípiu Díli, Superintendente Xefe Polísia, Henrique da Costa husu ne’e bainhira hamutuk ho Komandante Polisiamentu Komunitária (POLKOM), Superintendente Polísia, António da Luz, organiza enkontru ho membru OPS sira na’in 31, ho Ofisiál Polisia ba Eskola (OPE) na’in-rua iha munisipiu Dili nian ne’ebé fó orientasaun nomós motivasaun hodi presta servisu ho di’ak liután iha komunidade.

Lee Mós: PNTL Intensiva Operasaun

“Ita mós husu ba sira nune’e nafatin kria relasaun no komunikasaun ne’ebé di’ak ho komunidade iha suku, lider komunitáriu sira nune’e hasa’e konfiansa ba komunidade ba polísia,” Superintendente Xefe Polísia, Henrique da Costa hateten iha Komandu Caicoli, Sesta (02/09/2022).

Komandante Munisípiu Díli, Superintendente Xefe Polísia, Henrique da Costa husu ne’e bainhira hamutuk ho Komandante Polisiamentu Komunitária (POLKOM), Superintendente Polísia, António da Luz, organiza enkontru ho membru OPS sira na’in 31, ho Ofisiál Polisia ba Eskola (OPE) na’in-rua iha Komandu Caicoli, Sesta (02/09/2022). Foto/Hatutan.com.

Komandu Dili avalia katak, durante destaka iha suku sira Díli nian, membru OPS sira ativu tebes iha servisu, maske iha tempu dadeersan sira hamriik iha estrada públiku, hodi kontrola movimentasaun transporte públiku, atu evita engarafeamentu no asidente tráfegu.

La’ós ne’e de’it, membru OPS mós hala’o atividade iha suku hamutuk ho lider komunitáriu sira, hodi buka solusaun ba problema sosiál sira ne’ebé mak akontese iha ida-idak nia fatin, hanesan kazu hadau malu bee, baliza oan ruma no problema ki’ik oan sira ne’ebé mak mosu iha parte suku, OPS hamutuk ho xefe aldeia sira halo diálogu, hodi buka solusaun.

Durante surumutu ho membru OPS sira, hetan mós prezensa hosi parseiru TLPDP Australia nian (Timor-Leste Police Developmentu Programe) ho Polisia Komunitária nasionál, ne’ebé lori tán apoiu hanesan rompi patrullamentu hodi fahe ba OPS sira bele uza, tau rádiu no alzema.

Jornalista: Rogério Pereira Cárceres