Hatutan.com, (09 Setembru 2022), Díli—Hafoin akontesimentu insidente ne’ebé rezulta vítima José Bernardo (JB), mate iha sela detensaun tanba deskonfia tara-an rasik, halo sosiedade sente lakon konfiansa ba instuisaun Polísia Nasionál Timor-Leste (PNTL).

Membru Polísia Nasionál Timor Leste (PNTL) hosi Bataliaun Orden Publika (BOP) organiza formatura jerál hodi hala’o patrullamentu konjunta iha Dili, Sesta (09/09/2022). Foto/Elio dos Santos da Costa.

Deskonfiana ne’e mosu, tanba vítima JB mate kedan iha PNTL nia liman-laran no públiku liu-liu família matebian nian deskonfia katak, membru PNTL ne’ebé altura ne’ebá asegura vítima iha sela mak hanesan autór prinsipál.

Lee Mós: Komandu PNTL Forma Ona Ekipa Hodi Investiga Kazu Mate Iha Sela Polísia Caicoli

Maski mosu interpretasaun no krítika oioin hosi públiku, maibé Komandu PNTL afirma pozisaun katak, sempre prontu atu asegura komunidade, liu-liu hodi garante kapitál Díli sai fatin hakmatek no seguru ba ema hotu hodi hala’o atividade ho livre.

“Informa ba komunidade katak, PNTL hamutuk ho membru tomak sei nafatin garante Díli sai fatin seguru, nune’e bele hala’o atividade ho livre,” Komandante PNTL Munisípiu Díli, Superintendente Xefe Polísia, Henrique da Costa hateten durante organiza formatura jerál iha Caicoli, Sesta (09/09/2022).

Iha eventu formatura jerál ne’e partisipa hosi membru hosi Komandu PNTL Munisipiu Díli, Kuartel Jerál, Unidade Espesiál Polísia (UEP), Unidade Polísia Marítima (UPM) no Unidade Polísia Fronteira (UPF).

Prezensa membru sira hosi unidade oioin iha formatura jerál ne’e atu simu orientasaun hosi komandu, katak PNTL iha prontidaun tomak, atu hala’o servisu iha terrenu, hodi restaura fila-fali situasaun konfrontu sira tuda-malu nian mak mosu iha kapitál Dili, to’o rezulta komunidade balun nia sasán hetan estragu, balun kanek, balun lakon vida no balun tenke husik hela sira nia uma hela fatin.

Apoiu sira hosi UEP, UPM, UPF ho Kuartél Jerál PNTL ne’e atu ajuda komandu munisípiu Díli, hodi ezekuta órden operasaun konjunta ne’ebé mak sei hala’o durante semana ida, durante loron 15 no hahú ona iha Kinta (08/09/2022).

“Tanba ne’e, ita fó orientasaun ba membru sira, nune’e la’ós dehan halo de’it operasaun ba iha terrenu, maibé iha mós atividade hanesan tenke ko’alia ba komunidade sira, nune’e informa situasaun ne’ebé mak loos, situasaun ne’ebé mak reál hodi hatene. Balun sei halo pasa revista, balun sei halo atividade vizita ba eskola, balun sei vizita ba universidade, nune’e esplika intensaun ne’e ba públiku,” Komandante Henrique hateten.

Bainhira mosu situasaun distúrbiu ruma durante operasaun ne’e, ekipa operasaun konjunta sei foti medida tuir lei.

Maibé, membru sira ne’e, iha ona regulamentu ba uza forsa ninian, Xefe ekipa sira ne’ebé mak iha terrenu hatene ida-ne’e, no sira avalia ba situasaun hotu, hafoin uza forsa ne’ebé mak nesesáriu.

“La signifika, ema uza fatuk tuda hasoru ita, ita tenke responde ho buat ne’ebé maka’as liu, la’e. Ita hetan ona iha treinamentu, hetan mós orientasaun, ita uza forsa bazeia ba situasaun ne’ebé mak akontese,” nia hateten.

Operasaun ida ne’e, la’ós atu limite ema nia movimentu, maibé atu garante pás no estabilidade nune’e komunidade bele sente livre, hodi hala’o atividade.

“Ita mós identifika iha grupu ne’ebé mak dala-ruma tenta atu kria instabilidade, ita sei bolu mai hodi halo prosesu. Tanba iha ita nia operasaun ne’e rasik, ita forma ona ekipa ida nune’e bele atende mós ida ne’e. Bainhira ita nia patrulla sira sai bá terrenu mak identfidika ema ruma  ne’ebé mak prepara hela atu halo krime ruma ka, komete krime ruma kaptura, lori mai halo prosesu,” Henrique informa.

Komandu PNTL husu mós ba komunidade nia koolaborasaun, nune’e informa ba polisia bainhira iha grupu balun ne’ebé mak forma hela sira nia ekipa ka grupu balun ne’ebé mak tenta atu hala’o situasaun iha Díli la hakmatek ne’e, tenke informa nune’e polísia bele foti medida.

Maibé, bainhira laiha informasaun ka keixa ruma hosi komunidade ba polisia, membru sira bele halo hela movimentu, maibé difísil ba polísia atu foti medida ka asaun ruma.

Jornalista: Rogério Pereira Cárceres