Hatutan.com, (12 Setembru 2022), Díli-Fundu kompromisu ka kometimentu hosi Governu liuhosi Sekretáriu Estadu Juventude no Desportu (SEJD) ho montante $200,000, hosi Federasaun Futeból Timor Leste (FFTL) $200,000 no Órgaun Liga Futeból Timor Leste (LFTL) rasik prepara $131,530 la sufisiente atu bele organiza  Liga Futeból Timorense Époka 2022-2023.

Lee Mós : LFTL ho Klube Primeira-Segunda Divizaun Konkorda Realiza Liga Timorense Époka 2022-2023

Sorumutuk FFTL, LFTL ho reprezentante klube sira iha FFTL, Díli, Segunda (12/09/2022). Foto/Vito Salvador  

Tuir kalkulasaun finanseiru bá Liga Futeból Timorense Époka 2022-2023 ne’e sei presiza tan fundu $416,516 atu bele kompleta to’o $948,046 bá finansia nesesidade tomak Liga nian.

Prezidente LFTL, Nilton Gusmão rekoñese katak orsamentu bá Liga Timorense Époka 2022-2023 aumenta maka’as  tanba klube sira primeira divizaun hakarak subsídiu $40,000 kada klube no segundu divizaun nian hakarak $20,000 kada klube.

Liuhosi sorumutuk entre FFTL, LFTL ho reprezentante klube sira,  Segunda (12/09/2022), iha FFTL, Díli, parte rua (FFTL ho LFTL) buka ona solusaun ida adekuadu oinsá atu realiza Liga Futeból Timorense Époka 2022-2023 iha tinan ne’e nia laran, maske enfrenta hela difikuldade orsamentu ka tenke presiza tan orsamentu $416,516. .

Lee Mós : LFTL Prontu Organiza Liga Timorense Époka 2022-2023

Prezidente FFTL, Francisco Martins da Costa Pereira Jerónimo rasik hateten, rezultadu enkontru FFTL no LFTL too ona iha konkluzaun ida katak osan ne’ebé oras ne’e iha seidauk natoon para organiza liga Timorense époka 2022-2023, entaun desizaun ikus  ne’ebé parte LFTL hamutuk ho FFTL inklui ho reprezentante klube primeira no segunda divizaun foti desizaun katak, aban sei haruka karta ida bá SEJD hanesan Governu atu hanoin fila fali oinsá maka haree posibilidade atu fó tan apoiu finanseiru, nune’e FFTL ho LFTL bele organiza kompetisaun liga bá époka 2022-2023.

“Ida ne’e mak ami nia desizaun no ami ba lai ko’alia tiha ho SEJD pois mak desizaun saida maka ami halo pois mak sei informa fali bá públiku no ami mós hakarak katak liga ne’e tenke la’o iha tempu badak,” Francisco Martins da Costa Pereira Jerónimo hateten.

Lee Mós : Polémika Liga Timorense Époka 2022-2023, FFTL Hein Órgaun LFTL

FFTL hamutuk ho LFTL iha kompromisu katak liga Timorense époka 2022-2023 tenke la’o no lakohi husik hela ba tinan oin, tamba tuir kalendáriu FIFA époka ne’e la’o too tinan oin, tamba ne’e futeból iha Timor-Leste tenke la’o ba oin no jogu liga tenke iha.

Prezidente LFTL, Nilton Gusmão ho Prezidente FFTL, Francisco Jerónimo. Foto/Vito Salvador

LFTL no FFTL konkorda malu katak sei ba tan tuur hamutuk ho Governu haree posibilidade saida mak sei bele halo no ikus mai tuur hamutuk atu deside hamutuk ho klube sira para bele hahú ona liga.

Prezidente LFTL, Nilton Gusmão hateten, FFTL no LFTL iha kompromisu hanesan atu iha tempu badak liga Timorense tenke la’o, infelizmente iha hela situasaun ida falta  orsamentu tamba ne’e prezidente FFTL iha ideia ida atu halo audiénsia ho SEJD atu haree posibilidade balun tamba LFTL halo tiha ona planu orsamentu no kontribuisaun hosi FFTL no Governu iha ona, maibé kontinua falta tamba ezijénsia klube sira nian.

“Ita hanoin futeból tenke la’o bá oin tamba ne’e mak hanoin katak sei hein enkontru parte nain tolu; FFTL, LFTL ho SEJD, atu bele buka solusaun no klube sira mós konkorda.” Nilton Gusmão hateten.

Tuir ajenda katak iha loron 13 fulan-Setembru 2022, FFTL sei haruka karta pedidu audiénsia ho SEJD atu bele iha enkontru entre FFTL, LFTL ho SEJD hodi buka solusaun bá futeból iha Timor-Leste.

Jornalista: Vito Salvadór