Hatutan.com, (20 agostu 2021), Díli-Ho kazu detetadu pozitivu Covid-19 ne’ebé sa’e maka’as no deteta mós Covid-19 variante delta nakda’et ona iha kapitál  Dili,   maka Governu liuhosi Ministériu Edukasaun, Juventude no Desportu (MEJD) no baze ba rekomendasaun hosi  Ministériu Saúde deside suspende provizóriu ensinu aprendizajen prejensiál ba eskola báziku no sekundária sira iha Munisípiu Dili.

Suspensaun provizóriu ba ensinu aprendizajen prejensiál ne’e, hahú hosi loron 17 to’o fali loron 31 agostu, tinan ne’e, no posivel bele hakotu ka estende depende ba situasaun pandemia Covid-19.

Ministru Edukasaun, Juventude no Desportu (MEJD), Armindo Maia. Imajen/Espesiál

Ba jornalista sira iha Palacio do Governo,  Kuarta (18/08/2021), Ministru Edukasaun, Juventude no Desportu, Armindo Maia, informa Governu hola desizaun ne’e tanba ekipa saúde deteta iha eskola ida ne’ebé implementa medida protokolár di’ak tebetebes, maibé detetadu pozitivu Covid-19 besik na’in-50.

“Ami tenke foti desizaun suspende ezame segundu  periodu no suspende provizoriamente prosesu ensinu aprendizajen prejensiál  tanba Covid-19 iha Dili laran sa’e maka’as tebes. Ita lakohi estudante-sira da’et malu, da’et hosi família ba eskola no hosi eskola ba família,”   Ministru Armindo Maia afirma.

Mantein impozisaun serka sanitária iha Dili, Ermera ho RAEOA

Iha loron hanesan, liuhosi  reuniaun Konsellu Ministru (KM), Governu ne’ebé lidera hosi Primeiru-Ministru (PM) Taur Matan Ruak, aprova projetu Rezolusaun Governu hodi mantein impozisaun serka sanitária iha iha Munisípiu Dili, Ermera ho Rejiaun Administrativu Espesiál Oé-Cusse Ambeno (RAEOA) to’o loron 30 fulan agostu, tinan ne’e.

Iha RAEOA, área ne’ebé submete ba impozisaun serka sanitária maka Suku Naimeko, iha Sub-Rejiaun Pante Makasar no Suku Bobometo iha Sub-Rejiaun Oesilo.

Desizaun Konsellu Ministru nian ne’e ho baze analiza no aprezentasaun hosi ekipa Sala Situasaun, Sentru Integradu Jestaun Krize (SS-CIGC, sigla portugés) kona-ba pontu situasaun epidemiolojia nasionál.

Variante delta iha Dili no Ermera

Liuhosi komunikadu imprensa hosi Sala Situasaun Sentru Integradu Jestaun Krize (SS-CIGC, sigla porgués) ne’ebé fó sai sesta (20/08/2021), katak, amostra laboratóriu ba ezame PCR hamutuk 45, ne’ebé rekolle entre  loron 31 Jullu ho loron 09 agostu 2021, no Laboratóriu Nasionál Saúde haruka ba halo sekuensiasaun genómika, iha loron 11  Agostu 2021, iha Peter’s Doherti Institute iha Melbourne, Austrália, hatudu katak, 22 amostra hosi Dili no 15 amostra hosi Gleno-Ermera mak iha liñajen B.1.617.2 (Delta), variante ne’ebé preokupante, ka variant of concern.

Rezultadu hirak ne’e hatudu katak 82,2% (37/45) hosi amostra konfirma prezensa variante Delta.

Rezultadu ne’e mós konfirma katak variante Delta transmite ona iha komunidade nia leet iha Ermera, hafoin Munisipiu Dili, no posibilidade boot, iha mós munisipiu hirak ne’ebé númeru kazu aumenta maka’as hahú agostu 2021.

Óbitu ida no pozitivu 267

Imajen/SS-CIGC

SS-CIGC, sesta (20/08/2021) rejista kazu óbitu ida, pozitivu 267, rekoperadu 113 no kazu ativu 2.882.

Totál óbitu ne’ebé relata hosi SS-CIGC ne’e, timoroan  feto ida ho idade 50, hela iha Dili, no iha 07 agostu 2021, diagnóstika iha Ospital Nasionál Guido Valadares (HNGV)  ho COVID-19 (PCR pozitivu ho CT E gene 16,7, N gene 19,1).

Matebian sofre mós kankru mama direita, ho metastases ba pulmaun, no iha mós anemia severa.

Iha fatin izolamentu Vera Cruz, hala’o tratamentu tuir protokolu ne’ebé iha, maibé matebian hakotu-iis,  kinta (19/08/2021), tuku 16:40 Otl, tanba xoke séptiku no falénsia órgaun lubuk-ida (multiple organ failure).

“Rezultadu PCR hafoin iis-kotu hatudu CT E gene 33. Familia koordena hela ho ekipa saúde atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu imprensa.

Kazu foun, sesta ne’e, hamutuk 267 no mai hosi Dili 152, Baucau (35), Ainaro (30), Covalima (13), Manufahi (12) no munisípiu seluk 35; mane 146 no feto 121.

Imajen/SS-CIGC

Hosi totál kazu detetadu foun, ho idade 20-60 (22,4) ho idade entre tinan 12-59 na’in 195 (73%), idade 60 mai kraik na’in-12. Hosi kazu detetadu foun,  ohin, 89 kazu ka 33,3% sintomátiku (hatudu sintoma).

Kumulativu kazu konfirmadu sura hosi 21 marsu 2020 to’o 20 agostu 2021 hamutuk 13.700. Hosi horisehik mai ohin, teste ne’ebé Laboratóriu Nasionál Saúde halo hamutuk 960 PCR, ho detallu hanesan tuir-mai, Vijilánsia sentinela na’in 101, rastreiu ba kontaktu ka Contact tracing 408, Rastreiu Aleatóriu  ka Random Screening nain 86, viajen sai-hosi serka sanitária hosi Dili 335, viajen internasionál laiha, follow-up iha kuarentena na’in 30.

Totál testes PCR ne’ebé halo loron 19 agostu iha munisípiu-sira seluk, RAEOA no HNGV hamutuk 362, ho detalla hanesan tuir-mai, Maubisse 63, Maliana (63), Viqueque (13), Suai (90), Baucau (66), Ermera ida, RAEOA (24), HNGV (34) no Lautém ualu (8).

Totál doze vasina ne’ebé fó ona ba populasaun elejivel tinan 18 ba leten, to’o ohin dadeer 10:00 Otl,  loron 20 agostu tuir sistema informasaun Saúde iha Ministériu Saúde  ho totál  kumulativu 1ª doze iha Dili (72,1%) no  totál  kumulativu 2ª doze  iha Dili (52,9%).

Ema ne’ebé simu ona vasina doze dahuluk iha Timor-Leste  (47,6%) no simu ona doze daruak (21,0%). (ico)