Hatutan.com, (08 Marsu 2023), Díli—Konsellu Ministru (KM) aprova projetu rua ne’ebé aprezenta hosi Ministru Edukasaun, Juventude no Desportu, Armindo Maia no hosi Sekretáriu Estadu Juventude no Desportu, Abrão Saldanha, relasiona ho prátika arte marsiál sira mak hanesan: Projetu Proposta Lei kona-bá Rejime Organizasaun no prátika desportiva arte marsiál sira.

Rejime Organizasaun no Prátika Desportiva Arte Marsiál ida-ne’e iha Timor-Leste hakarak atu estabelese kuadru jurídiku adekuadu ida ba ensinu, aprendizajen no prátika arte marsiál, ne’ebé haree liubá prevensaun komportamentu sira  ne’ebé bele  fó ameasa ba  orden públika, ba regulasaun ensinu no prátika arte marsiál sira nian no ba promosaun hosi arte marsiál nu’udár prátika desportiva.

Lee Mós: Estatutu Karreira Professór Pré-Eskolár To’o Ensinu Sekundáriu Aprovadu

Advertisement

“Rejime foun ne’e sei inklui diretrizes no norma konstituisaun, autorizasaun no lisensiamentu organizasaun arte marsiál nian, responsabilizasaun dixiplinár no kontra-ordenasionál, kriminalizasaun finansiamentu ilísitu hosi organizasaun no sistema insentivu ida ba prátika arte marsiál tuir Lei,” Hatutan.com sita komunikadu.
Proposta ne’e sei haruka ba Parlamentu Nasionál hodi halo diskusaun no votasaun.

Ida seluk maka, Projetu Dekretu-Lei ba kriasaun Komisaun Reguladora Arte Marsiál (KRAM), I.P., no aprova ninia Estatutu.

Ho objetivu atu hametin pozisaun Komisaun Reguladora Arte Marsiál, diploma ne’e halo transformasaun KRAM nian ha institutu públiku ho autonomia téknika, administrativa, finanseira no patrimóniu rasik.

Institutu públiku ida-ne’e sei iha misaun atu regula no fiskaliza ensinu, aprendizajen no prátika arte marsiál hodi haree liu ba dezenvolvimentu fíziku no mentál hosi indivíduu sira, hodi kontribui ba promosaun sidadania ativa, inkluzaun sosiál no laiha violénsia.

Ba oin, Komisaun sei iha atribuisaun área importante tolu iha área kontra-ordenasionál, hodi sai responsável atu halo instrusaun ba prosesu kontra-ordenasaun sira nian no atu aplikasaun sira-nia sansaun, iha área dixiplinár no iha fiskalizasaun ba federasaun sira ne’ebé ho utilidade públika desportiva, tuir Lejizlasaun ne’ebé vigora hela.

Advertisement

Prevee katak, ezersísiu ba atribuisaun KRAM sei regulamenta tuirmai, no katak parte ida hosi ninia funsaun sira, ba oin, sei ezerse hosi sira-nia federasaun rasik, hafoin ninia estatutu ne’e hetan rekoñesimentu.

Jornalista: Rogério Pereira Cárceres