Hatutan.com, (27 Agostu 2021),  Kabul – Portavós Taliban, Suhail Shaheen, konfirma akontese esplozaun bomba dala-rua  iha besik Aeroportu Internasionál Hamid Karzai iha Kabul, sidade Afeganistaun, kinta 26 Agostu 2021.

Tuir Suheil Shaheen, esplozaun ne’e akontese iha área ne’ebé kontrola hosi Forsa Estadus Unidus Amerika ne’ebé halo hela evakuasaun ba sidadaun Amerika nian iha Afeganistaun.

“Relatóriu preliminariu mensiona katak ema na’in 13 mate no na’in 52 kanek,” Suhail hateten ne’ebé sita hosi  Reuters, kinta (26/08/2021). 

Taliban mós  relata sira kondena maka’as esplozaun ne’ebé mai hosi grupu balun no promete sei toma medida forte ba autór sira.  

Parte sira hosi Taliban rekoñese seidauk identifika autór, maibé Suhail mensiona katak grupu ne’e hanesan “círculo do mal” iha lian Portugés no iha lian Indonézia katak  “lingkaran yang jahat.”

Alein hosi parte Taliban, relatóriu kona-ba esplozaun ne’e hato’o mós hosi  emboot sira (pejabat) Estadus Unidus Amerika  tanba halo hela evakuasaun no halo protesaun ba sidadaun Amerika iha Afghanistan. Evakuasaun kontínua to’o loron ikus, 31 Agostu 2021.

Portavós Pentagon ka Departamentu Defeza Estadus Unidus Amerika, John Kirby, konfirma katak esplozaun ba dahuluk akontese iha Abbey Gate iha aeroportu no esplozaun daruak ladook ka iha Hotel Baron.

“Ami hakarak konfirma katak esplozaun iha Abbey Gate hanesan atake ida kompleksu no rezulta vítima hosi parte Estadus Unidus  Amerika ho sidadaun baibain,” John haktuir iha nia  konta twitter @PentagonPresSec,  kinta (26/08/2021).

Mohammad Tawfiq, abitante ida informa ba Reuters  katak  kanál  ida besik iha aeroportu halibur hela mate-isin no vítima kanek sira. hosi sorin seluk, Jamshed, nu’udar mós sidadaun ida ne’ebé sai hanesan sasin  hateten, esplozaun ne’e iha kedas fatin konsentrasaun.

Reuters mós relata katak parte Estadu Unidus Amerika  fiar dehan  Islamic State Khorasan (ISIS-K) iha responsabilidade ba akontesimentu ne’e. ISIS-K nu’udar grupu simpatizante ISIS di Afeganistaun ne’ebé lansa kontra ka atake hasoru Estadu Unidus Amerika, inklui Taliban. (*/ico)