Hatutan.com, (14 Setembru 2021), Díli–Órgaun Liga Futeból Timor Leste (LFTL) ho Federasaun Futeból Timor Leste (FFTL) komesa soe lia ba malu tanba de’it subsídiu  rihun $310 hosi Sekretáriu Estadu Juventude Desportu (SEJD).

LFTL hanesan órgaun liga ne’ebé harii hosi Governu no  transforma hosi LFA (Liga Futeból Amadora) hafoin susesu organiza jogu iha nivel nasionál. Tanba ne’e, SEJD kontinua fó apoiu orsamentu tuir kompromisu antes hodi transfere osan rihun $310 ba FFTL hodi ajuda lala’ok liga ne’ebé organiza hosi LFTL.

Sekretáriu Estadu Juventude no Desportu (SEJD) Abrão Saldanha, antes ne’e,  informa, iha tinan 2021 ne’e aloka osan hamutuk rihun  $310 ba Liga Futeból Timor-Leste (LFTL) hodi realiza jogu ba segunda divizaun no primeira divizaun. Maibé tanba situasaun pandemia  COVID-19 interrompe tiha atividade jogu no jogu la hala’o.

Iha loron 09 fulan-Agostu 2021, Sekretáriu Estadu Juventude no Desportu (SEJD) ne’ebé transfere ona subsidiu iha faze primeiru nian porsentazen 40 (40%) purvolta rihun $124 ba konta FFTL atu tranfere tutan ba órgaun liga LFTL,  maibé to’o minutu ne’e FFTL rasik  seidauk tranzere sentavus ida ba LFTL. 

Iha tinan 2019, Governu tau rihun $700-resin ba LFTL, maibé tinan 2021 ne’e Governu hatún rihun $310 tanba restu hosi osan sei kobre hosi  FFTL nudár mahon ba asosiasaun futeból sira.

Prezidente LFTL, Nilton Gusmão. Foto/Desportu

Liuhosi konferénsia imprensa iha Díli, tersa (14/09/2021), Prezidente LFTL, Nilton Gusmão, abertamente deklara katak, tanba de’it FFTL la halo transferénsia osan subsídiu hosi SEJD ba órgaun liga LFTL maka prezudika atividade jogu ne’ebé planeadu ona tuir kalendáriu.

“Ami ho FFTL no SEJD iha konkordánsia ida atu lao hamutuk mak SEJD atu transfere ona osan rihun $310  ba iha FFTL hodi haruka ba ami organiza jogu, maibé ami hein de’it se sira haruka ona osan ba ami maka ami foin bele organiza liga, maibé to’o agora FFTL seidauk transfere osan ne’ebé merese ba LFTL,” Nilton hatutan.  

Ho situasaun no polémika ne’e, LFTL konvoka enkontru ho klube 20 atu buka solusaun bainhira FFTL lakohi transfere osan ho montante rihun $310 ba konta liga nian.

“Hanesan órgaun liga iha devér halo enkontru ho klube sira hodi diskute hamutuk no rona diretamente pozisaun klube nian atu buka solusaun ba subsídiu SEJD nian ne’ebé pendente hela iha FFTL,” Nilton esklarese.

Karik FFTL kontinua la transfere subsídiu hosi SEJD ne’e, LFTL tenta hela estratejia  para atu bele kontinua  atividade jogu no klube sira la bele sai vítima.

“Futeból ne’e públiku nian, tanba ne’e maka ami hamutuk ho klube sira hodi halo deklarasaun konjunta ida, para públiku mós koñese no hatene saida maka atividade futeból enfrenta hela. Laos tanba klube sira dezanimadu ka lakohi ona atividade futeból iha Timor. Laos mós tanba COVID-19 maka atividade futeból para, maibé iha mós sirkunstánsia balun ne’ebé implika atividade refere, para alende COVID-19 sai hanesan situasaun ne’ebé la permite órgaun liga hala’o atividade futeból,” Nilton afirma tan.

Iha oportunidade ne’e, portavós klube 20 iha LFTL, António Sepeda, afirma subsídiu ida agora iha Timor-Leste ne’e subsídiu ba Liga (atividade) ba klube sira ne’ebé partisipa iha atividade liga ne’e. Se liga la iha, subsídiu nunka iha. Signifika subsídiu la’ós ba klube maibé ba apoiu atividade liga.

António hateten, époka 2021 Timor tomak enfrenta difikuldade tanba COVID-19, ho ida-ne’e maka klube hato’o sira nia difikuldade ba FFTL hodi konsidera, tanba atu kumpre protokolu saúde, klube presiza hasai tan kustu boot ho ida ne’e maka klube sira hato’o difikuldade sira ne’e ba FFTL atu bele konsidera tuir proposta ne’ebé  hato’o ona.

Bainhira FFTL la konsidera preokupasaun klube nian mak sira rasik deside époka 2021 di’ak liu lalika hala’o jogu no bele realize hikas iha tinan oin.

FFTL responde LFTL ho klube sira

Sekretáriu Jerál FFTL, Nelio Isaac Sarmento. Foto/Hatutan.com

Ba preokupasaun no lamentasaun sira ne’ebé aprezenta hosi LFTL ne’e, Sekretáriu Jerál FFTL, Nelio Isaac Sarmento, esklarese katak subsídiu SEJD nian ba LFTL liuhosi FFTL ne’e atu sustenta atividade liga. Nune’e, bainhira laiha jogu labele transfere osan.

“Osan Estadu nian fó mai ne’e bainhira liga ne’e la’o mak fó ba para finansia atividade ne’e. Se liga ne’e la lao, maibé osan ita gasta, ita atu ba hatán ne’e oinsá. FFTL iha responsabilidade atu hato’o relatóriu ba Governu kona-ba osan ne’ebé fó mai FFTL, se ita husu gasta balu ona mak tenke iha atividade,” Nelio Isaac Sarmento esklarese ba jornalista sira.

FFTL komunika ona ho LFTL katak, Governu konkorda karta ne’ebé FFTL hato’o ba Governu atu haruka uluk osan uitoan ba LFTL durasaun fulan hitu (7) tanba órgaun liga atribui ona orsamentu balun ba sira hodi selu saláriu funsionáriu sira nian.

“Ami komunika ho Governu no  Governu dehan ita bele finansia bainhira liga ne’e lao tanba kompromisu FFTL nian ho Governu,” Nelio Isaac argumenta. 

Atu halo atividade seluk ruma ho osan ne’ebé haruka hosi Governu, tuir Nelio Isaac,  tenke informa uluk. FFTL informa no Governu aseita hodi fó fleksibilidade ba FFTL atu halo, to’o iha ne’e mak atu selu saláriu ba funsionáriu sira iha LFTL, maka FFTL avansa uluk ho fulan tolu ba sira nia saláriu hahú jullu-setembru. 

Kona-ba reklamasaun hosi klube sira nian, Sekretáriu Jerál FFTL, Nelio Isaac Sarmento afirma tan, iha fulan hirak ba kotuk FFTL-LFTL simu ona karta balu hosi klube 20 bainhira la aumenta orsamentu subsídiu ba klube mak sira sei la partisipa iha jogu.

“Bazeia ba karta ne’e, LFTL mós hatene ona kbiit ami nian atu selu ba klube sira ne’e rihun $20 ba klube Primeira Divizaun no rihun $10 ba klube segunda Divizaun,” eis Sekretáriu Estadu Juventude no Desportu ne’e esplika. 

FFTL, tuir nia, la’ós hasai de’it osan ne’e maibé tanba simu responsabilidade ne’e hosi Governu, kada tinan Governu mak fó subsídiu ba LFTL maibé tinan ida ne’e FFTL mak finansia. 

Nelio Isaac aprofunda katak planu FFTL nian ne’e atu halo jogu ho modelu kurtu prazu ho durasaun fulan ida ka fulan rua (2) de’it, depois mak enkaixa ho jogu seluk hanesan kopa FFTL, tasa 12 Novembru iha laran no iha kopa FFTL klube sira nafatin hetan osan durante jogu dala ida hetan $500. (bit)