Hatutan.com, (24 Setembru 2021), Díli—Iha loron hitu (7) ikus ne’e, Timor-Leste (TL) nu’udár nasaun ne’ebé tama kategoria piór liu ba transmisaun Covid-19 hosi nasaun 32 iha Ázia-Oseánia.

Dadus hosi Pájina ofisial Digital Statistics, (Learn From Data) atualiza katak, Timor-Leste (TL) okupa transmisaun piór liu ba dala-15, tanba durante loron hitu ikus ka semana ida, hahú hosi loron 13 to’o 19 fulan-Setembr 2021, iha ema mate ho Covid-19 na’in-10 no iha kazu infetadu pozitivu hamutuk 445 pur abitante 1.000.

Hosi nasaun 32 iha Ázia-Oseánia, nasaun ida ne’ebé okupa primeiru lugár piór liu iha transmisaun Covid-19, maka Mongolia ho nia kazu iha semana ida nia laran, ema mate hamutuk 26, no kazu infetadu hamutuk 6.758, pur populasaun 3.000.

Nasaun daruak transmisaun piór liu maka Malázia, ne’ebé nia kazu ema mate durante semana ida hamutuk ema na’in 81, no kazu infetadu hamutuk 3.743, pur abitante 3.000. Tuir kedan nasaun Georgia ho nia númeru mate durante semana ida hamutuk ema na’in 88 no kazu infetadu hamutuk ema na’in 3.702,  pur abitante 3.000.

Nasaun dahaat, Armenia ho nia kazu mate hamutuk 41 no kazu infetadu 1.582 pur abitante 1.500, Dalima maka nasaun Maldives ho nia númeru mate durante semana ida hamutuk haat (4), no númeru infetadu 1.490 pur abitante 1.500.

Nasaun daneen maka Tailándia, ho nia totál ema mate durante semana ida hamutuk 15 ho kazu infetadu 1.355 pur abitante 1.500. Tuir kedan nasaun Filipina ho númeru mate kada semana hamutuk 14 no infetadu 1.274 pur abitante 1.500.

Da-ualu, Azerbaijan iha ema mate durante loron hitu ka semana ida hamutuk na’in 19 no infetadu hamutuk 1186 husi populasaun 1.500. Da-sia, nasaun Kazakhstan ho  nia númeru mate kada loron hitu hamutuk 32 no infetadu hamutuk 1169, husi populasaun 1.500.

Da-10, nasaun Fiji ho nia númeru mate kada semana hamutuk 34 no infetadu hamutuk 1.132, husi abitante 1.500. Da-11 maka Singapura ho nia kazu mate durante semana ida hamutuk 0 maibé infetadu hamutuk 954 husi abitante 1.000.

Da-12 maka Sri Lanka, ho nia kazu ema mate durante loron hitu hamutuk 40 no infetadu hamutuk 906 pur abitante 1.000.

Da-13, maka nasaun Vietname, ho nia kazu ema mate hamutuk 19 no infetadu hamutuk 771, pur abitante 1.000.

Da-14 Austrália ho ninia transmisaun piór hosi nasaun 32 iha Ázia-Oseánia, ho nia kazu mate durante loron hitu hamutuk neen (6) no infetadu 90 pur abitante 500, hafoin Timor-Leste hanesan hakerek ona iha leten okupa númeru dasanulu resin lima (da-15).

Indonézia hanesan nasaun viziñu ninia transmisaun piór okupa númeru 24 hosi nasaun 32 iha Ázia-Oseánia, ho nia kazu mate durante loron hitu hamutuk neen (6) no infetadu 90 pur abitante 500.

Hafoin Timor Leste okupa númeru transmisaun piór, iha mós nasaun sira seluk ne’ebé okupa númeru da sanulu resin neen to’o 32 mak hanesan, Japaun, Cambodia, Myanmar, Nepal, Koreia du Sul ho nia númeru mate kada loron hitu hamutuk ida (1), no infetadu hamutuk 251 hosi populasaun 500, no mós Laos, India, Uzbekistan, Kyrgyzstan, Pakistaun, Bangladesh, Nova Zelándia, Nova Guinea, Afeganistaun, Tajikistaun, no nasaun ne’ebé okupa númeru ikus liu besik atu liver ona husi transmisaun Covid-19 mak hanesan Hong Kong ho nia númeru mate kada semana 0 kazu infetadu rua (2) hosi populasaun 0-3.000. (fya)