Hatutan.com, (12 Fevereiru 2022), Díli—Estadus Unidus Amérika (EUA), iha Sábadu 12 Fevereiru 2022, oferese tán vasina Pfizer BioNtech ho kuantidade Doze hamutuk 100.620, ba povu Timor-Leste (TL).

Serimónia entrega vasina Pfizer BioNtech ho kuantidade Doze hamutuk 100.620 entre Estadus Unidus Amérika (EUA) ba Governu TL iha Sábadu 12 Fevereiru 2022, ne’ebé tula ho Aviaun TRI-M.G Asia Airlines. Foto/UNICEF.

Vasina Pfizer BioNtech Doze 100.620 ne’e, ho apoiu hosi COVAX fasilities ne’ebé koordena ho UNICEF, no to’o iha Aeroportu Internasionál Nicolau Lobato Comoro-Díli iha tuku 14:10 ho Aviaun TRI-M.G Asia Airlines.

Ministra Saúde (MS), Odete Maria Freitas Belo, hateten tuir planu Vasina Pfizer BioNTech hirak ne’e sei uza atu vasina labarik-sira ne’ebé ho idade entre 12 no antes 18 no mós ba doze booster, tuir desizaun hosi Governu Timor-Leste.

“Kontribuisaun hosi Governu Estadus Unidus liu husi COVAX sei apoia tebes Timor-Leste hodi kontinua vasina ema hotu ho idade 12 ba leten no redúz risku hosi kazu todan no hospitalizasaun,” Hatutan.com sita deklarasaun Odete Maria Freitas Belo iha komunikadu.

Odete konsidera apoiu ida ne’e, nu’udár Solidariedade ida ne’ebé mak parseiru COVAX hatudu ona, no nu’udár mós ezemplu di’ak, liu-liu iha tempu ida ne’ebé mak sira nia nasaun rasik, populasaun barak mak hetan impaktu maka’as hosi pandémia Covid-19 no evolusaun variante hanesan Omicron.

“EUA hamrik hamutuk ho Timor-Leste hanesan amigu no parseiru di’ak bainhira ita serbisu hamutuk atu kombate Covid-19,” nia hateten.

Ho apoiu vasina Pfizer BioNtech doze 100.620 ne’e, sura ho totál vasina sira ne’ebé antes ne’e apoia, kompleta ona kontribuisaun Estadus Unidus ba Timor-Leste ba totál vasina Pfizer hamutuk doze 201.240 liuhosi Fasilidade COVAX nian.

Enkarregadu Negósiu EUA nian iha TL, Tom Daley hateten liuhosi kontribuisaun hirak ne’e, kompleta ona kompromisiu sira ne’ebé antes ne’e halo hodi apoia Governu TL, nune’e bele salva populasaun hosi efeitu Covid-19.  

“Kontribuisaun ohin loron refleta ami nia kompromisu atu apoia Governu nia esforsu atu salva moris iha Timor-Leste. Ami orgullu atu halo vasina ne’e disponivel to’o pandemia ne’e nia rohan no rekopera fali ekonomia,” Tom Daley hateten.

Fasidade COVAX, nu’udár pilar vasina husi Acelerador de Acesso às Ferramentas COVID-19 (Inglês: Access to COVID-19 Tools (ACT) Accelerator), mak ko-lideradu hosi Koaligasaun ba Inovasaun Preparasaun Epidemia (Inglês: Coalition for Epidemic Preparedness Innovations (CEPI), Gavi, the Vaccine Alliance (Gavi), no Organizasaun Mundial Saúde (OMS) – iha parseria ho UNICEF hanesan parseiru implementador, nune’e mós ho organizasoins sosiedade sivíl sira, fabrikante vasina sira, Banku Mundial, no seluk tan.

Estadus Unidus Amérika (EUA), iha Sábadu 12 Fevereiru 2022, oferese tán vasina Pfizer BioNtech ho kuantidade Doze hamutuk 100.620, ba povu Timor-Leste (TL) ne’ebé tula ho Aviaun TRI-M.G Asia Airlines. Foto/UNICEF.

COVAX Advance Market Commitment (AMC) alkansa ona resposta multilateral ida ba krizi pandemia, utiliza esperênsia husi ajênsia multilateral sira, rekursu husi doador sira no kompromisu husi nasaun sira ne’ebé mak simu, hodi apoia asesu global ne’ebé mak justu ba vasina Covid-19.

Ho kontribuisaun billoins $4 atu sosa vasina no ninia distribuisaun, Estadus Unidus mak sai hanesan doador boot liu ba Fasilidade COVAX.

Hahú hosi inisiu pandemia, Estadus Unidus serbisu hamutuk ho Governu Timor-Leste atu fornese vasina no liu millaun $5.9 ba asistensia krítiku hodi luta kontra Covid-19.

Parseiru COVAX apoia ona governu-sira ho ninia parseiru sira iha mundu tomak atu prepara ba no implementa kampaña vasinasaun Covid-19.

Iha Timor-Leste, UNICEF ho OMS mak apoia Governu Timor-Leste hodi realiza planu nasional ba implementasaun vasinasaun.

Fasilidade COVAX no fornesimentu vasina apoiu hosi generosu finansiamentu husi Governu Australia, Bhutan, Canada, Colombia, Republika Korea, Kuwait, Japaun, Monaco, Nova Zelandia, Qatar, Saudi Arabia, Singapora, Ekipa Europeia, Reinu Unidu, Eastadus Unidus Amérika no doador no organizasoins balun tan. 

Kona-bá COVAX

COVAX, pilar vasina hosi Acelerador de Acesso às Ferramentas COVID-19 (Inglês: Access to COVID-19 Tools (ACT) Accelerator), mak ko-lideradu hosi Koalisaun ba Inovasaun Preparasaun Epidemia (Inglês: Coalition for Epidemic Preparedness Innovations (CEPI), Gavi, the Vaccine Alliance (Gavi), no Organizasaun Mundial Saúde (OMS), iha parseria ho UNICEF hanesan parseiru implementadór, nune’e mós ho organizasoins sosiedade sivíl sira, fabrikante vasina sira, Banku Mundial, no seluk tan. Iha Amérika, Fundo Rotativo PAHO mak ajente kompras rekuñesidu ba COVAX.

Advance Market Commitment (AMC) finansiadu liuhosi generozidade hosi governu sira, setór privadu sira, parseiru filantrópiku no multilateral sira, haree AMC donor table kona-ba lista kompletu hosi kompromisu hirak ne’e. AMC mak mekanizmu finansiamentu inovadór atu ajuda asegura asesu globál no justu ba vasina COVID-19.

Jornalista: Rogério Pereira Cárceres