Hatutan.com, (01 Outubru 2021), Dili—Polísia Nasionál Timor-Leste (PNTL), liuhosi Servisu Investigasaun Kriminál (SIK), Komandu Munisipiu Dili, halo detensaun ba suspeitu na’in-tolu ho inisial JDS, JPD, ho JFDS, iha sela detensaun Kaikoli, tanba loke jogu ilísitu (bola-guling) ho ilegál.

Ema na’in-tolu ne’e hetan detensaun iha área Ai-meti laran, Aldeia Săo José, Suku Komoro, Postu Administrativu Dom Aleixo, Munisipiu Dili, bainhira joga hela jogu bola guling, iha Kinta, tuku 11:20, otl.

Evidénsia hosi kazu ne’e mak hanesan osan ho montante $1.322, meza bola guling, water pass, pó no sasan sira-seluk.

Suspeitu na’in-tolu ne’e, SIK halo detensaun tanba deskonfia kontra lei 06/2016, 26 abríl kona-bá rejime jurídiku lisensiamentu no esplorasaun tradisionál, no kontra kódigu penál, artigu 322 kona-bá esplorasaun ilízitu bola guling ne’ebé Governu bandu.

“Sira na’in-tolu iha ona sela detensaun komandu munisipiu Dili, nune’e bele kontinua prosesu no sei aprezenta ba Ministériu Públiku,” Komandante PNTL Munisípiu Díli, Superintendente Polísia, Hendrique da Costa, hateten ba jornalista iha Sesta (01/10).

Servisu Investigasaun Kriminál Munisípiu Dili sei hala’o prosesu investigasaun ba suspeitu na’in-tolu ho númeru prosesu NUC:0523/21.DCIMR.

Komandu Munisípiu Dili mós sei aprezenta hotu evidénsia ne’ebé halo ona apreensaun ba MP, hafoin sei deside atu entrega fila-fali ba na’in ka hatama ba kofre Estadu.

Operasaun ba jogu ilísitu ne’e, Komandu Munisípiu Dili hala’o ona desde semana kotuk liuliu fó ona orientasaun ba Komandante Eskuadra-sira atu aviza ba família-sira ne’ebé haree mate-uma, labele autoriza ema joga bola guling.

Tuir planu, operasaun ne’e sei kontinua atu kombate jogu ilegál sira espesialmente iha kapitál Dili no jeralmente iha territóriu tomak.

Antes ne’e, iha 09 novembru 2020 Tribunál Distritál Dili (TDD) julga ona kazu jogu ‘bola guling’ ilegál iha mate-uma, hafoin polísia preende hodi detein ho flagrante delito. (ger)