Hatutan.com, (05 Outubru 2021), Díli—Prokuradór Jerál Repúblika (PGR), Alfonso Lopes, tersa (05/10/2021), hasoru malu ho Prezidente Repúblika (PR), Francisco Guterres “Lú Olo”, hodi relata situasaun serbisu PGR nian no informa mós ba PR Lú Olo, kona-bá kontinuasaun kazu eis-padre RD  nian.

 Ministériu Públiku akuza  mahein uma-mahon Topu-Honis, Kutete, Oé-Cusse ne’e, ho kazu pedofilia hasoru orfanatu sira.  

Prokuradór Jerál Repúblika (PGR), Alfonso Lopes. Foto/Hatutan.com

“Ita hatene katak prosesu julgamentu ba eis-amu nian ne’e seidauk termina no sei lao nafatin hodi hein sasin adisionál ne’ebé tribunál mós presiza rona tanba balun iha estranjeiru no sei rona sira-nia sasin liu husi video zoom,”  Alfonso Lopes informa ba jornalista sira hafoin hasoru-malu Prezidente Repúblika Francisco Guterres “Lú-Olo” iha Palásiu Prezidensiál, Díli.

Liuhosi audiénsia julgamentu iha Tribunál Distritál Oé-Cusse,  foin lalais ne’e, Juis koletiva deside adia julgamentu ba fali iha loron 18 fulan-Outubru, tinan-ne’e, hodi rona tan sasin sira husi parte Ministériu Públiku nian.

Kazu pendente iha MP sa’e ba 3,112

Hafoin férias judisiáriu termina no hahú  fali iha loron 16 fulan-Setembru ne’e, kazu ne’ebé Ministériu Públiku rejista hamutuk 483. Husi prosesu hirak ne’ebé tama MP finaliza ona kazu hamutuk 214, kazu ne’ebé arkiva 179. Husi total numeru ne’ebé iha total kazu pendente sa’e ba 3,112.

PGR Alfonso Lopes hateten,  razaun kazu pendente nia numeru aumenta tanba situasaun pandemia global Covid-19 ne’ebé obriga ema hotu tenke moris iha konfinamentu no serka sanitária.

ferias majistradu judisiáriu ne’ebé obriga MP halo de’it atendimentu ba kazu urjente ka kazu arguidu prezu. Maske majistradu judisiáriu maioria férias, prosesu iha MP tama nafatin no iha fulan-Agostu, tinan ne’e, rejista kazu hamutuk 370 tanba ne’e kazu ne’e sa’e ka aumenta.

Iha Gabinete Sentrál Kombate Korrupsaun no Krime Organizad, kazu pendente atuál hamutuk 217 no prosesu  tama hamutuk 16 no parte Gabinete Kombate Korrupsaun no Krime Organizadu termina ho akuzasaun no arkiva ba kazu 16 ne’e tamba ne’e konsideradu impata.

 Husi total kazu ne’ebé iha rezista mós iha kada prokoradoria distritál sira ho kazu ne’ebé diferente. Iha nivel distritál, prokuradoria distritu Díli nia númeru prosesu barak liu sura husi  fulan-Setembru nia klaran mai, rejista kazu hamutuk 312 no konsege halo remata kazu 219 no kazu pendente iha prokuradór distritál Díli 2,266 sura husi 2020. Prokuradoria distritál Baucau rejista kazu tama hamutuk 76 no finaliza ona kazu 75 no prosesu pendente ne’ebé iha hamutuk 389.  

Prokuradór distritál Suai rejista kazu hamutuk 56 finaliza ona kazu 55 pendente atuál hamutuk 159. Iha prokuradoria Oé-Cusse kazu hamutuk 23, finaliza ona 30 no pendente atuál hamutuk 82.

 Kazu tipu urjente la’o hela

Prezidente Tribunál Rekursu (PTR), Deolindo dos Santos. Foto/Hatutan.com

Hosi sorin seluk, Prezidente Tribunál Rekursu (PTR), Deolindo dos Santos, subliña katak serbisu sira iha tribunál relasiona ho ferias judisiál, maibé serbisu balun lao hela, liu-liu liga ho julgamentu ba kuzu sira ne’ebé ho tipu urujensia.

“Durante ferias judisiariu, julgamentu sira ne’e halao deit ba prosesu sira ne’ebé urujente. Krime sira ne’ebé nia prosesu ne’e preju ka sumariu ba atu halo primeiru interogatoriu ka sumariu ba julgamentu sira ne’ebé menus husi tinan liman no prosesu sivíl sira ne’ebé iha providensia kautilar sira ne’e mak halo,” PTR Deolindo dos Santos hateten hafoin hasoru malu mós ho Prezidente Repúblika, Francisco Guterres “Lú Olo”.

Nia akresenta Tribunál Rekursu nia serbisu la’o normál no durante ne’e iha evolusaun pozitivu ba iha serbisu sira iha tribunál sira hanesan Díli, Baucau, Suai ho Oé-Cusse. (bit)