Hatutan.com (14 Outubru 2021), Díli—Sekretariadu Tékniku Administrasaun Eleitorál (STAE), rejista ona eleitór na’in 367 iha diáspora, durante loron 10 hala’o resensiamentu no atualizasaun baze de dadus, iha nasaun Portugál 20, Korreia Súl 292 no Reinu Unidu 55.

Diretór Jerál STAE, Acilino Manuel Branco. Foto/STAE.

Ekipa resensiamentu ne’e hamutuk ema na’in-ualu (8) ne’ebé dezloka ba diáspora iha 01 Outubru no tuir planu sei remata iha 14 Janeiru 2022.

Prosesu resensiamentu ne’e hahú ho formasaun no hala’o resensiamentu no atualizasaun baze de dadus liu hosi atendimentu mobile.

Resensiamentu no atualizasaun baze de dadus ba nasaun haat iha diápora hanesan Austrália, Portugál, Korreia Súl no Reinu Unidu, hatuur iha rezolusaun Governu no 105/2021 loron 11 Agostu.

Atividade ne’e hanesan preparasaun ba eleisaun Prezidensiál 2022, maibé iha Austrália daudaun ne’e seidauk bele halo, tanba ekipa seidauk dezloka no Austrália rasik sei implementa lock down.

“Presija mellora liu tán hodi hakbesik atendimentu ba komunidade iha Inglaterra, tanba kestaun tékniku ne’ebé daudaun enfrenta hanesan diferensa oras, enkuantu sistema integradu no online, nune’e bainhira akontese eletrisidade mate no internet la la’o iha Timor, maka afeta direta ba atendimentu iha diaspora,” Diretór Jerál STAE, Acilino Manuel Branco, hateten ba jornalista-sira, iha edifísiu MNEK, Kinta (14/10/21).

Difikuldade ne’e, kontribui ba atendimentu ne’ebé atrazu no han oras iha Inglaterra, maibé resensiamentu ne’e foin mak loron 10 no ekipa sei haree posibilidade hodi reforsa iha aspetu oi-oin hanesan rekursu umanu no ekipamentu, nune’e bele fó atendimentu  másimu.

Tanba ne’e, esforsu hosi STAE antesipa ona servidór sentrál iha Dili tenke funsiona durante oras 24, nune’e bele solusiona problema imediata hodi garante atendimentu iha diaspora.

Alende ne’e, reforsa mós koordenasaun entre MNEK ho Embaixadór-sira hodi hatene loloos atendimentu, atu hala’o iha fatin ne’ebé de’it, tanba atendimentu tenke halo iha embaixada no konsuladu, maibé tenke haree mós espasu iha embaixada ne’ebé limite tebes.

STAE rekoñese katak, iha loron hirak liu bá mosu protestu no preokupasaun hosi komunidade iha Reinu Unidu liga ho atendimentu ne’ebé kleur no dook hosi komunidade nia hela fatin, tanba ne’e husi parte MNEK, STAE, CNE halo ona koordenasaun ho Embaixadór-sira iha Inglaterra, hodi responde preokupasaun komunidade iha Inglaterra.

“Ita sei esforsu liu tán atu halo atendimentu fora hosi fatin Embaixada, tanba ne’e iha tempu badak sei identifika tán fatin nune’e bele lori atendimentu besik ba komunidade liu-liu iha Inglaterra,” Acilino Manuel Branco, hateten.

Dokumentu ne’ebé sidadaun-sira presiza lori ba prosesu resensiamentu no atualizasaun baze de dadus mak hanesan, Billete Identidade, Passaporte no Sertidaun Repúblika Demokrátika Timor Leste (RDTL).

Jornalista: Carmelita Isaac