Hatutan.com (20 Outubru 2021), Dili—Tribunál Distritál Dili (TDD) kontinua halo julgamentu ba krime furtu agravadu ne’ebé deskonfia involve atuál Deputadu Congresso Nasional Reconstrução Timorense (CNRT), Adérito Hugo da Costa, relasiona ho dada ahi ilegál iha tinan 2016.

Edifísiu Tribunál Distritál Dili (TDD). Foto/TDD.

Tuir ajenda, iha loron 18 fulan Outubru, TDD tenke rona deklarasaun hosi arguidu, maibé iha loron ne’e arguidu la marka prezensa sem justifikasaun.

Notísia iha Relasaun:Fa’an Farda PNTL ho F-FDTL Ilegál, TDD Kontinua Julga Funsionáriu PDHJ

Informasaun ne’ebé Hatutan.com hetan hosi ofisiál justisa katak, antes ne’e arguidu hetan ona notifikasaun hosi Tribunál, maibé la marka prezensa iha Tribunál sen justifikasaun.

Tanba ne’e, iha sala audiénsia Ministériu Públiku (MP) husu ba Tribunál atu aplika multa $150 no mandadu detensaun bainhira iha prazu loron lima nia laran arguidu la aprezenta justifikasaun ba Tribunál, tuir artigu 256 hosi kódigu prosesu penál, hodi asegura arguidu nia prezensa iha Tribunál.

TDD aseita ho pedidu hosi MP no sei manda karta ba PN liu-liu komisaun A, hodi fó koñesimentu ba arguidu nia falta iha Tribunál, tanba antes ne’e PN hasai ona imunidade.

Antes ne’e, MP halo akuzasaun katak, iha loron 02 fulan Maiu tinan 2016 bazeia ba relatóriu kontajen enerjia ne’ebé relata hosi EDTL hatudu katak, arguidu gasta enerjia normál $120 kada fulan, maibé realidade lista uzu enerjia hahú fulan Juñu tinan 2016 to’o fulan Agostu 2017, arguidu gasta enerjia maioria entre $19 to’o $37, nune’e depois halo tiha komparasaun kontajen ba gastu normál ho montante $120, konklui katak hahú períudu Juñu 2016 to’o Agostu 2017 arguidu nia konduta hamosu ona prezuizu ba Estadu ho montante globál $9.760.

Ho hahalok ne’e, MP akuza arguidu ba pratika krime furtu agravadu ne’ebé previstu iha artigu 251 no artigu 252 hosi kódigu penál TL.

Audiénsia julgamentu prezide hosi juiz singulár Argentino Luíza Nunes, MP reprezentua hosi Prokuradora Lídia Soares no arguidu hetan asisténsia legál hosi Defensór Públiku.

Jornalista: Carmelita Isaac