Hatutan.com, (25 Outubru 2021), Dili—Organizasaun Internasionál ba Migrasaun (IOM) iha Timor-Leste (TL), oferese mákina verifikadór ka ‘Verifier Travel Document and Bearer (TD&B), hamutuk tolu ba Ministériu Interiór (MI), atu bele fasilita ofisiál Servisu Migrasaun (SM), hodi kontrola sidadaun sira ne’ebé tama-sai iha pontu entrada TL.

Vise MI, António Armindo, simbolikamente, simu hela mákina Verifier Travel Document and Bearer (TD&B), hamutuk tolu hosi Xefe Misaun IOM iha TL, Ihma Shareef, iha Otél Novu Turízmu, Segunda (25/10/21). Foto: Suplay.

Governu TL liuhosi MI ho IOM ko’alia ona dezde inísiu 2021, kona-bá oinsá fasilita ekipamentu ruma hanesan, Verifier Travel Document and Bearer (TD&B), ba migrasaun atu bele moderniza sistema kontrolu iha pontu entrada sira TL nian.

Notísia iha Relasaun:Deskobre fukun-sira fó espasu ba pasajen ilegál buras iha fronteira

“Ida ne’e hanesan ekipamentu sekundáriu ne’ebé ajuda migrasaun hodi halo verifikasaun ba dokumentu sira ne’ebé falsu, fraúde iha liña fronteira sira hanesan aeroportu, Batugade ho Sakato,” Vise Ministru Interiór, António Armindo, hateten iha Otél Novu Turízmu, Lesidere, Segunda (25/10/21).

Tuir planu, iha semana oin sei halo instalasaun ba pontu entrada sira, no sei fasilita mós treinamentu ba ofisiál migrasaun sira, hodi bele hahú utiliza iha servisu fatin.

Estasaun servisu Verifier TD&B ne’e, hanesan hakat pasu importante ida tán ba hametin TL nia kapasidade jestaun iha fronteira, liuhosi detesaun di’ak liu tán ba dokumentu viájen no identidade falsu sira iha pontu kontrolu fronteira.

Ho instalasaun estasaun servisu ne’e, TL mós sai parte ba rede rejionál ida boot liu iha nasaun 19, ne’ebé koordena hosi Document Examination Support Center (DESC).

Serimónia entrega mákina Verifier Travel Document and Bearer (TD&B), hamutuk tolu hosi Xefe Misaun IOM iha TL, Ihma Shareef, iha Otél Novu Turízmu, Segunda (25/10/21). Foto: Suplay.

Iha fatin hanesan, Xefe Misaun IOM iha TL, Ihma Shareef, konsidera ho instalasaun Verifier TD&B ne’e, TL sei koloka nia aan di’ak liután ba hatán dezafiu-sira ne’ebé aumenta beibeik hanesan fraúde dokumentu viájen no identidade, bazeia ba análize trends rejionál no nasionál, atu dezenvolve resposta jestaun fronteira operasionál bazeia ba intelijénsia.

“Fraúde dokumentu viájen no identidade nu’udár modus operandi ida ne’ebé ema uza iha tráfiku umanu, kontrabandu migrante no forma sira seluk krime organizadu transnasionál,” nia hateten.

Verifier TD&B nu’udár ferramenta inspesaun sekundária automatizada ida ne’ebé trasa ona atu tulun ofisiál migrasaun sira-nia servisu iha pontu entrada, hodi halo ezaminasaun ba dokumentu no verifikasaun identidade.

Estasaun servisu ida-ne’e mós interroperável ho baze dadus Stolen and Lost Travel Document (SLTD) INTERPOL nian, ne’ebé bele verifika dokumentu viájen dijitalizadu sira hasoru dokumentu sira ne’ebé grava iha sistema.

“Apoiu ida ne’e ho objetivu maka atu kombate tráfiku no liu-liu kontrola sidadun sira ne’ebé tama sai mai TL,” nia subliña.

Sistema ne’e mós oferese asesu ba análiza trend sira nasionál no rejionál bazeia ba dadus naun-sensitivu viájen no posível impostór sira iha fronteira.

Alende de apoiu ekipamentu tolu ne’e, IOM mós sei ajuda fasilita treinamentu ba membru Polisia Nasional Timor-Leste (PNTL) liuhosi ofisiál Servisu Migrasaun, hodi bele hatene halo operasaun.

Projetu ne’e apoiu fundu hosi IOM rasik liuhosi IOM Development Fund, maibé la temi kona-bá númeru ka valór orsamentu hira mak uza hodi sosa ekipamentu verfier tolu ne’e rasik.

Tuir planu, estasaun servisu Verifier TD&B hirak ne’e sei monta iha pontu entrada sira nasaun TL nian mak hanesan, Aeroportu Internasionál Dili, Batugade no Sakato (RAEOA). 

Jornalista: Rogério Pereira Cárceres