Hatutan.com, (20 Outubru 2021), Díli—Komandu Jenerál FALINTIL Forsa Defeza Timor-Leste (F-FDTL), forma ona komisaun konjunta ida atu bele halais prosesu investigasaun ba patrimóniu Estadu ne’ebé hetan estragu hosi membru F-FDTL iha área Becora.

“Investigasaun ne’e atu bele hatene motivu loloos hosi akontesimentu ne’ebé rezulta patrimóniu Esdtadu hetan estragu,” Vise-Xefe Estadu Maiór Jenerál Forsa Armada, Majór Jenerál Domingos Raul ‘Falur Rate Laek’, hateten ba jornalista-sira iha Palásiu Prezidensiál Bairru-Pité,  Kuarta (20/10/21).

Notísia iha Relasaun:Tenente Jenerál Lere husu membru F-FDTL kuida patrimóniu Estadu

Falur Rate Laek nu’udár órgaun apoiu, hodi forma komisaun ne’e, atu bele buka kauza loloos hosi akontesimentu ne’e.

“Kareta mak sala ga, ema mak sala ga ou keta kontratu mak sala. Ita hein katak komisaun ne’e sei pronunsia mai ita verdade hosi akontesimentu ne’e,” nia hateten.

Karreta marka suzuki ho númeru matríkula 230 hosi F-FDTL, hetan asidente iha área prizaun Bekora, suku Kamea, Postu Administrativu Kristu Rei, Munisipiu Dili, iha 03 Outubru tuku 24:29 ne’ebé rezulta kondutór ho inisiál LCS kanek grave.

Karreta Militár ne’e sai hosi Dili atu ba komponente Terestre Baukau, maibé to’o iha área prizaun Becora hetan asidente, no kondutór mesak, hatais kalsa badak.

Polísia Tránzitu Munisipiu Dili ho Polísia Militár (PM) to’o kedan iha fatin akontesimentu, hodi rekolla dadus  atu bele fasilita prosesu investigasaun.

Jornalista: Vito Salvadór