Hatutan.com, (27 Outubru 2021), Dili—Zebra FC susesu rekolla vitória dahuluk iha Liga Futeból Timor-Leste (LFTL) segunda divizaun époka 2021, hafóin halakon adversáriu As Marca iha terseiru jogu.

Jogadór Zebra FC ho As Marca hada’u-malu bola. Foto/LFTL.

Vitória ne’e halo Zebra FC lori fila pontu tolu hodi muda nia pozisaun iha tabela klasifikasaun grupu A hodi sa’e ba médiu ka terseira klasifikasaun ho pontu haat no bola pozitivu ida.

Notísia iha Relasaun:Kablaki FC Lakon Oportunidade atu Hakat ba Primeira Divizaun

Armada kulu gisa hosi munisipiu Baucau ne’e susesu halakon nia adversáriu ho golu lais ne’ebé avansadu José Campos marka iha deit segundus balun nia laran hafóin arbitu hu apitu sinal jogu hahu.

Adeptu lubuk ne’ebé iha kampu demokrasia sai sasin ba Zebra FC nia vitória ne’e, bainhira José Campos marka uluk golu ida iha segundu 26, hodi lori Zebra FC lidera uluk durante minutu hitu nia laran molok As Marca FC halo impata.

Golu ne’e lori motivasaun ba jogadór hosi ekipa Zebra FC no fó kedan presaun ba ekipa As Marca. Maske nune’e As Marca nafatin hatudu jogu hodi buka oportunidade atu bele halo impata ba golu ne’ebé sira sofre.

Tama ba minutu 8, As Marca hetan oportunidade liu hosi bola kantu, jogadór Alvaro Kefi ne’ebé hola inisiativa hodi suta kantu obrigadu tenke simu uluk kartaun kinur tanba hasai bandeira iha kantu no latan ba rai.

Hafóin simu kartaun, Alvaro Kefi halo kedan sutu ba bola kantu no rezulta hands ball iha área Zebra FC hosi jogadór Janiel Fernandes.

As Marca aproveita oportunidade ne’e hodi marka golu iha minutu 9 liu hosi penalidade. Alvaro Kefi susesu ezekuta nia servisu ne’e hodi muda skore ba 1:1.

Golu ne’e lori hikas ‘fiar an’ ba ekipa As Marca hodi hadi’a jogu no halo atake ba iha Zebra FC. Ekipa rua nafatin halo kontra atake ba malu hodi aproveita oportunidade ne’ebé iha atu marka golu hodi asegura vitória iha jogu loraik ne’e.

Atu bele konkista vitória iha primeira parte Zebra FC halo substituisaun ba nia jogadór iha liña médiu hodi hasai Felipe Oliveira no hatama Heriberto Guterres.

Zebra FC kontinua halo substituisaun ba nia jogadór iha liña avansadu hodi hasai Napoleão Soares no hatama Rodolfó belo.

Tama ba tempu adisionál, Zebra FC halo atake barak ba iha liña tanba jogadór José Pui hosi As Marca hetan aleiza.

Atu asegura kondisaun ne’e, As Marca hatama fali avansadu Ezequiel da Cruz hodi troka José Pui. To’o  jogu primeira parte remata, ekipa laiha ida mak superiór tanba ne’e tenke fahe pontu ho rezultadu 1:1.

Zebra FC halo mudansa tátika iha segunda parte hodi halo atake ba iha área As Marca. Liu hosi kombinasaun jogu entre jogadór sira iha liña klaran lori duni rezultadu di’ak ba iha Zebra FC.

Tama ba minutu 53 aproveita bola kantu ne’ebé iha kapitaun ekipa  Camilo Pereira marka golu ida liu hosi bola ulun hodi muda skore ba 2:1.

Tama ba minutu 56 mosu dezintendimentu iha kampu laran tanba árbitu anula golu hosi As Marca tanba konsidera bola falta uluk molok jogadór David Mendonça marka golu.

Árbitu konsege rezolve no fó kartaun me’an ba Asistente treinadór  Zebra FC Alberto Ribeiro tanba halai tama ba kampu laran hodi halo protesta.

Liu tiha minutu balun, ekipa rua nafatin halo esfórsu atu bele konkista vitória, jogadór Zebra FC Leonel Gama simu kartaun kinur hafóin halo falta hasoru jogadór  As Marca.

Atu duni atrazu ne’ebé iha As Marca halo substituisaun ba nia jogadór hodi hasai João dos Reis no hatama Elisio de Deus.

Jogu sei la’o hela, As Marca kontinua halo substituisaun ba nia jogadór hodi hasai avansadu Ivan Araújo no hatama Teofilo Barros.

Parte ekipa Zebra FC mós kontinua halo substituisaun ba nia jogadór ne’ebé aleiza. Dada sai kapitaun ekipa Camilo Pereira no hatama Leonito dos Santos ho intensaun bele asegura vitória ne’ebé iha.

Ekipa rua hasae tensi jogu hodi halo kontra atake ba malu no ikus mai jogadór Janiel Fernandes tenke simu kartaun kinur tanba halo protesta hasoru desizaun árbitu ne’ebé deside bola falta hodi fó oportunidade ba As Marca.

Aproveita oportunidade ne’ebé iha jogadór David Mendonça lansa kedan ameasa ida liu hosi bola falta ne’e maibé baliza Zebra FC sei bele antesipa ho di’ak.

Iha tempu adisionál segunda parte nian, iha minutu 90+1 jogadór Zebra FC Deonicio da Silva lansa tán golu ida hodi muda skore ba 3:1.

Hafoin  golu, treinadór hola inisiativa hodi troka kedan Deonicio da Silva no hatama defeza Lucio Fóni. To’o árbitu hú apitu ikus laiha tan golu ruma no situasaun ne’e lori vitória ba Zenbra FC.

Hafóin jogu treinadór Zebra FC, Rogério Mok hateten vitória ne’e atu hatudu ba públiku katak klube ne’e ninia estatístika iha kada jogu sa’e tuir ho  preparasaun no treinu ne’ebé iha.

Nune’e mós treinadór As Marca, Edwin Belo simu derrota ne’ebé iha, maibé la satisfás ho desizaun árbitu hodi anula golu ne’ebé nia ekipa marka ho razaun bola falta.

Insatisfasaun ne’e tanba, tuir nia bola golu tiha mak árbitru fóin foti desizaun, ida ne’e konsidera árbitu falla totál iha nia lideransa no obriga ekipa tenke derrota.

“Ami sei la halo rekursu liu hosi karta ruma, maibé sira mak tenke sente an atu hadi’a de’it,” nia hateten.

Jornalista: Vito Salvadór