Hatutan.com, (26 Outubru 2021), Díli—Hafoin derrota kontra Atletico Ultramar iha terseiru jogu grupu B segunda divizaun époka ne’e, Kablaki FC laiha tan oportunidade atu hakat ba primeira divizaun tuir espetativas ne’ebé iha, maske sei iha tán jogu rua kontra Emanuel FC no Nagarjo FC.

Jogu entre Atletico Ultramar ho Kablaki FC iha terseiru jogu grupu B segunda divizaun époka 2021, Tersa (26/10/21). Foto/LFTL.

Treinadór Kablaki FC, João Fernandes hateten jogu ohin ne’e, ekipa enfrenta difikuldade boot iha defeza sentrál tanba ekipa adversáriu aproveita oportunidade hodi halo golu. 

Notísia iha Relasaun:Academica FC iha Esperansa Hakat ba Primeira Divizaun

“Ami nia jogu iha klaran di’ak maibé falla iha liña defeza tanba ne’e Atletico Ultramar aproveita oportunidade ne’e hodi halo golu,” João Fernandes, hateten.

Maski nune’e, ekipa promete  sei esforsu hodi enfrenta jogu rua tuir-mai no garante vitória hanesan buka’e atu enfrenta hikas jogu iha époka tuir-mai.

Nune’e mós treinadór Moises da Silva, hateten vitória kontra Kablaki FC la garante pozisaun Atletico Ultramar iha klasifikasaun grupu B tanba ne’e sei halo esforsu hotu atu bele garante vitória iha jogu tuir- mai.

“Ha’u dehan ba jogadór sira, jogu hotu importante tanba ne’e tenke treinu no respeita nafatin ekipa adversáriu-sira,” nia haateten.

Teknikamente iha ona estratejia espesiál atu hasoru Santa Cruz FC no garante vitória nu’udár meius ida atu hakat ba primeira divizaun iha tinan oin.

Jogu entre ekipa Atletico Ultramar no Kablaki FC hala’o iha kampu demokrasia no jogu foin hahú iha minutu uluk Kablaki FC iha liu oportunidade hodi halo jogu husi ain ba ain ne’ebé hatudu iha minutu tolu uluk, Kablaki FC lansa ona atake ba área Atletico Ultramar hodi rezulta bola katu dalarua tutuir-malu.

Atletico Ultramar ho instrusaun husi treinadór hahú hetan sira nia ritmu maibé Kablaki FC la fó oportunidade hodi nafatin halo presaun ho ritmu jogu ne’ebé iha.

Kablaki FC hatudu duni nia superioridade iha jogu ne’e hodi lidera uluk iha minutu 18 liu husi jogadór Juviano dos Santos.

Hafoin golu Kablaki FC halo kedan substituisaun ba nia jogadór hodi hasai Jaime Gusmão no hatama Pedro da Cruz.

Atletico Ultramar halo esforsu hodi respode kedan golu ida liu hosi jogadór  Albertinho Ribeiro iha minutu 21. Situasaun ne’e origa skore iha tabela nakfilak ba 1:1.

Hafoin golu, Atletico Ultramar nafatin fó presaun ba Kablaki FC liu husi bola falta no kantu maibé esforsu hirak ne’e, seidauk iha rezultadu tanba Kablaki FC sei nafatin hatudu disiplina liu husi liña jogadór iha parte médiu no defeza.

Ekipa rua idaidak mantein nia ritmu jogu hodi buka oportunidade, maibé laiha ida mak hatama golu to’o primeira parte termina tanba ne’e skore 1:1 mantein to árbitu hú apitu sinál intervallu.

Tama ba segunda parte, ekipa Kablaki FC halo kedan substituisaun iha parte liña avansadu hodi hasai hikas Pedro da Cruz no hatama Angelito Oliveira.

Atletico Ultramar hetan oportunidade osan me’an ida iha minutu 49 liu husi avansadu Elvis da Silva ne’ebé mesak de’it ho baliza, maibé falla aproveita oportunidade ne’e hodi marka golu.

Atletico Ultramar halo substituisaun ba nia jogadór hodi hasai Lesi Romário Atok no hatama Arsénio Amaral ho intensaun bele haforsa lina avansadu.

Kablaki FC mós nafatin halo substituisaun ba nia jogadór ne’ebé sofre aleiza hodi hasai  Nelson Castro no hatama Pedro Fernandes hodi hadi’a hikas liña kotuk hodi asegura ekipa husi derrota.

Aproveita oportunidade ne’ebé iha, Atletico Ultramar halo atake ba iha ekipa Kablaki FC no rezulta segundu golu ne’ebé marka husi jogadór Jaserlito de Jesus iha minutu 71 hodi muda skore ba 2:1.

Golu husi Atletico Ultramar ne’e lori kedan presaun ba iha Kablaki FC no obriga Kablaki FC tenke halo esforsu hodi kontrola sira nia liña hodi asegura atu Atletico Ultramar labele aumenta tan golu.

Jogu sei la’o no guarda rede Atletico Ultramar sofre Aleiza tanba ne’e obriga treinadór tenke halo substituisaun hodi hatama Tito Belo no hasai Cesar de Jesus.

Atu asegura vitória ne’ebé iha Atletico Ultramar halo substituisaun ba jogadór hodi hasai Jaserlito de Jesus no hatama Manuel Oliveira atu bele halo jogu ida defensivu ho defeza lima.

Parte Kablaki FC nafatin halo esforsu ho substituisaun hodi aumenta avansadu Eduardo Costa no hasai Domingos Nunes, Kablaki FC nia substituisaun ne’e lori influensia boot tanba halo kedan ameasa dala rua tutuir-malu.

Atletico Ultramar kontinua asegura nia vitória hodi hasai avansadu Albertinho Ribeiro no hatama defeza Noel dos Santos. Atletico Ultramar nafatin halo substituisaun hodi hasai Florindo Soares no hatama Octavio Ximenes.

Tama ba extra time minutu tolu jogadór Atletico Ultramar obrigadu tenke simu kartaun me’an tanba halo falta ne’ebé konsidera lori risku ba jogadór Kablaki FC.

To tempu termina la iha tan golu ruma no Atletico Ultramar lori fila vitória ne’e hodi kudeta hikas grupu B ho pontus hitu.

Jornalista: Vito Salvadór