Hatutan.com, (12 Outubru 2021), Díli–Jogu abertura Liga Timor Leste  segunda ne’ebé hala’o iha Estádiu Munisipál Díli,  tersa (12/10/2021), entre Porto Taibesi FC  ho Zebra FC ho rezultadu Porto Taibesi manan Zebra 1-0.

Notísia iha Releasaun : Maske Enfrenta Sasadik, Liga Timor Leste Avansa ba Abertura

Porto Taibesi FC. Foto LFTL/Abilio Gonçalves

Durante lala’ok jogu, ekipa rua hatudu jogu tuir espíritu fair play. Maske sira tenke ataka malu no hadau malu bola tuir ida-idak nia tátika no  téknika iha kampu laran.

Adeptu sira entre ekipa rua ho entuziazmu asiste jogu ho haklalak yel..yel..yel hodi fó suporta ba sira-nia jogadór sira iha kampu laran.

Advertisement

Kapitaun Porto Taibesi, Eusébio Almeida, aproveita oportunidade lansa suta maka’as ba  no ba  guarda rede Zebra FC liu husi kantu, maibé defeza husi Zebra, Leonel Gama konsege antesipa no salva bola refere.

Ritmu jogu iha kampu laran komesa hatudu dinámika no ekipa rua nia jogadór hatudu sira-nia ambisaun atu bele prodús golu hodi lansa mós ataka ba malu.

Haku’ur ba minutu 17 jogadór Porto Taibesi, Jardel Piedade konsege prodús golu ida hodi oferese ba sira-nia adeptu, maibé árbitru hiit bandeira sinál bola offside no golu refere inválidu.

 Iha minutu 19 Zebra halo mudansa ba táktika hodi troka jogadór, Angelp Correia (sai) no hatama Vasco de Almeida. Ho substituisaun ne’ebé iha halo jogu nia tensaun sa’e no Zebra buka oportunidade atu bele responde atake ne’ebé iha.

 Liu deit minutu balun Zebra lansa kedas amiasa liuhusi jogador Estevão Soares, maibe baliza konsege antisipa no salva bola.

Advertisement

Jogadór Lazio Piedade ho nia kolega sira hosi Porto Taibesi la hela ho nonook. Sira mós lansa atake maka’as hasoru jogadór Zebra, maski nune’e parte rua la konsege prodús golu to’o de’it minutu 45 jogu primeira parte nian termina.

Lina jogador husi parte rua ididak mantein nia ritmu no kuaze iha kontra atake ne’ebé parte rua lansa ba malu maibe seidauk iha golu ne’ebé produs husi parte rua too minutu 45 termina.

Tama ba segunda parte iha minutu 45+1, Zebra halo substituisaun ba daruak Roy Al-fathklu sai no Camilo Pereira tama. Substituisaun ne’e la hatudu sinál di’ak ba Zebra tamba klube rua nafatin mai ho ritmu jogu atu hanesan de’it, atake no defensiva metin.

Zebra FC. Foto LFTL/Abilio Gonçalves

Atu konkista vitória iha jogu ne’e iha minute lima nulu (50) Zebra halo mudansa ba táktika ho substituisaun ba nia jogadór hodi dada sai hikas Vasco de Almeida no Lucio Foni. Maibé laiha mudansa ne’ebé signifikativu no situasaun mantein.

Hafoin liu tiha minute balun iha 53 mai leten jogu nia tensi sae liutan parte rua lansa kontra atake ne’ebé obriga baliza rua tenke halo esforsu extraordinariu hodi salva bola.

Porto Taibessi hetan oportunidade barak liu husi suta kantu, maibé seidauk hatudu rezultadu no Zebra nafatin mantein ho nia ritmu no lansa kontra atake maibé la hatudu mós rezultadu hodi muda eskor tuir espetativa ne’ebé iha.

Advertisement

Tama ba minutu 57 Portu Taibesi halo substituisaun dahuluk hodi dada sai Jardel Piedade no hatama Romer Martins maibé nafatin la fó impaktu positivu ba ekipa.

Haree ba kondisaun fíziku jogadór ne’ebé monu iha minutu 72 obriga Zebra  halo substituisaun ba datoluk hodi hasai Ireneu Correia no hatama Rodolfo Belo ho intensaun bele halo presaun barak liu ba iha Porto Taibesi maibé táktika ne’e seidauk iha rezultadu.

Portu kontinua ho substituisaun daruak iha minutu 76 hodi dada-sai João Martins no hatama João Pereira no kontinua iha minutu 81 hasai Jeronimo Freitas (hasai) no hatama Marcelino  atu nune’e bele iha avansadu ne’ebé forte maibé jogu nafatin.

Iha minutu 89, Portu Taibesi halo substituisaun ikus hodi hasai kapitaun ekipa Eusebio Almeida no hatama Thomas Elo. Husi substituisaun ne’e lori vitória ba ekipa Portu Taibesi tamba iha minute 90+1 jogadór Januário Pinto konsege aproveita bola kantu ne’ebé hit husi João Pereira hodi muda eskore ba 1-0 no lori vitória ba Portu Taibessi.

Treinadór Portu Taibesi, José Gomes hateten jogu abertura ba segundu divizaun loraik ne’e kapás tamba ekipa rua halo jogu ida-diak no furak ba adeptu sira.

Advertisement

“Ha’u nia jogadór sira iha fallansu iha parte liña-klaran tamba ne’e maka adversáriu sira mós hatene aproveita no ikus mai sira halo kontra atake mai ami. Ba oin ami sei hadi’a ida-ne’e atu lao di’ak liután,” José Pereira hateten ba jornalista sira hafoin jogu termina.

Iha parte seluk treinadór Zebra, Rogério Mog sente orgullu ho nia jogadór sira tanba maske mesak foun no kuaze seidauk iha esperiénsia iha joga liga maibé mantein jogu ho ritmu kapás.

“Ami sei halo avaliasaun hodi enfrenta jogu sira tuir, golu ohin hanesan dezastre ida ba ami tamba laiha konsentrasaun ne’ebé di’ak husi jogadór sira,” Rogério haktuir. (bit)

Advertisement