Hatutan.com, (29 Outubru 2021), Díli-Ekipa Fiskalizasaun Konjunta kompostu hosi Polísia Nasionál Timor-Leste (PNTL), liuhosi Seguransa Nasionál Rodoviária, Komisaun Anti-Korrupsaun (CAC), Diresaun Nasionál Transportes Terrestre (DNTT), ho Komisaun Funsaun Públika (CFP) deteta funsionáriu balu la obedese (dezobediénsia) ba xamada hosi ekipa sira, tanba sei utiliza hela karreta Estadu viajen ba munisípiu.

Notísia iha Relasaun : Komunidade Tenke ‘Kesar’ Funsionáriu Utiliza Karreta Estadu iha Finadu

Ekipa Fiskalizasaun Konjunta halo inspesaun ba ministeriu sira hodi kontrola karreta Estadu labele halo viajen iha loron Finadu. Foto/Hatutan.com

Iha loron 28 fulan-Outubru 2021, ekipa fiskalizasaun konjunta hasai ona karta ba ekipa responsavel lojístika sira iha instituisaun Estadu nian, atu kontrola karreta sira labele sai hodi hala’o viajen ba munisípiu, maibé atu estasiona ka para de’it  iha edifísiu durante loron matebian (finadu).

Pontu Fokál CAC, Euclides Vidál Madeira, hateten objetivu prinsipál hosi atividade inspesaun, Sesta loraik (29/10/2021), atu konfirma katak,  ministériu sira ho sekretária estadu sira ne’e, liu-liu responsavel sira, implementa duni xamada ida ne’e ka lae, no liu-liu atu konkretiza xamada ne’ebé maka ekipa sira fó ona.

Realidade bainhira ekipa inspesaun konjunta sira tun ba iha terrenu, nota katak, iha funsionáriu balu, liu-liu hirak ne’ebé asume kargu xefia, la obedese ba xamada refere, tanba sei utiliza hela karreta Estadu hodi hala’o viajen servisu ba munisípiu sira.

“Ami identifika katak iha utilizadór balu, liu-liu sira ne’ebé mak iha kargu xefia, no mós ho diresaun, iha balu mak ladún koopera di’ak ho ita-nia responsavel lojístika sira iha ministériu ne’e. Entaun, ami ohin fó atensaun ba iha responsavel sira katak, sé enkuantu sira lakohi koopera ba xamada ne’ebé ita fó, ita boot sira iha obrigasaun tenke informa ba iha ekipa konjuntu ne’ebé maka la’o hamutuk,”  Euclides Vidál Madeira, hateten ba jornalista sira, durante halo inspesaun ba viatura Estadu nian iha Ministériu Finansas (MF), Ai-tarak Laran, Díli.

Atividade inspesaun ne’e, ekipa konjunta sira sei halo ba liña ministériu sira no sekretáriu estadu sira, inklui ba to’o iha munisípiu sira hotu, ho nia alvu ne’ebé taka ba públiku, tanba iha segredu balu hosi parte ekipa inspesaun konjunta sira nian.

Intensaun hosi atividade inspesaun ne’e, atu halo vizita ne’e surpreza hodi funsionáriu sira bele fó atensaun ba iha xamada ne’ebé antes ne’e ekipa anunsia ka submete ona ministériu sira.

Ba funsionáriu sira ne’ebé la kumpre ba xamada refere, maka ekipa sei aplika sansaun  administrativu, sansaun disiplinár no kriminaliza.

“Ami sei rekolla fila-fali utilizadór sira ne’ebé mak kuandu la kumpre ba xamada ida ne’ebé mak iha, ne’e oras ida iha ne’ebá, horiseik ami temi ona. Ida-ne’e iha tolu, ne’e ita la diskute kona-bá nia sansaun,” Euclides Vidál Madeira esplika.

Iha períodu loron boot sira, ekipa konjunta sira sempre hamutuk hodi mak halo inspesaun. Maibé, iha loron seluk ne’ebé la halo parte nu’udár loron boot, PNTL sira halo hela servisu kona-bá operasaun nian nafatin la’o hela.

Bainhira PNTL, liuhosi unidade tránzitu sira hetan infrasaun ruma iha terrenu ne’ebé komete hosi infratór sira, ekipa sira sempre iha kontaktu ba malu iha ekipa fiskalizasaun konjunta.

Observasaun Hatutan.com nian iha terrenu nota, ekipa konjunta sira ne’e, hahú halo uluk inspesaun ba iha Ministériu Agrikultura no Peska (MAP), ho totál karreta Estadu nian hamutuk 142 mak estasiona hotu hela iha ministériu, iha Comoro.

Inspesaun ba-daruak nian, ekipa sira hala’o iha Ministériu Finansas (MF), ho totál karreta Estadu hamutuk 143, maibé iha karreta balu mak kondisaun aat ona.

To’o iha Ministériu Administrasaun Estatál (MAE), eziste karreta Estadu sira ho totál karreta 96, maibé la sura ho sira ne’ebé destakadu iha munisípiu sira.

“Karreta Toyota ho númeru matrikula 05.926, mak sei hala’o viajen ba Munisípiu Liquiça. Enkuantu, karreta Toyota, ho xapa matrikula 05.307, mak sei hala’o viajen servisu ho diresaun Díli ba Baukau,” informa ofisiál lojístika MAE nian ida ba Pontu fokál CAC, Euclides Vidál Madeira iha Edifísiu MAE.

Bainhira ekipa inspesaun sira konjunta fali ba iha Ministériu Edukasaun, Juventude no Desportu (MEJD), nota katak, Xefe lojístika sira ministériu ne’e nian, balu mak fila hotu ona ba uma, maizumenus iha tuku 16:54, maske oras servisu seidauk to’o fila ba uma.

“Iha karreta ida ho matrikula 05.298 mak halo viajen hosi Díli ba Suai, ida seluk ho númeru matrikula  04.438, viajen hosi Díli ba Liquiça, durante loron 26 to’o 30 Outubru 2021. Karreta tolu ba Munisípiu Ainaro;  ida ho plat 05.286 sai hosi Díli ba Ainaro, no plat 04.887, ida ho plat 04.684. Karreta ho plat 06.991 halo viajen ba Bobonaro, hodi halo atividade vizita projetu eskola iha Malibaka,” informa funsionáriu ida ba ekipa inspesaun konjunta sira iha edifísiu MEJD, Vila-Verde, Díli.

Jornalista: Rogério Pereira Cárceres