Hatutan.com, (29 Outubru 2021), Díli—Porto Taibesse FC no Academica FC obrigadu tenke fahe pontu iha terseiru jogu hafoin ekipa rua falla rekolla vitória iha jogu kontinuasaun grupu A segunda divizaun ne’ebé hala’o iha estádiu munisipál Díli, Sesta (29/10/21).

Ekipa rua hatudu jogu ida atrativu maski iha fallansu balun ne’ebé obriga ekipa rua tenke halo esforsu hodi asegura pontu ida liu hosi impata 4:4.

Emanuel FC Konkista Vitória Kontra Lica-Lica Lemorai FC

Adeptu Porto Taibesse FC, animadu tebes. Foto/LFTL.

Jogu primeira parte hahú Porto Taibesse FC no Academica FC halo jogu ida atrativu liu hosi disiplina jogu  hodi hadau malu oportunidade atu se mak lidera uluk iha tabela skore.

Jogu foin hahú minutu 2 de’it Porto Taibesse FC halo ona ameasa ba iha Academica FC liu hosi jogadór João Pereira maibé baliza Academica FC Mariano de Assunção sei bele antesipa bola ho di’ak.

Ekipa rua nafatin halo kontra atake ba malu, tama ba minutu Academica FC halo substituisaun ba jogadór Felipe Ling ne’ebé sofre aleza no hatama hikas defeza Ezaquiel Moniz.

FC Porto Taibesse nafatin halo atake ba adversáriu Academica FC no iha minutu 15 jogadór Lazio Piedade simu asisténsia hosi Eusevio de Almeida hodi marka golu ida ho ulun no muda skore ba 1:0.

La hakmatek no liu de’it minutu rua kapitaun Academica FC Joel Gaio halo ameasa ida ba baliza Porto Taibesse liu hosi bola falta, maibé oportunidade ne’e seidauk rezulta golu no Porto Taibesse FC nafatin ukun ho rezultadu 1:0.

Academica FC halo golu impata iha minutu 25 liu hosi avansadu Deonizio da Costa ne’ebé konsege aproveita bola ‘muta’ hodi muda skore ba 1:1.

Jogadór Leandro Amaral hosi Academica FC tenke simu kartaun kinur iha minutu tanba halo falta hasoru Lazio Piedade ne’ebé iha oportunidade atu marka golu.

Porto Taibesse FC nafatin fó presaun ba Academica FC no iha minutu 33 jogadór defeza sentrál Porto Taibesse FC lansa golu dook hosi área klaran fatin sentru hodi muda skore ba 2:1.

Ho situasaun ne’e obriga Academica FC tenke halo substituisaun ba baliza hodi hatama Otilio Guteres no hasai Mariano de Assunção.

Substituisaun ne’e lori espiritu mudansa tama iha minutu 38 jogadór Juvinal Boavida hatama kedan segundu golu hodi halo impata ba 2:2.

Hafoin hatama golu Juvinal Boavida simu kedan kartaun kinur tanba halo selebrasaun hodi hiit kamiza ne’e tuir regulamentu jogu labele.

Ekipa Academica FC selebra golu. Foto/LFTL.

Ekipa rua nafatin halo kontra atake ba malu no iha minutu jogadór Porto Taibesse FC Jeronimo Freitas tenke simu kartaun kinur.

Ekipa rua fahe pontus iha primeira parte bainhira árbitu hú apitu sinál jogu primeira parte remata.

Tama ba segunda parte Porto Taibesse FC hola kedan inisiativa hodi halo substituisaun ba sira nia ekipa hodi hasai kapitaun ekipa Eusevio de Almeida no Jeronimo Freitas hodi hatama avansadu Jardel Piedade no Regalio Martins.

Ekipa rua nafatin hatudu disiplina iha jogu hodi apar ho tátika ne’ebé iha hodi buka vitória atu bele asegura billete ida ba primeira divizaun  iha epoka oin.

Academica FC nafatin halo presaun ba iha Porto Taibesse liu hosi jogu ne’ebé no tama ba minutu 63 jogadór Alexandre da Cruz hatama golu ida hodi muda skore ba 3:2.

Porto Taibesse FC la nonook no buka oportunidade hodi bele halo impata no iha minutu 64 jogadór Lazio piedade hatudu nia jogu bonitu hodi fo asisténsia ba João Pereira no aproveita oportunidade ne’e João Pereira marka kedan golu impata no tabela skore nakfilak ba 3:3.

Tensi jogu hahú sa’e no adeptu sira hosi ekipa harame liutan jogu ne’e hodi haklalak fo suporta ba sira nia ekipa favoritu.

Januário Pinto tenke simu kartaun kinur tanba halo protestu ba desizaun arbitu nian. Porto Taibesse FC konsege hadi’a hikas jogu ho ritmu ne’e ne’ebé ikus mai halo atake barak ba iha parte Academica FC no presaun hirak ne’e obriga defeza Academica FC halo falta iha área proividu ne’ebé ikus mai rezulta penalidade.

Jogadór Porto Taibesse FC João Pereira ne’ebé hetan oportunidade hodi tiru penalti konsege ezekuta ho di’ak no ikus mai lori Porto Taibesse lidera ho skore 4:3 iha minutu 74.

Academica FC nafatin halo esforsu no iha minutu 78 hetan oportunidade liu hosi bola ‘dua kali sentuhan’ no jogadór Alexandre da Cruz marka golu impata hodi muda skore ba 4:4.

Porto Taibesse FC halo substituisan ba nia jogadór hodi hasai Frederico Sila no hatama Nuncio da Silva. Atu asegura pontu ne’ebé iha Academica FC mós halo substituisaun ba nia jogadór hodi hatama Helder Lopes no hasai Deonisio da Costa. Jogu termina no ekipa rua fahe pontus iha jornada datoluk grupu A.

Kapitaun ekipa Porto Taibesse FC Eusevio Almeida orgullu ho jogadór sira hotu nia esforsu tanba Porto Taibesse FC nia ambisaun ba epoka ne’e hakarak sa’e ba primeira divizaun.

Treinadór Academica FC Lusinho dos Santos konsidera ho rezultadu ne’e Academica FC nafatin lidera grupu A ho pontu hitu. Tanba ne’e sei halo preparasaun di’ak hodi enfrenta jogu tuir-mai kontra Zebra FC.

Jornalista: Vito Salvadór