Hatutan.com (16 Novembru 2021), Díli—Porto Taibesse FC susesu halakon adversáriu Fitun Estudante FC ho skore 3:1 iha jogu ikus grupu A segunda divizaun iha estádiu munisipál DiIi.

Porto Taibesse FC susesu halakon adversáriu Fitun Estudante FC ho skore 3:1. Foto/LFTL.

Ho vitória ne’e lori Porto Taibesse FC okupa segunda klasifikasaun grupu A no hamaluk Academica FC hodi hakat ba primeira divizaun époka oin.

Notísia iha Relasaun:Lalenok United FC “Hanehan” Assalam FC ba Zona Mean

Durante jogu, Porto Taibesse FC iha ambisaun makás atu manan adversáriu Fitun Estudante FC ho golu boot, nune’e bele hetan oportunidade atu hakat ba finál segunda divizaun ne’ebé tuir oráriu sei realiza iha Segunda (07/12/2021).

Ambisaun ne’ebé Porto Taibesse FC iha, konsege realiza duni iha minutu 9 bainhira avansadu João Perreira hatama golu ida, hodi lori Porto Taibesse ukun provizóriu adversáriu Fitun Estudante FC.

Golu ne’e halo ekipa rua nia ritmu sa’e no kada ekipa nafatin mantein ho nia jogu hodi buka atu domina bola liu hosi oportunidade ne’ebé iha.

Kontra atake entre ekipa rua akontese fila-fila iha jogu ne’e, Fitun Estudante FC konsege halo ameasa ba Porto Taibesse FC, maibé seidauk iha rezultadu.

Kada ekipa hosi klube ida-idak sei mantein nia jogu. Jogadór Porto Taibesse FC Januário  Pinto obrigadu tenke simu kartaun kinur hafoin halo falta hasoru avansadu jogadór adversáriu.

Porto Taibesse FC susesu halakon adversáriu Fitun Estudante FC ho skore 3:1. Foto/LFTL.

Oportunidade kmanek monu loos ba Fitun Estudante FC iha minutu 42 liu hosi bola falta iha parte liman loos no Deonizio Lopes ne’ebé hetan fiar hodi ezekuta bola falta ne’e konsege fó asisténsia ba nia maluk João Ximenes, hodi hatama golu liu hosi bola ulun. Golu ne’e lori ekipa rua ba impata 1:1 no tama ba tempu adisionál primeira parte nian Porto Taibesse FC halo substituisaun ba nia jogadór hodi hasai Marcelino Fernandes no hatama Jerico piedade iha minutu 45+1. To’o  jogu primeira parte remata ekipa rua laiha ida mak manan, nune’e obrigadu tenke fahe pontus.

Tama ba segunda parte, ekipa rua laiha ida mak halo substituisaun ba nia jogadór no mantein ho taktika ne’ebé iha, hodi lansa atake ba malu.

Fitun Estudante FC hahú falla iha parte klaran no fizikamente monu tanba maioria jogadór mesak foun no laiha rezisténsia fiziku natón atu hasoru adversáriu, nune’e Porto Taibesse FC kontinua domina bola.

Atu halo balansu ba ekipa adversáriu nia jogu, Fitun Estudante FC halo substituisaun ba nia jogadór hodi hasai Geovanio Gama no hatama Giovanio Freitas iha minutu 50.

Atu labele falla iha taktika, Porto Taibesse FC kontinua halo substituisaun hodi hasai Romer Martins no hatama avansadu Nevio Almeida minutu 55.

Fitun Estudante FC kontinua halo esforsu atu sai hosi presaun no halo substituisaun hodi hasai João Ximenes no Celestino Leite iha minutu 61.

Porto Taibesse FC kontinua halo esforsu atu hatama golu hodi hadau tikete ida ba finál ho motivu ne’e Porto Taibesse FC kontinua halo substituisaun hodi hasai Jardel Piedade no hatama Ferderico Silla.

Atu halo defeza hodi asegura derrota Fitun Estudante FC halo tán substituisaun hodi hasai Albeto Martinho no hatama Bernadino Vaz iha minutu 70.

Substituisaun ne’e la lori mudansa no tama ba minutu 72 Porto Taibesse FC liu hosi jogadór Nelvio Almeida hatama tán golu ida hodi muda skore ba 2:1.

Hafoin golu ne’e, jogadór Porto Taibesse João Martins simu kartaun kinur hafoin halo falta hasoru jogadór Fitun Estudante FC iha liña klaran.

Haree ba atrazu ne’ebé iha, obriga Fitun Estudante FC tenke halo substituisaun ba nia ekipa no treinadór hola risku, hodi halo substituisaun ba jogadór rua dala ida hodi hasai Deonizio Lopes no Geovanio Gama no hatama Pedro Pires no Agustinho Soares iha minutu 85.

Substituisaun ne’e laiha mudansa signifikativu no Fitun Estudante FC kontinua hela iha risku no jogadór Fitun Estudante Jenito Freitas, tenke simu kartaun kinur. Tempu normál remata no árbitu deside fó tempu extra minutu 5.

Porto Taibesse FC aproveita ho máximu tempu adisionál ne’e hodi marka tán golu ida iha minutu 90+1 liu hosi jogadór Nelvio Almeida ne’ebé aproveita bola barullu hodi lansa golu datoluk ba nia ekipa.

Hafoin golu ne’e Nelvio Almeida simu kartaun kinur tanba hasai kamiza hodi selebra nia golu refere. Molok jogu termina, kapitaun Porto Taibesse Esevio Almeida tenke simu kartaun kinur hafoin protestu hasoru arbitu.

Hafoin golu, kapitaun Fitun Estudante FC Bernadino Vaz espresa sentimentu kontente tanba bele halo impata iha primeira parte, maibé tenke sofre derrota tanba monu iha parte fiziku nune’e ekipa adversáriu aproveita hodi hatama golu.

Parte seluk kapitaun Porto Taibesse FC, Esevio Almeida mós kontente tanba bele rekolla pontu tolu maske falla hakat ba finál segunda divizaun.

Jornalista: Vito Salvadór