Hatutan.com, (30 Outubru 2021), Dili—Bispu Dioseze Baucau, Dom Basílio do Nascimento husik-iis (mate) iha Hospitál Nasionál Guido Valadares (HNGV), tanba sofre moras fuan.

Aviaun transporta hela Bispu Dioseze Baucau, Dom Basílio do Nascimento, hosi Airoportu Kay Rala Xanana Gusmao Suai mai Dili. Foto/Facebook.

Padre João Guterres ne’ebé foin simu ordenasaun iha 28 Outubru, ba Hatutan.com via telefónika konta-tuir kronolojia katak, Bispu Dom Basílio do Nascimento sai hosi Dili ba liu Zumalai iha loron 27 Outubru, hodi partisipa iha Misa Ordenasaun Padre foun na’in-rua, mak hanesan Padre João Guterres no mós Padre Indra do Nascimento Tey Seran.

“Horkalan iha uma Kamanasa, bainhira Jantar hotu ho Padre foun-sira hamutuk ho família sira, iha tuku 20:30 otl, Ita-nia Amu Bispu sente rai manas, no sai ba liur hodi hetan anin fresku. Iha momentu ne’e kedan hetan atakasaun fuan,” Padre João Guterres, haktuir.

Ho akontesimentu ne’e Padre sira hamutuk ho família konsege transposta Amu Bispu ba Hospitál Referál Suai, maibé kondisaun grave no parte Hospital Referál kontaktu mai Dili, atu husu hela aviaun bele transporta lalais ba Dili maibé atraza oitoan to’o fali dadeer tuku 10:00 mak aviaun to’o Suai.

“Aviaun foin mak konsege to’o iha Suai iha dadeer tuku 10:00 dadeer no tula duni ba Dili maibé la konsege salva no iis-kotu  iha tuku 12:30 otl,” Padre foun ne’e haktuir tan.

Bainhira Hatutan.com konfirma via telefónika ho diretór Hospitál Referál Suai, José Moniz Ferreira, hodi husu kona-bá atendimentu ba Bispu Dom Basílio durante oras balun iha Ospitál Referál ne’e, esplika, Dom Basílio to’o iha Hospitál iha tuku 20:30 otl ho kondisaun dezmaia no muta makás.

“Ami lori lalais ba halo atendimentu iha sala emerjénsia. Tanba nia istória sofre hela moras fuan, no tau kadeli iha fuan. Tanba ne’e, ita deskonfia katak, iha problema sériu ho fuan. Ita halo ezame Electrocardiograma (EKG) ho nia rezultadu Taquicardia ventricular ka fuan fekit makas ka lalais. ikus-mai ami halo diagnóstika moras fuan ka infarto cardiaco,” José Moniz Ferreira, esplika.

Atendimentu ikus ba Bispu Dioseze Baucau, Dom Basílio do Nascimento, iha HNGV. Foto/Facebook.

Oras ne’e daudaun mate isin sei iha hela mortuáriu Hospitál nasionál Guido Valadares (HNGV) no tuir planu, mate isin sei lori sai ba tau iha Igreja Katedrál Imaculada da Conceição Dili, durante kalan ida, aban sei misa korpu prezente no misa hotu sei lori ba haloot iha Dioseze Baukau.

“Ita sei lori sai hosi mortuáriu ba iha Katedrál no aban misa hotu mak foin lori ba haloot iha Dioseze Baucau,” Sanseler Arkedioseze Metropolitana Dili, Padre Paulus Maya, hateten ba Hatutan.com iha HNGV, Sábadu (30/10/21).

Parte HNGV, seidauk fó-sai informasaun kona-bá kondisaun ikus hosi Dom Basílio do Nascimento iha atendimentu ikus.

Bispu Dioseze Baucau, Dom Basílio do Nascimento nu’udar Bispu dahuluk iha Dioseze Baukau, ne’ebé harii hosi Papa João Paulo II iha loron 19 Maiu 1997.

Dom Basílio moris iha 14 Juñu 1950 iha Suai, Simu Ordenasaun espiskopál nu’udár Bispu iha 6 Janeiru 1997 hosi Papa João Paulo II. Simu Ordenasaun ba Nai Lulik iha 25 Juñu 1977.

Jornalista: Cipriano Colo