Hatutan.com (07 Novembru 2021), Díli— Nagarjo FC obrigadu tenke fahe pontu ho nia adversáriu Lica-Lica Lemorai FC hafoin impata 1:1 iha kuarta jogu Liga Futebol Timor Leste (LFTL) segunda divizaun époka ne’e.

Nagarjo FC obrigadu tenke fahe pontu ho nia adversáriu Lica-Lica Lemorai FC, Domingu (07/11/21). Foto/LFTL.

Ho rezultadu ne’e, Nagarjo FC la iha tán oportunidade atu halo kudeta ba grupu B no hadau billete ida ba primeira divizaun tinan oin, hodi hamaluk Atletico Ultramar FC iha grupu B tanba rekolla de’it pontu 4 husi jogu haat ne’ebé sira enfrenta.

Notísia iha Relasaun:Emanuel FC ‘Festa’ Golu ho Kablaki FC to’o 7:0

Ekipa rua hahu jogu iha primeira parte ho ambisaun hanesan, maibé Nagarjo FC iha liu esperansa atu manan iha jogu ne’e hodi hadi’a nia klasifikasaun iha tabela grupu B hodi hadau billete ida ba primeira divizaun.

Advertisement

Iha jogu nia laran ekipa rua hatudu sira nia tátika hodi halo jogu husi ain ba ain no hadau oportunidade atu se mak prodús uluk golu.

Ekipa Nagarjo FC nafatin hetan atake husi adversáriu Lica-Lica Lemorai FC maibé la fó ameasa ida signifikativu hodi muda skore iha tabela.

Nagarjo FC halo esforsu hodi tenta atu responde ameasa ne’ebé iha liu husi jogadór Januario Fernandes iha liña klaran hodi hadi’a ritmu no tama ba minutu 16 Nagarjo FC susesu hatama golu dahuluk ba adversáriu liu husi jogadór Bendito Ximenes ne’ebé hetan asisténsia husi Chiquito do Carmo.

Tabela Provizóriu.

Hafoin golu ne’e, jogadór Lica-Lica Lemorai FC hahu halo tranzisaun ba sira nia ritmu jogu hodi nafatin domina bola no halo ameasa barak liután ba iha área Nagarjo FC nian.

Ameasa hirak ne’e obriga jogadór Nagarjo FC Bovio Soares tenke simu kartaun kinur tanba halo falta hasoru Helderico Bareto jogadór Lica-Lica Lemorai FC. To’o jogu primeira remata la iha tán golu ruma nune’e Nagarjo FC lidera provizóriu ho skore 1:0.

Tama ba segunda parte, ekipa rua hahu ho substituisaun ba jogadór no parte Nagarjo FC hasai Flirensio Pinto no hatama Julião Ximenes.

Advertisement

Lica-Lica Lemorai FC halo substituisaun iha liña oin hodi hasai Julito Moniz no hatama Mario Panao.

Substituisaun ne’e lori rezultadu diak tanba Lica-Lica Lemorai FC kuaze domina bola posseision hodi halo ameasa lubuk ba iha Nagarjo FC.

Rezultadu hatudu iha minutu 60 bainhira  defeza Nagarjo FC hamonu  jogadór Lica-Lica Lemorai FC Nelson da Costa iha área grandeal no Miguel Bareto susesu halo ezekusaun ba penalidade ne’e hodi muda skore ba 1:1.

Golu ne’e lori motivasaun foun ba Lica-Lica Lemorai FC hodi nafatin halo ameasa ba nia adversáriu. Udan habokon rai no obriga ekipa rua tenke kontinua joga iha udan laran.

Atu hadi’a liña, Nagarjo FC halo substituisaun ba nia jogadór hodi hasai Januario Fernandes no hatama Pedro Belo.

Advertisement

Liu de’it minutu balun kontinua ho substituisaun ba ekipa Nagarjo FC hodi hasai Ricardo Pereira no hatama  Rique Alves ho intensaun bele muda jogu hodi halo balansu ba atake husi ekipa adversáriu.

Lica-Lica Lemorai FC kontinua ho substituisaun hodi hasai Miguel Mascarenhas no hatama Rosario Lopes.

Hafoin substituisaun ne’e, ekipa Nagarjo FC mós kontinua hodi hasai nia avansadu Chiquito Gama no hatama Jeninho Sanches.

Liu husi substituisaun ne’ebé iha, ekipa rua konsege halo balansu ba jogu no ekipa Nagarjo hahú lansa atake ba iha nia adversáriu.

Jogu nia tensi hahú sa’e iha minutu ikus no obriga jogadór Nagarjo FC Bendito Ximenes no Marco Gusmão tenke simu kartaun kinur molok jogu termina.

Advertisement

Ho rezultadu ne’ebé iha, ekipa rua laiha tán oportunidade atu hadau billete ida hodi ba joga iha primeira divizaun epoka oin.

Jornalista: Vito Salvadór