Hatutan.com (06 Novembru 2021), Díli—Emanuel FC hatudu nia superioridade iha jogu kontinuasaun grupu B, hafóin manan adversáriu Kablaki FC ho naran estimada ‘Armada Ventura’ ho skore 7:0.

Liu hosi armonizasaun jogu iha kada liña Emanuel FC hetan vitória ba datoluk no rekolla pontu tolu importante ne’ebé sai mós hanesan pontu determinante atu deside sira nia destinu ba primeira divizaun iha epoka oin.

Notísia iha Relasaun:As Marca FC Rekolla Vitória Dahuluk iha Grupu A

Atu hamaluk Atletico Ultramar FC ba Primeira divizaun, Emanuel FC tenke liu ezame boot ida bainhira hasoru adversáriu iha jornada ikus grupu B mak Atletico Ultramar rasik.

Iha jogu, ekipa rua hahú hodi halo kedan atake ba malu liu hosi tatika ne’ebé iha. Ekipa Emanuel FC halo esfórsu makas atu manan iha jogu ne’e, hodi bele hetan oportunidade atu hakat ba primeira divizaun tinan oin.

Jogu ne’e tensi hahú sa’e maibé ekipa rua sempre halo falta ba malu hodi hamate bola. Udan makas iha minutu 25 ba leten halo ekipa rua obrigadu tenke halo jogu tuir kondisaun estádiu ne’ebé iha.

Tama ba minutu 31, ekipa Emanuel FC hetan uluk oportunidade hodi marka golu ida ba rede Kablaki FC liu hosi jogadór Carolino Correia ne’ebé hetan asisténsia hosi Zinedine Lopes.

Hafóin golu ne’e, ekipa Kablaki FC koko hadi’a liña hodi buka atu halo impata, maibé seidauk iha biban tanba Emanuel FC la fó oportunidade.

Emanuel FC hatudu nia superioridade iha jogu kontinuasaun grupu B, kontra Kablaki FC ho skore 7:0. Foto/LFTL.

Kablaki FC Nafatin halo esfórsu ho meiu ne’ebé iha, hodi halo atake atu bele hatama golu liu hosi avansadu Angelito Oliveira, maibé jogadór Emanuel FC halo falta no hosi erru ne’e obriga jogadór Emanuel FC Bernadino Sena simu kartaun kinur no jogu nia tensi hahú sa’e ho ritmu ekipa rua nian.

Emanuel FC kontinua ukun iha tabela skore liu hosi segundu golu ne’ebé marka hosi kapitaun ekipa Zeferino Nheu iha minutu 40.

Hafóin golu ne’e, ekipa rua tenke halo esforsu hodi suta bola iha kampu laran kauza hosi be nalihun iha kampu laran.

Ekipa rua labele halo pasajen badak tanba bola belit iha bee leten nune’e obriga jogadór sira tenke halo jogu ho bola as ka Long shoot.

Jogadór Acoli Maia hosi Kablaki FC obrigadu tenke simu kartaun kinur tanba halo falta hasoru jogadór avansadu hosi ekipa Emanuel FC. To’o primeira parte remata laiha tan golu ruma hodi muda skore iha tabela.

Tama ba segunda parte ekipa Kablaki FC hola inisiativa hodi halo kedan substituisaun ba nia jogadór hodi hasai Oligario Nunes no hatama Horasio Martins.

Emanuel FC nafatin halo esfórsu hodi buka atu aumenta golu no esfórsu ne’e iha duni rezultadu tanba avansadu Filomenio Savio hatama tan golu ida hodi muda skore ba 3:0 iha minutu 56.

Ekipa Emanuel FC hatudu nia superioridade iha jogu loraik ne’e hodi domina jogu no halo pasajen perigu sira ne’ebé lori ameasa ba ekipa Adversáriu.

Tama ba minutu 55, jogadór Emanuel FC Carolino Correia lansa tan golu ida hodi muda skore ba 4:0. Hafóin golu Emanuel FC halo kedan substituisaun ba nia jogadór hodi hasai Zinedine Lopes no hatama Alexandre Moreira.

Liu hosi substituisaun ne’e Emanuel FC domina iha ‘ball possession’ no sempre halo atake ne’ebé iha tendensia atu golu no halo Kablaki FC la sai hosi presaun hodi hadi’a jogu tuir instrusaun hosi treinadór.

Emanuel FC aumenta tan golu ida iha minutu 68 liu hosi jogadór Filomino Savio hodi muda skore ba 5:0.

Emanuel FC kontinua halo substituisaun hodi hasai Jonatas Pereira no hatama Orlando Belo no hosi substituisaun ne’ebé iha halo ekipa Emanuel FC hatama tan golu ida liu hosi jogadór Alexandre Moreira iha minutu 73 hodi muda skore ba 6:0. Hafóin golu halo kedan substituisaun hodi hasai Bernadino Sena no hatama Vivaldo Magno.

Jogu kontinua domina hosi Emanuel FC tanba ne’e Kontinua ho substituisaun hodi hasai Zefrino Nheu no Mario Quintã hodi hatama Kevin Fernandes no Carlos Soares ho intensaun atu asegura vitória ne’ebé iha.

Parte Kablaki FC mós koko hadi’a hikas nia liña hodi hasai Adelino Coelho no hatama David de Assunção.

Liu de’it minutu balun kontinua ho substituisaun hodi hasai Acoli Maia no hatama Eduardo Costa. Hafóin substituisaun ne’e Kablaki FC nafatin sofre golu iha minutu 82 liu hosi bola falta.

Jogadór Emanuel FC Carlos Soares marka golu liu hosi bola falta ne’ebé iha hodi muda skore ba 7:0.

Emanuel FC kontinua domina jogu to’o arbitu hu apitu sinal jogu remata. Ho vitória ne’e lori Emanuel FC mantein iha segunda klasifikasaun grupu B ho pontu 9 no bola pozitivu 8.

Treinadór Kablaki FC João Fernandes la espera atu nia ekipa derrota ho skore ida boot nune’e, maibé iha jogu buat hotu bele akontese.

Iha parte seluk Januário Almeida treinadór hosi Emanuel FC konsidera vitória ida ohin nu’udár resposta ba adeptu sira nia mehi hakarak Emanuel FC joga iha primeira divizaun tinan oin.

Jornalista: Vito Salvadór