Hatutan.com, (10 Novembru 2021), Díli- Tribunal Distritál Díli, Kuarta (10/11/2021), kontinua halo julgamentu ba krime partisipasaun ekonomia no negósiu ne’ebé deskonfia involve eis-Ministru Administrasaun Estatál no Ordenamentu Territorial ho inisiál AG  ho funsionáriu públiku na’in haat, hanesan  arguida ho inisiál RV, arguidu UF,  arguidu AX ho arguidu  DM.

Iha kazu ne’e envolve mós arguida MB nu’udar diretora ba kompañia kontraktor ida ho mós arguidu FM hanesan mós na’in ba kompañia kontraktor ida tan.

Iha julgamentu kontinua ne’e, arguido AG deklara ba Tribunal katak orsamentu ba kontrusaun edifísiu foun Cãmara Munisípiu Baucau no Oecuse iha 2010 fundus mai husi OJE 2010 ne’ebé aloka liu husi MAE, maibé nia parte laiha koñesimentu kona-ba delegasaun kompeténsia hodi asina no halo aprovasaun ba CPV no aprova pedidu pagamentu.

Hafoin rona arguidu AG,  Tribunál adia hikas julgamentu ba loron 1 fulan-Dezembru, tinan ne’e, hodi kontinua rona arguidu sira seluk.

Ministériu Públiku akuza arguido no arguida sira ho  krime Administrasaun Danoza ne’ebé previstu iha artigu 299, 267, 274 husi kódigu penal Timor Leste, relasiona ho konstrusaun edifísiu foun Cãmara Munisípiu Baucau no Oecuse ne’ebé tuir MP katak fó prejuizu ba Estadu ho montante global ba projetu rua ne’e hamutuk $147,024.44.

Audiénsia julgamentu preside husi juiz koletiva Antonia Carmona, Ercilia de Jesus, Albertina Neves, MP reprezenta husi Prokuradora Lidia Soares no arguidu sira hetan asisténsia legal husi Defensor Públiku Fernando no advogadu privadu sira.

Jornalista : Carmelita Isaac