Hatutan.com, (15 Novembru 2021), Dili—Membru Polísia Nasionál Timor-Leste (PNTL), hamutuk na’in 34 ho deviza Sarjentu, iha segunda (15/11/21), hahú partisipa iha Curso Promoçăo Oficial da Inspetór (CPOI), molok komandu halo promosaun ba deviza hanesan ofisiál Inspetór.

Komandante Jerál PNTL, Komisáriu Faustino da Costa, ko’alia iha abertura formasaun ba membru Polísia Nasionál Timor-Leste (PNTL), hamutuk na’in 34 ho deviza Sarjentu, iha Sentru Formasaun Polisia (CFP), Komoro, Segunda (15/11/2021). Foto/Hatutan.com.

Membru na’in 34 ne’e, kompostu hosi feto na’in-haat (4), no mane hamutuk na’in 30, ne’ebé antes ne’e asume ona kargu hanesan Xefe Departamentu, Komandu Unidade sira, nomós balun hanesan Komandante iha Komandu PNTL iha Munisipiu sira.

Notísia iha Relasaun:Koñese Deviza PNTL no Formasaun atu Lidera Eskuadra to’o Komisáriu

Komandante Jerál PNTL, Komisáriu Polísia Faustino da Costa, konsidera kursu ne’e importante ba membru sira, tanba atu hakle’an liután sira nia koñesimentu iha área lideransa no jestaun ba operasaun nian.

Advertisement

Kursu promosaun ba ofisiál no inspetór ne’e, sai fatór importante ba forsa seguransa ida la hanesan ho forsa sira seluk, ne’ebé atu moderniza hodi aposta ba formasaun iha ninia membru sira, sai kualifikadu hosi loron ba loron, hodi serví povu no sosiedade.

“Aula ne’ebé sei hala’o ba ita-boot sira durante semana sanulu nia laran, sei sai mós sasukat ida katak, merese duni ita-boot sira atu bele hetan promosaun, ka sei tama iha kategoria pendente. Tanba atu bele hetan promosaun, hosi kategoria ida ba kategoria sira seluk, tenke kompleta kursu, ikus mai hodi indika katak, kompleta ho valór ida ne’ebé di’ak,” Komandante Jerál PNTL, Komisáriu Faustino da Costa, hateten iha diskuru abertura kursu ba ofisál sira iha Centro Formaçăo Policia (CFP), iha Akademia Komoro.

Membru Polísia Nasionál Timor-Leste (PNTL), hamutuk na’in 34 ho deviza Sarjentu, prepara atu partisipa formasaun iha Sentru Formasaun Polisia (CFP), Komoro, Segunda (15/11/2021). Foto/Hatutan.com.

PNTL nu’udár instituisaun Estadu ida ne’ebé defende legalidade demokrátiku no garantia seguransa ba ema hotu no nia bens, proteje no defende direitu sidadaun nian tuir lei ne’ebé vigora.

Atu haree no valoriza permisaun ida ba PNTL ninian, maka hosi kandidatu na’in 34  ba CPOI nian, sai mós parte ida ba involvimentu feto PNTL iha atividade sira hotu, liu-liu preparasaun ba promosaun hosi kategoria ida ba kategoria sira seluk.

“Ita boot sira ne’ebé ohin loron hamri’ik iha oin, ne’ebé la kleur tán atu partisipa kompletu iha promosaun ba ofisiál inspetór ida-ne’e, presija atu hatene katak, liuhosi prosesu ne’ebé naruk, dezde kedan 2020, ohin ita-boot sira hamri’ik iha oin, maibé mós sei iha ema lubun maka sei hamri’ik nafatin iha ita-boot sira nia kotuk. Loos duni, komandu presija atu fó motivasaun nu’udár dalan ida, oinsá atu bele inspira membru sira bele hala’o kna’ar ho responsábilidade no profisionál liután,” Komisáriu Faustino, hateten.

Komandu PNTL, liuhosi CFP realiza kursu CPOI, tanba esforsu sira hotu mai hosi Segundu Komandante Jerál PNTL, Komisáriu Mateus Fernandes, ne’ebé sai mós hanesan Prezidente ba selesaun rekrutamentu nomós promosaun nian, bazeia ba dekretu lei númeru 16/2009, kona-bá rejime promosaun PNTL.

Advertisement

Iha fatin hanesan, Komandante CFP, Superintendente Xefe, Arquiminio Ramos, hateten promosaun ida-ne’e, nu’udár promosaun estra-ordináriu ne’ebé fó prioridade liu bá membru-sira hanesan eis Komandante Munisípiu, Sesaun no Eskuadra sira ne’ebé la pasa iha ezame promosaun iha 2010 no 2013.

Nune’e, Komandu PNTL hanoin katak, presija fó valorizasaun ba sira nia kontribuisaun ne’ebé sira halo ona iha sira nia karreira tomak, maski sira la passa iha ezame promosaun iha tempu liubá, maibé sira kontribui buat barak ba instituisaun PNTL desde instituisaun ne’e estabelese.

Matéria ne’ebé ko’alia iha kursu ida-ne’e, kona-bá lideransa, jestaun, nomós ho kursu tékniku no operasionál nian, oinsá mak lidera ekipa iha terrenu, oinsá lidera operasaun, no oinsá mak prepara planu operasaun ida ne’ebé di’ak.

Iha módolu jurídiku nian ne’e, sira aprende kona-bá kódigu penál, prosesu penál, atu oinsá mak ajuda sira knaar, hodi ezerse funsaun ho di’ak.

Jornalista: Rogério Pereira Cárceres

Advertisement