Hatutan.com, (17 Novembru 2021), Díli—Hafoin falla iha jogu segunda divizaun Liga Futeból Timor Leste (LFTL) époka ne’e, ekipa Kablaki FC rekoñese no husu deskulpa ba adeptu sira.

Ekipa Nagarjo FC. Foto/LFTL.

Treinadór Kablaki FC, João Fernandes, konfesa katak fatór preparasaun no intelijénsia jogadór nian sai difikuldade boot ba Kablaki FC iha époka ne’e.

Maski iha treinu sempre fó konsellu atu jogadór sira halo tuir tátika no orientasaun treinadór nian, maibé falla no hosi failansu sira ne’e ikus mai sempre simu derrota.

“Ha’u nia ekipa nia preparasaun mínimu no ami nia jogadór kuaze foun, nune’e sira ladún iha kapasidade natón atu bele ezekuta tátika iha terrenu,” Treinadór João Fernandes, hateten.

Treinadór ne’e rekoñese  katak, Kablaki FC iha époka ne’e prestasaun tún tanba ne’e sei hanoin oinsá iha futuru bele hadi’a.

Hosi jogu 5 ne’ebé Kablaki FC enfrenta durante LFTL segunda divizaun iha grupu B, Kablaki FC rekolla de’it pontu ida no sofre golu 17 no hatama de’it golu 4 ba adversáriu sira, nune’e Kablaki FC hela iha zona okos grupu B.

Iha jogu ikus kontra adversáriu Nagarjo FC, Kablaki FC konsege marka uluk golu ida maibé falla atu defende vitória ne’e tanba ikus mai Nagarjo FC manan ho 4:1.

“Ami husu deskulpa ba adeptu sira, ba ema hotu ne’ebé apoiu Kablaki FC,” João Fernandes hateten.

Iha jogu ikus ne’e  ekipa Nagarjo FC no Kablaki FC  hahú jogu ho esperansa mamuk basa ekipa rua laiha ona tarjetu atu avansa ba primeira divizaun.  

Ekipa rua nafatin hatudu atrasaun jogu liu hosi jogadór suplente sira tanba kuaze treinadór sira la hatún jogadór íntimu ho razaun laiha tán tarjetu iha jogu ne’e.

Nagarjo FC no Kablaki FC halo jogu ida balansu no ekipa rua koko halo pasajen bola hosi ain ba ain maske ho de’it jogadór sira ne’ebé antes ne’e hanesan suplente.

Nagajor FC koko halo presaun ba nia adversáriu liu hosi oportunidade ne’ebé iha, maibé Kablaki FC sei bele antisipa ho di’ak.

Ekipa rua mantein ho ritmu jogu no tátika ida-idak nian. Kablaki FC buka atu halo presaun ba ekipa Nagarjo FC liu hosi nia avansadu  Angelito Oliveira, maibé sempre offside hela de’it tanba Nagarjo FC nia jogadór sira liña kotu disiplina hodi marka offside.

Tama ba minutu 29, Kablaki FC hetan oportunidade liu hosi bola falta iha liman loos no jogadór Kablaki FC Acoli Maia ne’ebé foti bola falta konsege fo asisténsia ida ba nia maluk Eduardo Costa, hodi marka golu ida ho bola ulun no muda skore ba 1:0.

Hafoin golu ne’e, Nagarjo FC halo kedan esforsu hodi buka atu halo impata no tama ba minutu 31 avansadu Chiquito do Carmo halo kedan golu ida liu hosi sutu bola livre iha área grandeal laran no golu ne’e muda skore ba 1:1.

Ekipa rua nafatin iha esforsu no kada ekipa halo substituisaun ba nia jogadór. Iha minutu 34 Nagarjo FC hasai Riqui Alves no hatama Florencio Pinto enkuantu tama ba minutu 35 Kablaki FC hasai Horacio Martins sai no hatama Domingos nunes. To’o primeira parte remata ekipa rua nafatin halo impata ba malu.

Tama ba segunda parte Nagarjo FC halo kedan substituisaun ba nia jogadór hodi hasai Tito Marques no hatama Fortunato Ximenes.

Hosi ne’e halo Nagarjo FC hola kedan inisiativa hodi halo kedan atake ba nia adversáriu no rezulta kedan ameasa dala rua tutuir-malu, maibé baliza konsege salva bola.

Jogadór Kablaki FC Angelito Oliveira tenke simu kartaun kinur hafoin halo falta hasoru jogadór Nagarjo FC Pedro Belo.

Nagarjo FC hatama segundu golu liu hosi jogadór Luis Ribeiro  ne’ebé simu asisténsia hosi Mario Neves iha minutu 50.

Liu hosi kombinasaun jogadór ne’ebé iha, ikus mai Nagarjo FC kuaze domina bola no sempre lansa ameasa ba iha Kablaki FC liu hosi nia jogadór avansadu veteranu Chiquito do Carmo.

Kablaki FC hakas an atu halo balansu ba ekipa adversáriu maibé biban laiha no Nagarjo FC nafatin halo atake ne’ebé rezulta terseiru golu liu hosi Chiquito do Carmo.

Atu duni atrazu ne’ebé iha ikus mai Kablaki FC halo substituisaun ba nia jogadór hodi hasai Pedro da Cruz no hatama Domingos Nunes iha minutu 68.

Nagarjo FC kontinua save nia vitória hodi halo  substituisaun ba nia jogadór iha liña avansadu hodi hasai Florencio Pinto no hatama Jeninho Sanches iha minutu 71.  

Atu bele halo mudansa ba iha táktika hodi hadi’a liña Kablaki FC kontinua halo substituisaun hodi hasai Eduardo Costa no hatama Pedro Fernandes iha minutu 74.

Liu de’it minutu ida, Kablaki FC kontinua halo substituisaun hodi hasai Domingos Pires no hatama Francisco da Costa.

Nagarjo FC kontinua halo substituisaun iha minutu 77 hodi hasai avansadu Chiquito do Carmo no hatama médiu Januario Fernandes ho intensaun bele halo jogu di’ak iha liña klaran, nune’e bele domina jogu no hamate ekipa adversáriu nia tátika.

Nagarjo FC mantein nia ritmu no lansa ameasa barak ba nia adversáriu ne’ebé ikus mai jogadór Jeninho Sanches hatama tan golu ida liu hosi bola ulun bainhira aproveita bola kantu no golu ne’e muda skore ba 4:1.  

Tama ba tempu adisionál segunda parte, ekipa rua nafatin hatudu vontade hodi halo atake ba malu maibé to’o árbitu Eufrasio da Costa Silva hu apitu ikus laiha tan golu ruma no Nagarjo FC mak sai manan na’in ba jogu ne’e ho skore 4:1.

Hafoin jogu Treinadór Nagarjo FC sente  orgullu ho vitória ne’e, maibé sente triste tanba Nagarjo FC falla hakat ba primeira divizaun epoka oin.

Hosi jogu lima ne’ebé Nagarjo FC enfrenta, sira rekolla pontus 7 no pozitivu bola 5 no tur iha terseira klasifikasaun grupu B.

Jornalista: Vito Salvadór