Kazu Liborio, Defeza Hatama Ona Rekursu Ba TR

Hatutan.com, (17 Novembru 2021), Díli–Advogadu privadu no Defensor Públiku ne’ebé fó asisténsia ba eis Prezidente Komisaun Funsaun Publika (KFP), Liborio Pereira, hatama ka submete ona rekursu ba Tribunál Rekursu (TR) hodi kontra medida koasaun Tribunál Distritál Dili (TDD) ne’ebé aplika proibisaun ba Auzénsia ka bandu arguidu labele sai ba rai-li’ur.

Notísia iha Relasaun : Tribunál Bandu Liborio Pereira Sai ba Rai-Li’ur

Eis Prezidente KFP, Liborio Pereira, bainhira partisipa iha julgamentu iha TDD, 07 Novembru 2021. Foto/SMNEWS

Konteúdu husi rekursu ne’ebé submete ba  iha loron 10 fulan-Novembru 2021, tuku 10:00 dadeer, husu TR atu haree fali medida koasaun TDD ne’ebé kontra ona prinsípiu kontraditóriu iha Konstituisaun artigu 30 hodi la fó tempu ba arguidu atu ko’alia no hato’o razoens dezlokasaun arguidu nian ba estranjeiru.

Rekursu ne’e Defeza arguidu Liborio Pereira nian husu ba TR atu muda despaixu medida koasaun juiz  ne’ebé konsidera todan ba arguidu, ho nune’e, defeza husu atu aplika fali medida koasaun Termu Identidade Rezidénsia (TIR) ba arguidu. 

“Rekursu ho nu.0077/17 PGGC ho razoens la aseita ho desizaun TDD, tanba arguidu ne’e kolabora ho justisa, obedese ba aktu prosesuál no iha prosesu kaer arguidu iha aeroportu Internasionál Prezidente Nicolau Lobato, Polísia halo manobra hodi justifika arguidu nia aktu hodi hasa’e fali medida koasaun ne’ebé kaman ba todan,” Defensor  Sergio Quintas ba Hatutan.com via telefónika, Kuarta (17/11/2021).

Laiha prazu ba TR atu pronunsia rekursu husi Defensor Públiku ne’e, maibé ida-ne’e kestaun medida koasaun, tanba ne’e fulan ida ka rua TR sei fó desizaun.

Antes ne’e, iha loron 7 fulan-Novembru, TDD liuhusi primeiru interrogatóriu aplika medida koasaun Proibisaun ba Auzénsia ka bandu labele sai ba rai-li’ur ba arguidu Liborio Pereira ba krime partisipasaun ekonómika no negósiu ne’ebé previstu iha artigu 299 ne’ebé deskonfia atu halai sees husi prosesu investigasaun ne’ebé lao hela.

Jornalista : Carmelita Isaac