Hatutan.com, (18 Novembru 2021), Dili—Governu liuhosi Ministériu Defeza (MD), tau ona iha planu asaun anuál, katak, tinan 2022 sei halo tán rekrutamentu ba membru foun FALINTIL Forsa Defeza Timor-Leste (F-FTDL), hamutuk na’in 600.

Ministru Defeza (MD), Filomeno da Paixão de Jesus. Foto/Hatutan.com.

Planu Rekrutamentu ne’e ninia orsamentu tama iha Orsamentu Jerál Estadu (OJE) 2022 ba MD ne’ebé ho montante millaun $36.

Notísia iha Relasaun: 2023, Austrália Oferese tán Ró Patrullamentu Rua ba F-FDTL

“Importante ida mós maka rekrutamentu, Tanba Governu hatán ona atu rekruta ema na’in 600, hola fardamentu, ekipamentu, kilat no monisoens, nune’e  ami sente di’ak,” Ministru Defeza (MD), Filomeno da Paixão de Jesus, hateten ba jornalista sira iha Parlamentu Nasionál, Kinta (18/11/21).

Advertisement

Hosi totál OJE 2022 ba MD hamutuk $36 ne’e, sei fó prioridade liu ba seguransa eleisaun Prezidensiál no Parlamentár.

“Ida ne’e ami foku teb-tebes, embora iha orsamentu ne’e buat oitoan mak la tama maibé, ami sente bele, ami hala’o jestaun di’ak hela,” Filomeno da Paixão de Jesus, dekelara.

Programa prioridade MD nian ba iha defeza nasionál ho sub-programa defeza militár nian, iha mós atividade kona-bá konstrusaun ba novas infra-estrutura defeza militár, ho nia alokasaun orsamentu iha verba kapitál dezenvolvimentu hamutuk millaun $1-resin.

Maibé, orsamentu aloka iha Konsellu Administrasaun Fundu Infraestrutura (KAFI) nian, iha osan ne’ebé sufisiente.

Membru FALINTIL Forsa Defeza Timor Leste (F-FDTL), hala’o parada militár, iha Kuartél Jenerál Fatuhada. Foto/Hatutan.com.

Tanba ne’e maka MD planeia ona katak, iha Abríl 2022 sei loke tenderizasaun ba projetu balun tán hanesan, hari’i ketak Kuartél Jenerál ba MD, hari’i mós komandu Kuartél autoridade marítima nian, hamutuk ho komponente navál iha Hera.

Iha mós Beduku, sei harii rezidénsa ba militár sira, tanba ne’e iha projetu haat ka lima mak iha laran.

Advertisement

Maski nune’e, Governu liuhosi MD hasoru preokupasaun boot ida maka infraestrutura ba Portu Hera, infraestrutura kona-bá atu hari’i tán Postu Seguransa foun sira hamutuk 5 to’o 6 iha liña fronteira Terrestre. Maibé, konstrusaun Portu Hera, oras-ne’e Governu Australianu sira, haree hela.

Konstrusaun Portu Navál Hera, Governu TL liuhosi KAFI mós aloka hotu ona osan, inklui haree ona dezeñu ToR ba infraestutura Portu Hera nian, hamutuk millaun $90 no tinan oin halo lansamentu.

Infraesturtura ba Komponente Terrestre nian, oras-ne’e kompañia ida hahú ona konstrusaun iha Damalara iha parte norte, maibé, Postu Maukatar sei hahú tinan oin, iha parte Súl.

Manutensaun Ró Patrullamentu Sei Problema

Filomeno Paixão mós informa katak, orsamentu atu halo manutensaun ba ró patrullamentu tasi, iha Komponente Navál Hera, sei iha problema, tanba tuir prosesu negosiasaun ne’ebé parte ministériu halo ho kompañia balun atu hadi’a ró ne’ebé avaria, maibé parte kompañia husu katak, Governu presija selu ho osan hamutuk millaun $2-resin.  

Advertisement

Tanba ne’e, Governu liuhosi MD, adi’a fali ba tinan 2022 atu aumenta tán osan restu no entre  Janeiru ho Fevereiru, bele halo ona manutensaun.

“Iha tinan ida ne’e, manutensaun ba ró iha problema oitoan, tanba iha tinan kotuk ita propoin duni millaun $3 resin  no tinan ida-ne’e ita simu de’it millaun $1,7. Ne’e duni, manutensaun ha’u la dehan,” Ministru Filomeno, informa tán.

Progresu ezekusaun OJE 2021 nian iha MD, atinje ona 70% ne’ebé gastu ba bens no servisu ho saláriu no vensimentu.

Jornalista: Rogério Pereira Cárceres

Advertisement