Hatutan.com, (23 Novembru 2021), Díli-Sekretáriu Estadu Terras no Propriedade (SETP) hamutuk ho Polísia Nasionál Timor-Leste (PNTL), Tersa (23/11/2021), ezekuta  despeza administrativu  ba rai Estadu ne’ebé lokaliza iha Aldeia 03, Suku Fatuhada, Postu Administrativu Dom Aleixo, Munisípiu Díli, ne’ebé  okupa husi António Tavares atuál prokuradór.

Rai disputa ne’ebé António Tavares atu harii uma. Foto/Hatutan.com

Iha despeza administrativa ne’e husu atu António Tavares,  hasai sasán iha rai-laran, inklui mós ho ai-horis ne’ebé antes ne’e kuda ona iha rai refere.

António Tavares hateten, rai-ne’e nia okupa dezde 2000 to’o ohin loron, no iha tinan 2009, Jacinto Alves mai reklama dehan, nia rejistu rai ne’e iha ministériu justisa hodi fó autorizasaun atu nia bele mai okupa rai-ne’e.

“Nia lori dunik despaixu ida husi ministériu justisa anteriór nian mai fó dunik kona-ba autorizasaun ba rai Estadu nian ne’e, maibé ba fila Aldeia 24 Setembru, Suku Comoro nian no fatin ne’ebé ha’u okupa ne’e Aldeia 03, Suku Fatuhada, tanba ne’e, ha’u rejeita no dehan labele tamba ministru autoriza ita ba fatin seluk, maibé ita-boot mai hadau fali ida-ne’e, no ha’u la aseita no ikus mai nia ba hadi’a no lori mai, maibé ha’u nia parte la aseita nafatin tamba benefisia de’it nia no ami atu ba iha ne’ebé,” António Tavares ba Hatutan.com iha nia rezidénsia Aldeia 03, Suku Fatuhada, Díli.

Advertisement

Iha 2018 no 2019 bainhira Governu hahú loke hikas rejistu kadastru,  António Tavares ba rejistu hodi hetan mapa no hein desizaun parte Governu nian atu selu ka halo arrendamentu ba Governu no tama ba  2019 parte ne’ebé rekere ba rai-Estadu refere halo prosesu sivíl ida hasoru vítima providénsia kautelar no hatama ba iha Tribunál no parte Tribunál dezigna data ba julgamentu, maibé rekerente rasik mak deziste tiha iha 2020.

Tuir prosedimentu sivíl nian iha prazu loron 30 nia laran tenke halo asaun prinsipál, maibé nia la halo no joga fali husi Sekretáriu Estadu atu mai destroi fali ami nia obra.

“Ami la simu, ami nia fatin ami konstrui tiha ona, sira lori polísia ho ema mai atu sobu. Be ha’u nia pergunta mak ne’e rai ne’e atu lori ba iha ne’ebé, se la’ós ami okupante atuál mak iha direitu fó fali direitu ba sira husi fatin seluk mak  iha direitu ne’e loos ka. Ne’e duvida boot ba ami,” nia hateten.

Xefe ekipa sekretáriu estadu nian la aprezenta karta despaixu ruma molok ezekuta orden ho razaun karta despeza ne’e nu’udar segredu justisa no ne’e husu ba parte vítima se sente la satisfás bele halo  reklamasaun.

António Tavares. Foto/Hatutan.com

“Ha’u atu halo rekursu bazeia ba saida tanba tuir ha’u-nia entendimentu eskritu ruma tenke iha para sai baze legal ha’u nian para bele halo rekursu, se lae, h’au konsidera sira-nia prezensa iha ne’e illegal no sei lori prosesu ba oin,” nia subliña.

Hatutan.com tenta konfirma ho koordenadór Sekretáriu Estadu Teras no Propriedade (SETP) ne’ebé iha terrenu hodi halo konfirmasaun relasiona karta despaixu, maibé rejeita atu fó komentáriu tamba sira ezekuta de’it orden husi superiór sira, nune’e laiha autorizasaun atu halo komentáriu ruma.

Advertisement

To’o notísia ne’e publika Hatutan.com tenta ona atu halo konfirmasaun ho Sekretáriu Estadu Teras no Propriedade (SETP), maibé infelizmente okupadu ho servisu seluk, nune’e husu hela audiénsia ba kuarta aban (24/11/2021), tuku 09:00 Otl.

Jornalista: Vito Salvadór

Advertisement