Hatutan.com, (25 Novembru 2021), Díli—As Ponta Leste FC ho Lalenok United FC sei  hasoru-malu iha jogu daruak jornada Liga Futeból Timor Leste (LFTL), iha Sesta (25/11/2021) iha estádiu munisipál Díli.

Treinadór As Ponta Leste FC, Francisco de Araújo. Foto/Hatutan.com.

As Ponta Leste FC no Lalenok United FC iha ambisaun no paixaun boot atu manan iha jogu ne’e, tanba iha jogu dahuluk ekipa rua rekolla ona vitória hasoru adversáriu.

Notísia iha Relasaun:AD SLB Laulara FC Rekolla Vitória Dahuluk Iha Jornada Daruak LFTL

Treinadór As Ponta Leste FC, Francisco de Araújo estuda ona estratejia ekipa adversáriu nian, nune’e sei orienta jogadór sira atu halo esforsu no ezersísiu másimu durante jogu hodi konkista vitória.

Advertisement

“Ha’u nafatin korájen ba  ha’u-nia jogadór katak ita servisu makás ona iha prosesu sira, nune’e tenke servisu makás liután iha jogu hodi bele rekolla pontu tolu,” Francisco de Araújo, hateten iha sede LFTL Bairro dos Grilhos, Dili, Kinta (25/11/21).

Treinadór ne’e hatutan, nia ekipa menus iha atakante maibé sei serbisu totál ba futeból, signifika kada oportunidade kualkér jogadór bele hatama golu tantu defeza, médiu inklui avansadu rasik.

Trinadór sei halo mudansa ba táktika maibé jogadór mantein no iha esperansa katak ekipa sei halo tranzisaun tátika ida di’ak, nune’e bele rekolla vitória.

Eis Treinadór Assalam FC ne’e hateten, nia parte sei hakaas an atu halo balansu ba Lalenok United FC liu hosi efetividade jogadór meiu kampu sira nian, nune’e bele hamate avansadu adversáriu sira nia jogu.

Treinadór Lalenok United FC Gaspar Amaral. Foto/Hatutan.com.

Iha parte seluk Treinadór Lalenok United FC Gaspar Amaral konsidera joga kontra As Ponta Leste FC nu’udár jogu importante ba ekipa ne’e, nune’e sei halo esforsu másimu hodi bele hetan pontu iha jogu ne’e.

“Ami nia jogadór sira nia preparasaun di’ak no iha jogadór balun ne’ebé antes ne’e la joga, agora bele ona reforsa hikas ekipa iha jogu daruak ne’e,” Gaspar Amaral, hateten.

Advertisement

As Ponta Leste iha matéria jogu ne’ebé di’ak tanba ne’e ekipa sei halo esforsu hotu atu bele ultrapasa jogu ne’e.

“As Ponta Leste FC nia jogadór maioria iha selesaun nasionál, iha sub-19 no balun iha selesaun nasionál senior. Ami rekoñese ida ne’e no garante vitória,” nia ko’alia ho fiar an.

Haree ba ekipa rua nia plantel iha jogu dahuluk hatudu kada ekipa iha preparasaun másimu nune’e garante sei hatudu jogu ida atrativu hodi anima adeptu sira.

Jornalista: Vito Salvadór

Advertisement