Hatutan.com, (23 Novembru 2021), Dili—AD SLB Laulara FC rekolla vitória dahuluk iha jogu Liga Futeból Timor Leste (LFTL), jornada daruak kontra adversáriu DIT FC ho skore 4:1.

AD SLB Laulara FC rekolla vitória dahuluk iha jogu Liga Futeból Timor Leste (LFTL) kontra adversáriu DIT FC ho skore 4:1. Foto/LFTL.

Vitória ne’e lori Makikit Laulara FC ba tuur iha pozisaun daruak tabela klasifikasaun provizóriu Liga Futeból Timor Leste (LFTL) iha jornada daruak nian.

Notísia iha Relasaun:Karketu Díli FC Kontinua Konkista Vitória iha Jornada Daruak LFTL

AD SLB Laulara FC ho plantel segunda liña ne’ebé iha nafatin halo esfórsu no preparasaun máximu no hadi’a kualidade jogu konsege konkista vitória kontra nia adversáriu DIT FC ne’ebé maioria ho jogadór senior no estranjeiru na’in-rua.

Advertisement

“Tátika di’ak, disiplina no esfórsu iha kada jogu sai hanesan vizaun AD SLB Laulara FC nian tanba ne’e ami sempre halo esfórsu másimu atu rekolla vitória,” Treinadór, Efrem Jerónimo, hateten.

Nune’e mós kapitaun ekipa AD SLB Laulara FC, Nídio Alves kontente ho vitória ne’e tanba ne’e hanesan jogadór prontu atu ezekuta orientasaun hosi Treinadór hodi oferese vitória ba ekipa.

“Ami sei hakaas an treinu no nafatin iha esperansa atu enfrenta jogu sira tuir mai,” Nídio Alves, hateten.

AD SLB Laulara FC domina kedan bola iha minutu uluk jogu hahú hodi halo kedan atake ba nia adversáriu DIT FC.

AD SLB Laulara FC sempre halo ameasa iha kada oportunidade hodi fó, buka atu hatama golu. Ekipa DIT FC nafatin enfrenta problema iha meiu kampu, prezensa jogadór estranjeiru Gilbert Richard (93) ne’ebé antes ne’e sai hanesan esperansa boot ba DIT FC to’o segundu jogu seidauk hatudu perfórmance ne’ebé di’ak tuir espetativa ne’ebé iha.

Advertisement

AD SLB Laulara FC rekolla vitória dahuluk iha jogu Liga Futeból Timor Leste (LFTL) kontra adversáriu DIT FC ho skore 4:1. Foto/LFTL.

Aproveita natureza nia tulun liu hosi udan makas ne’ebé akontese iha jogu ne’e, AD SLB Laulara FC  liu hosi avansadu Alexandro Ima Kefi (21) marka uluk golu ida hafóin simu asisténsia hosi Jeremias Baptista (69) iha minutu 6.

Liu de’it minutu ida AD SLB Laulara FC liu hosi avansadu Jeremias Baptista (69) aumenta tan golu ida ba nia ekipa hafóin aproveita faillansu DIT FC nian iha liña kotuk no golu ne’e muda skore ba 2:0.

Hafóin golu ne’e Jeremias Baptista (69) hetan kedan kartaun kinur hafóin komete falta hasoru kapitaun DIT FC Feliciano Gonçalves (19).

DIT FC halo esfórsu hodi buka oportunidade atu responde golu ruma hodi muda skore iha tabela maibé failla tanba  AD SLB Laulara FC nafatin la fó oportunidade tanba jogadór sira hatudu disipliña di’ak iha jogu nia laran.

Ho falansu iha liña klaran halo DIT FC  falla atu halo kombinasaun di’ak entre play maker no  avandasu sira hodi hatama golu.

Avansadu estranjeiru DIT FC Sewor Mahuse (9) sempre halo esfórsu maibé falla produs golu ba nia ekipa.

Advertisement

AD SLB Laulara FC nafatin domina jogu no kontinua halo presaun ba nia adversáriu liu hosi pasajen bola hosi liña ba liña ne’ebé sempre kontrola ho di’ak.

AD SLB Laulara FC hatudu nia klase iha jogu ne’e hodi aumenta tan golu datoluk liu hosi jogadór Alexandro Ima Kefi (21) iha minutu 45+1. Ho golu ne’e mak termina primeira parte.

Tama ba segunda parte DIT FC ne’ebé sei hela ho zero koko buka oportunidade iha minutu dahuluk segunda parte hodi halo atake ba nia adversáriu, maibé liña kotuk AD SLB Laulara FC ne’ebé komandu hosi Felipe Oliveira (24) sei bele antesipa ho di’ak hodi asegura nia ekipa atu adversáriu labele hatama golu.

Tabela klasifikasaun provizóriu.

AD SLB Laulara FC nafatin iha kombinasaun ida di’ak iha kada liña maske nune’e DIT FC nafatin halo esfórsu atu bele sobu hodi muda skore maibé sei nafatin falla.

DIT FC nafatin esfórsu hodi hahú halo substituisaun ba jogadór iha minutu 49 hodi hasai Gilbert Richard (93) no hatama Pedro da Silva.

Ho substituisaun ne’e seidauk hatidu tezultadu no AD SLB Laulara FC kontinua domina bola liu hosi pasajen iha meiu kampu.

Advertisement

DIT FC kontinua halo substituisaun hodi hasai Serafim Brito no hatama José Santos Almeida iha minutu 57.

Ho substituisaun ne’e DIT FC hahú hetan nia ritmo hodi halo jogu iha liña oin maibé AD SLB Laulara FC nafatin mantein nia ritmu no disipliña iha kada liña.

Tama ba minutu 63 DIT FC kontinua halo substituisaun hodi hatama Edivaldo Castro (24) no hasai Ervinho Soares (20).

Ekipa DIT FC hahú hetan nia ritmu jogu hodi halo balansu ba AD SLB Laulara FC nia jogu. Natalino da Costa (8) jogadór AD SLB Laulara FC obrigadu tenke hetan kartaun kinur hafóin halo protesta  hasoru desizaun arbitu iha minutu 75.

DIT FC kontinua halo substituisaun hodi hasai jogadór Leopoldo Guteres (18) no hatama Bonaventura Klau (44) iha minutu 82.

Advertisement

Hafóin substituisaun ne’e ekipa rua hasa’e tensi jogu no DIT FC konsege halo atake barak ba ekipa AD SLB Laulara FC maibé falla atu asegura atake ekipa adversáriu nian nune’e AD SLB Laulara FC halo kontra atake lais iha minutu 85 no jogadór Jeremias Baptista (69) marka quarta golu ba nia ekipa hodi muda skore ba 4:0.

Liu de’it minutu rua DIT FC konsege responde golu ida liu hosi nia avansadu veteranu José Santos Almeida (7) iha minutu 87 hodi muda skore iha tabela klasifikasaun.

Golu hosi DIT FC ne’e mak lori ekipa rua ba termina jogu loraik ne’e no AD SLB fila ho vitória no DIT FC obrigadu tenke fila ho derota.

Hafóin jogu Treinadór DIT FC Alexandre Cham hateten iha jogu ne’e konsege implementa taktika sira ne’ebé iha durante jogu maibé falla iha kampu tanba fator natureza.

“Ita boot sira hare rasik ohin golu rua primeiru ne’e tanba udan nune’e defeza sira lakonsege antesipa bola ho di’ak ikus mai adversáriu aproveota hodi halo golu,”  Alexandre Cham, hateten.

Advertisement

Maske nune’e DIT FC sei kontinua halo esfórsu atu iha jogu sira tuir mai bele hetan vitória hodi sai hosi zona degradasaun.

Jornalista: Vito Salvadór