Hatutan.com, (25 Novembru 2021), Díli-Prezidente Repúblika, Francisco Guterres “Lú-Olo”, husu ba Primeiru-Ministru (PM), Taur Matan Ruak, atu kontinua aselera kampaña vasinasaun hodi hasa’e imunidade povu nian iha luta kontra propagasaun COVID-19.

PM Taur Matan Ruak halo enkontru ho PR Francisco Guterres “Lú-Olo”. Foto/Mídia GPR

PR Francisco Guterres “Lú-Olo” hatutan lia-hirak ne’e ba PM Taur Matan Ruak, liuhosi enkontru semanál ne’ebé hala’o iha Palásiu Prezidensiál, Díli, Kinta (25/11/2021).

Ba jornalista-sira hafoin enkontru ne’e, PM Taur Matan Ruak, informa, durante enkontru ho PR Lú-Olo  husu ba Governu atu kontinua halo kontrolu ba sirkulasaun públiku hodi bele prevene  propagasaun peste letál COVID-19 ho nia variante oioin ne’ebé sai ameasa ba saúde públiku.

“Prezidente Repúblika,  liu-liu alerta nafatin Governu, tau matan liu-liu ba COVID-19 atu labele prejudika povu nia vida,”  Taur Matan Ruak hateten.

PM Taur haktuir, aprovasaun lei baze saúde nian ne’ebé aprova hosi Parlamentu Nasionál, oras ne’e, Timor-Leste laiha ona estensaun estadu emerjénsia, serka sanitária ho konfinamentu obrigatóriu.

“Ita avansa maka’as ho ita-nia kampaña vasinasaun para evita pandemia COVID-19 ne’e da’et iha ita nia-rain. Daudaun ne’e, ita haree númeru vasina, kampaña vasina la’o di’ak, embora ita ladún di’ak liu, mais di’ak, tanba ita nia alvu ita hakarak até fin-du-anu ne’e atinje 80%,” Primeiru-Ministru, Taur Matan Ruak, hateten.

Progresu vasinasaun COVID-19 iha primeira doze nian, oras ne’e besik ona 80%, maibé segunda doze foin atinje iha 62%. Hosi persentajen, hatudu katak Governu tenke esforsa atu iha tinan ikus ne’e, bele hetan to’o 80%.

Bainhira governu konsege atinje to’o projesaun ne’ebé iha, bele hatudu sinál di’ak ba governu atu normaliza situasaun  ne’e ba tinan oin, no mós fasilita iha rekuperasaun ekonomia iha rai-laran.

Kona-bá estadu emerjénsia ne’ebé laiha ona, karik Sala Situasaun Sentru Integradu Jestaun Krize (SS-SIJK) sei eziste ka lae, Taur informa, nia fó ona instrusaun atu halo reajustamentu, tanba iha nia gabinete, eziste gabinete ida bolu dehan, gabinete jestaun ba krize.

“Gabinete jestaun de krize ne’e mak kuandu situasaun krize ona ne’e, nia transforma ba sala de situasaun. Entaun, ami haree hela atu halo ajustamentu ba nia kompozisaun, ne’ebé mínimu ita iha ekipa ida de’it, so para halo akompañamentu,” Taur hateten tan.

Xefe Governu husu ba abitante  sira ne’ebé seidauk simu vasina, atu halo esforsu aan, nune’e bele partisipa iha vasina. Tanba governu sei iha estoke  vasina, no importante liu mak sidadaun sira partisipa iha aktu vasinasaun.

Jornalista: Rogério Cárceres