Hatutan.com, (25 Novembru 2021), Díli—Primeiru Ministru (PM), Taur Matan Ruak, husu ba Komandu Polísia Nasionál Timor Leste (PNTL), atu fó-hanoin ba membru sira hodi halo jestaun ba farda ne’ebé Governu hola no distribui ona iha idaidak nia liman, hodi utiliza ho kuidadu nune’e bele dura to’o tempu naruk.

Primeiru Ministru Taur Matan Ruak. Foto/Média GPM.

Xefe Governu ne’e husu tanba Governu laiha osan atu kada tinan sosa bebeik farda ba PNTL, no sei iha prioridade seluk ne’ebé presija mós tau-matan ho orsamentu Estadu.

Notísia iha Relasaun:Koñese Deviza PNTL no Formasaun atu Lidera Eskuadra to’o Komisáriu

“Ita labele, pur-ézemplu tinan-tinan, ita tenke sosa farda. Ita laiha osan to’o ida ne’e. Tanba ita la haree de’it ba PNTL, ita haree mós ba kamponezas, estudante, área saúde, defeza no ita haree buat hotu-hotu. Ho osan oitoan ne’ebé ita iha, hotu-hotu tenke halo esforsu halo nusa mak jere di’ak, atu rekursu ne’ebé ita iha mak, bele ita utiliza tempu naruk oitoan,” Taur Matan Ruak, hateten ba jornalista sira, hafoin enkontru semanál ho Prezidente Repúblika (PR), Francisco Guterres Lú-Olo, iha Palásiu Prezidensiál Bairru-Pité, Kinta (25/11/21).

PM Taur esplika katak, nesesidade hotu-hotu atu halo, tenke bazeia mós ba orsamentu ne’ebé iha, maibe Governu sempre halo esforsu atu tau-matan.

Bainhira husu kona-bá, oinsa Governu tau mós iha planu atu hele sosa tán farda foun ba Komandu PNTL, iha Orsamentu Jerál Estadu (OJE) 2022,  Xefe Governu ne’e dehan, durante enkontru ho Xefe Estadu la ko’alia kona-bá asuntu ne’e.

“Asuntu ne’e ha’u la diskute ho Prezidente Repúblika, prontu, ha’u mai ne’e ko’alia ho asuntu tolu ne’e de’it,” PM Taur subliña.

Membru Polísia Nasionál Timor Leste (PNTL), iha Eskuarda Ai-mutin Postu Administrativu Dom Aleixo, Munisípiu Dili, dudu karreta Estadu ne’ebé sira utiliza hodi halo patrullamentu, iha área Edifísiu Eskuadra Ai-Mutin, Kuarta (24/11/21). Foto/Facebook.

Iha fatin hanesan, Komandante Jerál PNTL, Komisáriu Polísia, Faustino da Costa informa, iha 2019 komandu sosa ona uniforme ka fardamentu sira hodi distribui ba membru sira, ne’ebé kompleta hahú hosi ulun to’o ain. Tuir fali iha 2020, komandu PNTL mós kompra tán farda balun, hodi atribui mós ba membru sira.

“Situasaun ida-ne’e atu dehan katak, sé membru ida ka rua mak halo ida-ne’e, signifika distribuisaun uniforme ka fardamentu ne’ebé ita hola iha fulan balun ba kotuk mós, sira asesu ka la’e. Hatais farda ida obralan ne’e, ninian mak laiha ka, ou nia rai hela iha nia uma,” Komisáriu Faustino, hateten tán.

Komandu PNTL sei orienta nafatin ba departamentu justisa ho komandu administrasaun atu buka-tuir nia membru sira ne’ebé utiliza fali farda “obralan” hodi halo servisu.

Antes ne’e, Provedória dos Direitos Humanos no Justiça (PDHJ), lansa ninia relatóriu ida ne’ebé fó-sai katak, farda ka uniforme ne’ebé durante membru PNTL sira uza hodi hala’o kna’ar iha terrenu, balun la kualidade, tanba modelu hanesan ho roupa “obralan”. 

Jornalista: Rogério Cárceres