Hatutan.com, (26 Novembru 2021), Dili—Autoridade de Inspeção e Fiscalização da Atividade Económica Sanitária e Alimentar, Instituto Publico (AIFAESA, I.P), kontinua hala’o atividade inspesaun regulár no rutina iha Munisípiu Dili.

Alende ne’e, AIFAESA hamutuk ho Burger King Halo Destruisaun ba Produtu Crispy Fried Chiken iha Lexeira Tibar, (25/11/2021). Foto/AIFAESA.

Inspesaun ne’e atu garante direitu konsumidór-sira nian ba ai-han ne’ebé livre hosi kontaminasaun mikróbio no baktéria, kauza hosi sasán liu prazu iha loja, super merkadu, restaurante no otél sira ne’ebé kada loron sai hanesan ajente distribuidór ai-han no materiál seluk tán ba komunidade.

Notísia iha Relasaun:AIFAESA Prosesa Burger King Tuir Lei

Atividade inspesaun ba sasan liu prazu ne’e, AIFAESA halo iha kapitál Dili, inklui territóriu laran tomak maibé haree ba servisu ajente distrubuidór nian ne’ebé sentraliza iha Dili, nune’e AIFAES deside halo rutinamente iha Dili kada loron tuir oras servisu nian no bele fora hosi oras servisu bainhira hetan keixa urjente hosi komunidade ka konsumidór-sira.

AIFAESA sei halo apreensaun ba sasan sira ne’ebé data validade liu ona, no sei rekolla hodi mai armazén ne’ebé AIFAESA nian.

“Inspetór sira kada loron sempre halo kontrolu ba atividade ekonómika iha kapitál Dili, bainhira iha inspesaun ne’e mak ita nia inspetór sira hetan sasan sira ne’ebé nia data validade ne’e liu ona sei rekolla no lori ba tau iha armazen aifaeza nian hodi hein loron to’o ba halo destroisaun,”  Xefe Divizaun Operasaun Viriato Paulo hateten ba Hatutan.com iha knaar fatin Matadoru Dili, Sesta (26/11/2021).

Iha Ekipa AIFAESA halo kolleta amostra ba Paun hodi halo Teste laboratóriu iha Likisá, (25/11/2021), amosrta hirak ne’e Inspetór ho Tékniku Laboratóriu kolleta no submete ba halo teste iha laboratóriu nasional saúde. Foto/AIFAESA.

Oras-ne’e AIFAESA iha limitasaun ba rekursu umanu, nune’e inspesaun ne’ebé hala’o iha munisípiu labele kobre diariamente hanesan iha Dili no sei hala’o iha fulan tolu dala ida.

Durante AIFAESA hala’o atividade inspesaun sempre hetan loja no super merkadu lubuk ida mak komete irregularidade  liga ho sasan sira ne’ebé inválidu tanba ne’e AIFAESA sempre fó hanoin no husu kooperasaun atu ajénsia distribudór-sira labele komete beibeik erru sira ne’e, tanba fó ameasa ba saúde públiku.

“Ita sempre halo inspesaun atu garante kualidade produtu sira ne’ebé iha ba saúde publika populasaun nian,” nia hateten.

Dekretu lei númeru 23/2009, atribui kompeténsia ba AIFAESA  atu foti-sai sasan sira ne’ebé inválidu ka liu ona prazu hosi ajénsa distribuidór-sira.

Sasan sira ne’ebé AIFAESA prende barak liu maka nesesidade bázika hanesan bebidas, dose, mina, supermie no sira seluk tán.

Hafoin halo apreensaun sasan sira ne’e AIFAESA lori ba halo destroisaun iha lixeira Tibar no munisipiu sira sei halo destroisaun iha fatin própriu ne’ebé ekipa identifika ona.

Ekipa AIFAESA halo kolleta amostra ba Paun hodi halo Teste laboratóriu iha Likisá (25/11/2021), amosrta hirak ne’e Inspetór ho Tékniku Laboratóriu kolleta no submete ba halo teste iha laboratóriu nasional saúde.

AIFAESA tun direta hodi rekolla tanba hetan keixa hosi konsumedór-sira katak, produtu Paun ho marka “Hui tailang” ne’ebé sira sosa iha loja ”Lin Tong Chao” hodi han rezulta kabun moras ba estudante na’in lima (5).

Nune’e, inspetór sira konvoka na’in ba loja refere hodi halo justifikasaun iha edifísiu AIFAESA Matadouro-Díli.

Alende ne’e, AIFAESA hamutuk ho Burger King Halo Destruisaun ba Produtu Crispy Fried Chiken iha Lexeira Tibar, (25/11/2021).

Iha AIFAESA hala’o kontrolu ba operadór ekonómiku iha Postu Administrativu Balibo, munisípiu Bobonaro, (21/11/2021). Foto/AIFAESA.

Inspesaun ne’e lidera hosi Xefé Divizaun Operasaun Viriato Paulo, Xefé Seksaun ba Atividade Komérsiu no Indústria Carlos Mateus, hamutuk ho inspetór sira, no PNTL Postu Tibar, akompaña empreza Fast Food Timor Lda, estabelesimentu Burger King, hodi halo destuoisaun ba produtu liu prazu iha fatin Lixeira Tibar, Munisípiu Likisá.

Iha biban ne’e, Xefé Divizaun Operasaun hateten inspesaun ne’ebé hala’o iha 30/09/2021, identifika produtu Crispy Fried Chicken ho kondisaun liu prazu, nemak halo kedan selajen.

Burger King rasik mak hatama pedidu mai AIFAESA hodi husu halo destruisaun ba totál Produtu ho marka Crispy Fried Chicken kaixa 14, no plastiku 6, ho nia data validade 30/07/2021.

Foin lalais iha (21/11/2021) AIFAESA halo kontrolu ba operadór ekonómiku iha Postu Administrativu Balibo, munisípiu Bobonaro,.

AIFAESA liu hosi inspetór Departamentu Operasaun halo inspesaun ba operadór ekonómiku sira iha Postu Administrativu Balibo, Munisípiu Bobonaro no la identifika irregularidade, maibé ekipa operasionál fó-hanoin ba operadór ekonómika sira atu halo kontrolu nafatin ba produtu nia data validade antes fa’an ba konsumidór sira.

Aliende ne’e, atividade inspesaun no fiskalizasaun inspetór sira inspesiona estabelesimentu hamutuk 18.

Hafoin atividade ne’e remata, inspetór sira halo kedan destruisaun ba produtu hirak ne’ebé preende.

Atividade destruisaun ne’e hala’o iha Tasi Metan no partisipa hosi PNTL, Postu Administrativu Balibo, Munisípiu Bobonaro.

Jornalista: Vito Salvadór