Hatutan.com (26 Novembru 2021), Díli—Tribunál Distritál Dili (TDD) liu hosi alegasaun hosi Ministériu Públiku (MP) ne’ebé reprezenta hosi Prokuradór Adérito Tilman, husu ba Tribunál atu aplika pena prizaun tinan tolu (3) ba eis Xefe Gabinete Ministériu Finansa (MF), arguida BS ho pena tinan haat fulan neen no indimizasaun $27.202 ba funsionáriu tezoreiru arguidu ZAS ba krime pekulatu no administrasaun danoza.

Razaun MP husu pena ne’e, tanba konsidera faktus ne’ebé konsta iha akuzasaun provadu katak arguida BS uza osan Estadu ba interese partikulár maski arguida devolve ona.

Provadu mós katak, arguidu ZAS la uza nia knaar hanesan tezoreiru ho di’ak hodi la kontrola osan ne’ebé sai, inklui osan iha brankas ne’ebé rezulta osan lakon.

Antes ne’e, tuir akuzasaun hosi MP katak, arguida BS hanesan funsionáriu públiku no xefe Gabinete iha MF no arguidu ZAS hanesan tékniku Profisionál no Tezoreiru iha MF, maibé iha loron 06 fulan Jullu 2018, Ministru Negósiu Estranjeiru no Kooperasaun Dionísio Babo Soares haruka pedidu estraordináriu ida ho empréstimu $5.000 konsidera hanesan enviadu extraordináriu Prezidente Repúblika nian ba iha Cabo Verde.

Iha loron 31 fulan Agusto 2018, ofisiál finansa prepara dokumentu ho montante $195.000 halo adiantamentu hodi responde ba situasaun urjente ne’e.

Iha loron 10 fulan Setembru 2018, Gabinete Ministériu Negósiu Estranjeiru devolve hikas osan empréstimu ho montante 5.000 ba arguida BS, maibé osan refere arguida la tau ba kofre Estadu no utiliza ba nia interese partikulár durante férias ho família iha Bali, Indonézia.

Iha loron 11 Setembru 2018, arguidu ZAS hala’o knaar hanesan tezoreiru iha Banku Sentrál Timor Leste foti osan adiantamentu hosi MF ho montante $195.000 hodi tau iha kofre no save arguidu maka kaer.

Iha tinan 2018, arguida uza nia kargu hanesan Xefe Gabinete hato’o verbalmente pedidu empréstimu osan adiantamentu lori naran Primeiru Ministru (PM) ho montante $6.000, Ministru Negósiu Estranjeiru no Kooperasaun ho montante $3.000, Gabinete Ministra da Finansa ho montante $1.000 no osan ho montante $711 viajen ba Singapura, maibé realidade hatudu naran ne’ebé mensiona la husu empréstimu ba osan adiantamentu MF.

Ho hahalok arguidu no arguida fó prejuizu ba Estadu ho montante $27.202, tanba ne’e MP akuza arguida ho arguidu ba prátika krime pekulatu no administrasaun danoza ne’ebé previstu iha artigu $295.274 hosi kódigu penál Timor-Leste.

Audiénsia julgamentu prezide hosi juíz kolektivu, José Gonçalves, Argentino Nunes, Alvaro Maria Freitas, MP reprezenta hosi Prokuradór Adérito Tilman no arguidu hetan asisténsia legál hosi Defensór Públiku Nelson Borges.

Jornalista: Carmelita Isaac