Hatutan.com, (26 Novembru 2021), Dili—Prezidente Repúblika (PR), Francisco Guterres Lú Olo, sei ezerse nia kompeténsia hodi fó indultu ka fó liberdade ba prizoneiru hamutuk na’in-11, hosi prizaun Becora no Gleno, iha selebrasaun loron Proklamasaun Independénsia ba dala-46.

Prezidente Repúblika, Francisco Guterres Lú Olo. Foto/Média PR.

Konstituisaun Repúblika Demokrátika Timor-Leste (RDTL), artigu 85, haktuir katak, fó indultu nu’udár kompeténsia eskluziva ida Prezidente Repúblika nian hafoin rona hosi Governu.

Notísia iha Relasaun:Prizaun Becora-Gleno Submete Ona Lista Indultu 45, Suai La prienxe rekezitu

“Fó indultu no komutasaun pena tenke halo tuir ninia fundamentu, nomeadamente ezijénsia pesoál, umanitária, familiares no sosiál hosi kondenadu no ezijénsia ba rezosializasaun, komportamentu prizionál no esforsu ba reinsersaun sosiál. Haree mós ba komportamentu prizionál no esforsu ba reinsersaun sosiál hosi rekluzu no razaun umanitária ho kazu atu impoin,” Komunikadu ne’ebé hatutan.com asesu hosi Palásiu Prezidensiál, Sesta (26/11/21).

Populasaun prizionál iha Estabelesimentu Prizionál Becora ho voluntáriu tulun maluk sira ne’ebé presija ran liu hosi oferese ran ba Departamentu Banco de Sangue iha HNGV, 30 Setembru 2021. Foto/dok.João Domingos.

Tuir tradisaun prezidensial, iha okaziaun Loron Proklamasaun Independénsia, Prezidente Repúblika, iha ámbitu haktuir iha podér sira konstituisionál nian no hosi proposta Governu, fó indultu ba rekluzus na’in-11 ba krime ne’ebé konsideradu menores.

Rekluzu na’in-11 ne’ebé hetan indultu mak hanesan, Albertino Freitas Magno, Atanásio Ribeiro Belo, Domingos Gusmão Marques, Jerónimo Marques, Luis Marques, Mateus Boavida Marques, João Guterres, Abreu Ramos da Costa, Júlio Ximenes, Armindo Martins no Eliza da Conceição Gonçalves Noronha.

Antes ne’e parte Estabelesimentu Prizionál Becora-Dili no Gleno-Ermera submete naran prizioneiru atu hetan indultu hamutuk na’in 45, kompostu hosi Becora na’in 30 no Gleno na’in 15.

Jornalista: Rogério Cárceres