Hatutan.com, (30 Novembru 2021), Dili—Delegasaun Timor-Leste (TL) ne’ebé hala’o vizita ofisiál iha Jenébra hodi partisipa MC12, kontinua hala’o ho forma ativa.

Delegasaun Timor-Leste ne’ebé partisipa iha reuniaun ho WAIPA. Foto/MKAE.

Iha loron 29 Novembru 2021, Ajénsia TradeInvest liu hosi Diretór Ezekutivu, Arcanjo da Silva, hala’o  reuniaun durante oras ida ho Xefe Asosiasaun Mundiál hosi Ajénsia Promosaun Investimentu The World Association of Investment Promotion Agencies (WAIPA), Ismael Ersahin, iha sala reuniaun Misaun Permanente  TL iha Jenébra.

Notísia iha Relasaun:Ministru Joaquim ho Delegasaun Dezloka ba Jenébra Partisipa Konferénsia Altu Nível OMK  

Iha reuniaun ne’e, Arcanjo da Silva hetan akompañamentu hosi Delegasaun TL  hanesan Diretór Ezekutivu SERVE, Florêncio Sanches, Diretora Jerál Asuntus ASEAN-MNEK, Milena Rangel,  Diretór Promosaun Exportasaun TradeInvest TL, Decio Ribeiro Sarmento, Diretór Relasaun External no Marketing TradeInvest Timor-Leste, Roberto Lai, Diretór Agrokomérsiu MAP, Fernando Egídio Amaral no mós reprezentante hosi Ministériu Turizmu, Komérsiu no Indústria inklui Gabinete Ministru Koordenadór Asuntu Ekonómiku (MKAE).

Advertisement

TradeInvest nu’udár ajénsia ne’ebé fó asisténsia serbisu ba empreza  nasionál no internasionál, apresia tebes ba apoiu hosi  organizasaun internasionál naun governamentál WAIPA, ne’ebé harí iha tinan 1995 liu hosi Konferênsia  Nasaun Unida kona-bá Komérsiu no Dezenvolvimentu nian.

Nune’e, liu hosi reuniaun ne’e, WAIPA no TradeInvest konkorda ona ho mais intensiva iha faze tuir-mai hodi dezenvolve Mapa Roteiru TradeInvest nian antes sai membru WAIPA.

“WAIPA kompremetidu sei apoia TradeInvest  hodi partisipa iha  eventu internasionál sira, inklui treinamentu ne’ebé organiza hosi WAIPA,” deklarasaun hosi Ismael Ersahin, liu hosi komunikadu, ne’ebé kompromete iha prósima etapa, nune’e TL bele hetan direitu  votu iha Asembleia Jerál WAIPA nian ne’ebé sei  realiza anualmente liu hosi Konferénsia Mundiál Investimentu.

Hodi kompleta rekezitu legál sira, antes sai membru WAIPA, TradeInvest ne’ebé atualmente tutela ba  MKAE sei haree kestaun legal-sira  ne’ebé vigora iha TL.

Nune’e, bainhira TradeInvest sai membru WAIPA sei la prezudika  lei sira ne’ebé eziste  iha Timor-Leste.

Advertisement

Iha loron hanesan, iha sidade Jenébra, Suísa, Ministru Koordenadór ba Asuntu Ekonómiku, Joaquim Amaral ho delegasaun ofisialmente entrega mós relatóriu kona-bá progresu TL nia esforsu hodi adere ba OMK ba Prezidente Grupu Traballu Adezaun Timor-Leste ba OMK no Reprezentante Permanente Portugál iha Jenébra, Embaixadór Rui Maciera.

Jornalista: Vito Salvadór