Hatutan.com, (02 Dezembru 2021), Díli-Conselho de Imprensa Timor-Leste, Kinta (02/12/2021), realiza atividade anuál Dili Dialogue Forum (DDF) nu’udar espasu importante ida hodi diskute asuntu sira kona-bá promove liberdade espresaun no liberdade imprensa no mós dezenvolvimentu mídia iha Timor-Leste.

Jornalista no partisipante sira iha DDF 2021. Foto/Hatutan.com

Atividade DDF ne’ebé hala’o durante loron rua; loron 02-03 fulan-Dezembru 2021 ne’ebé hala’o iha salaun Delta Nova, ho tópiku sentrál “Mídia Konvensionál iha Era Dijitalizasaun”, ho nia atividade sira mak hanesan;

Dokumentu ba sekuensia programa atividade DDF  2021 ne’ebé Hatutan.com asesu hatudu katak ba loron dahuluk, semináriu ho tema jerál “Mídia Konvensionál iha era Dijitalizasaun”, haree hosi esperiénsia kada nasaun nian. Nune’e, Conselho de Imprensa konvida orador nasionál no internasionál sira, ne’ebé identifikadu hodi hato’o sira nia perspetiva kona-ba asuntu refere, orador sira mak hanesan :

Mídia Konvensionál iha era Dijitalizasaun” hosi  esperiénsia kada nasaun mai ho oradór;

1. Muhammad Nuh, Chair person SEAPC-NET no Ketua Dewan Pers Indonesia, através virtual meeting;
2. Chavarong Limpatamapanee, Chairman of National Press Council of Thailand, através virtual meeting;
3. Virgílio da Silva Guterres, prezidente Conselho de Imprensa Timor-Leste
4. Sekretáriu Estadu Komunikasaun Sosiál, Mericio Juvenal dos Reis “Akara”.

Iha sesaun ida ne’e, Conselho de Imprensa mós konvida panelista sira mak hanesan : Marcelino Magno, academista hosi Universidade Nasionál Timor Lorosa’e (UNTL), ho Diretor Ezekutivu CEPAD,  João Boavida.

Tópiku temátiku “Industria Mídia Konvensionál iha era dijitál no Impaktu Pandemia ba Dezenvolvimentu Emprezariál (esperiénsia) sei aprezenta hosi orador mídia na’in, hanesan; Jorge Manuel de Araújo Serrano, nu’udar CEO Grupu Media Nacional (GMN) ho Suzana Cardoso, Diretora Timor Post.

Iha sesaun ida mós Conselho de Imprensa konvida panelista sira hanesan: Zevonia Vieira, prezidente  Asosiasaun Jornalista Timor-Leste ho Candido Alves nu’udar Prezidente Timor Leste Press Union (TLPU). 

Aberuta ba atividade DDF ne’e hala’o direitamenta hosi Premiadu Nobel ba Paz 1996, José Ramos Horta no iha atividade enseramentu nian sei hala’o hosi Ministru Asuntu Parlamentár no Komunikasuan Sosiál (MAPKOMS), Francisco Jerónimo. 

Ba loron daruak nian, Sesta (03/12/2021), aprezentasaun sumáriu sorvei kona-bá reportajen violência bazeia ba jéneru, iha ne’ebé Conselho de Imprensa serbisu hamutuk ho UNDP, hodi dezenvolve manual reportajen kona-ba violénsia bazeia ba jéneru;

Momentu ida-ne’e mós Conselho de Imprensa halo atribuisaun Karteira Profisionál ba Jornalista sira, ne’ebé aprovadu ona liuhosi ezame Karteira Profisionál.

Orsamentu DDF $26.780.00

Orsamentu ba realiza atividades DDF ho montante $26.780.00, ne’ebé finansia hosi kooperasaun UNESCO ho montante $11.500.00 no Conselho de Imprensa ho montante  $15.280.00, ezekusaun orsamentu banati ba prosedimentu legais ne’ebé aplikavel.

Programa ka atividade DDF superviziona no monitoriza hosi, Diretor responsável atividade, Fiscal Único Conselho de Imprensa, nune’e mos Oficial Planeamentu, Monitorizasaun no Avaliasaun Conselho de Imprensa, Supervizaun no Monitorizasaun ne’e hala’o iha prosesu preparasaun no implementasaun atividade, nune’e bele halo asaun korretiva karik implementador sira, hala’o atividade la’o se hosi planu ne’ebé planeadu ona.

Avaliasaun ba programa ka atividade ne’e sei hala’o, bainhira programa ka atividade ne’e finaliza ona.

Intensaun hosi avaliasaun ne’e hodi bele identifika, obstákulu, dezafiu no problema sira ne’ebé enfrenta durante iha prosesu preparasaun no implementasaun, nu’udar lisaun ba futuru, hodi deside programa ka atividade ne’e sei kontinua ka lae.

 DDF  Nia Natureza

Dili Dialogue Forum (DDF) nu’udar atividade anual ida hosi Conselho de Imprensa, atividade refere nu’udar rezultadu ida hosi Konferénsia Internasionál, PROMOTING PRESS FREEDOM AND FREEDOM OF EXPRESSION IN SOUTHEAST ASIA AND THE PACIFIC “The Role of Press Council Towards a Democratic Society” ne’ebé Conselho de Imprensa Timor-Leste hala’o hodi selebra Aniversáriu dahuluk Conselho de Imprensa iha tinan 2017, iha Dili, Timor-Leste.

Konferénsia Internasionál ne’e, deside hodi hamosu programa Semináriu Internasionál ida ho naran ‘’Dili Dialogue Forum’’, nune’e iha tinan 2018-2019, Conselho de Imprensa iha kompromisu boot tebes hodi realiza eventu refere, Dili Dialogue Forum iha tinan 2019, deside hodi harii fórum ida ho naran South Asian Press Council Network (SEAPC-NET), nu’udar rede komunikasaun entre Conselho Imprensa sira iha Azia.

Infelizmente iha tinan 2020, Conselho de Imprensa la konsege realiza atividade ida ne’e, tanba mundu tomak, inklui Timor-Leste, enfrenta hela luta foun Pandemia COVID-19 no iha Timor-Leste, Estadu deside hodi aplika Estadu Emerjénsia, Serka Sanitária no Konfinamentu Obrigatóriu nu’udar asaun ida ba kombate transmisaun COVID-19 iha Timor-Leste, hodi limita sidadaun sira nia direitu ba halo movimentu, nune’e mos limita entidade sira hodi organiza programa ka atividade ne’ebé ho eskala halibur ema barak.

Refleta ba situasaun sira ne’e hotu mas la hamate vontade Conselho de Imprensa nian, nune’e  iha tinan 2021 kontinua kontempla iha Planu Asaun Anual Conselho de Imprensa nian, hodi realiza programa ka atividade DDF, nu’udar espasu importante ida hodi diskute asuntu hirak ne’ebé promove kona-bá liberdade espresaun no liberdade imprensa no mós dezenvolvimentu mídia iha Timor-Leste.

Jornalista: Carmelita Isaac