Hatutan.com, (01 Dezembru 2021), Dili—Média online hamutuk lima, kompostu hosi Hatutan.com, The Oekusi Post, Mambae Multimedia, SMNEWS no VIPTV estabelese Aliansa Kombate Dezinformasaun (AKD), iha Timor-Leste (TL).

Reprezentante no Xefe Redasaun-sira hosi Órgaun Komunikasaun Sosiál Lima (5) ne’ebé deklara ofisialmente estabelese Aliansa Kombate Dezinformasaun (AKD), iha salaun enkontru Raya media & Entertainment, Avenida de Portugal, Númeru 74, Díli, Timor-Leste, Kuarta (01/12/21). Foto/Hatutan.com.

Estabelesimentu AKD ne’e ho baze ba luta foun órgaun komunikasaun sosiál, jornalista no sosiedade hotu nian iha nasionál, rejionál no globál kontra dezinformasaun no notísia falsa (Hoax).

Reprezentante no Xefe Redasaun sira hosi Órgaun Komunikasaun Sosiál Lima (5) ne’e deklara ofisialmente ezisténsia AKD ne’e iha salaun enkontru Raya media & Entertainment, Avenida de Portugal, Númeru 74, Díli, Timor-Leste.

Inisiativa harii AKD ne’e hodi responde ba preokupasaun no dezafiu foun iha sosiedade Timor-Leste kona-bá notísia falsa sira ne’ebé fó ameasa ba demokrasia no bele fó influénsia negativa ba estabilidade nasionál.

Advertisement

“Aliansa ida ne’e ami sei ba rejistu iha notariadu no mós iha Conselho de Imprensa. Tanba la’ós ita estabelese tiha depois ita husik hela hanesan ne’e de’it. Maibé ezersísiu boot ida maka aliansa ne’e sei adapta ba sítiu ida fact chek ne’e, nune’e kontrola no halo counter ba informasaun sira ne’ebé konsidera hoax, no bele hatutan tán hosi média online lima ne’e,” Portavós AKD, Francisco Belo Simões da Costa hosi Hatutan.com, deklara liu hosi konferénsia imprensa.

AKD mós sei halo kapasitasaun ba nia membru sira hosi média online lima ne’e, oinsá halo verifikasaun ba faktus sira, liuliu kona-bá notísia sira ne’ebé la loos, halo loos fali.

AKD ne’e mós sei koopera ho entidade relevante-sira atu oinsá buka kontra informasaun falsa sira ne’ebé espalla liu hosi Plataforma média sosiál.

Iha fatin hanesan, Evangelisto Gantry dos Santos Meilana hosi VIPTV hateten, prezensa AKD ne’e laiha intensaun ruma, maibé atu apoia no haforte liu tán entidade-sira ne’ebé inisia ona hodi luta kontra dezinformasaun, liuliu Governu rasik ne’ebé durante ne’e luta makás ba asuntu ne’e.

“Atu kombate hoax la’ós servisu Governu nian mesak, maibé presija mós elementu barak, iha nasaun ida ne’e inklui AKD. Tanba ne’e maka média lima ne’e iha lian ida de’it atu hamutuk kombate hoax,” nia hateten.

Advertisement

Gantry mós reforsa tán katak, prezensa AKD ne’e importante no relevante tebes tanba oras-ne’e daudaun eleisaun mós besik ona, konserteza sei mosu imformasaun oioin ne’ebé iha tendénsia ba hoax, no AKD iha papél importante atu kombate asuntu ne’e.

Nune’e mós Raimundos Oki hosi The Oé-Cusse Post (TOP), konsidera AKD ne’e importante tanba, agora ne’e sente ka la sente maibé ema barak iha sosiedade sai ona vítima ba notísia hoax, ne’ebé espalla iha Plataforma média sosiál.

Tanba ne’e maka, média lima ne’e tau hamutuk forsa la’ós atu halakon totál dezinformasaun, maibé pelu menus halo redusaun.

Mekanizmu redusaun ne’e maka, ho rekursu ne’ebé iha, bainhira detekta katak, informasaun balun falsa duni, nunue’e haloos tiha depois informa ba sosiedade liu hosi média online lima ne’ebé iha katak, ne’e la loos.

Raimundos Oki mós agradese ba Governu tanba durante ne’e hamosu ona programa ida kontra hoax no serbisu makaas tebes, nune’e AKD mai atu tulun mós Governu nia programa ida ne’e, hanesan kontribuisaun ida ba sosiedade ida ne’ebé saudável.

Advertisement

AKD ne’e aprova ho unanimidade hosi membru inisiadór na’in-neen (6) liuhosi akta enkontru iha Díli, iha loron 19 Fulan-Outubru 2021.

Inisiadór sira ne’e mak hanesan, Raimundos Oki hosi The Oé-Cusse Post (TOP), Mariano da Costa hosi SMNEWS, Francisco Belo Simões da Costa hosi Hatutan.com, Cipriano Colo hosi Hatutan.com, Domingos de Deus hosi Mambae Multimedia, no Evangelisto Gantry dos Santos Meilana hosi VIPTV.

Jornalista: Vito Salvadór

Advertisement