Hatutan.com (06 Dezembru), Dili—Prezidente Tribunál Rekursu (PTR) Deolindo dos Santos kontinua atualiza ba Prezidente Repúblika (PR), Francisco Guterres Lú Olo kona-bá, Tribunál sira sei falta infraestrutura no ekipamentu traballu.

Prezidente Tribunál Rekursu (PTR) Deolindo dos Santos hala’o audiénsia ho Prezidente Repúblika (PR), Francisco Guterres Lú Olo. Foto/Média PR.

Anualmente Governu no Parlamentu Nasionál aloka orsamentu ba Tribunál sira atu fó asisténsia di’akliu ba públiku.

Nesesidade balun iha Tribunál sira konsege resolve, maibé balun seidauk. Tanba ne’e, Prezidente Tribunál Rekursu hein katak Governu no Parlamentu Nasionál (PN) bele preve orsamentu ba falta infraestrutura no ekipamentu traballu nian iha Tribunál sira.

“Difikuldade ne’ebé Tribunál sei hasoru maka falta infraestrutura no ekipamentu traballu. Ita konsege rezolve balun ona ho OJE 2021. Balun ne’ebé seidauk konsege rezolve, ita ko’alia ona ho Governu nu’udár jestór ba Orsamentu Estadu nian no Parlamentu rasik atu bele preve orsamentu ne’ebé adekuadu atu rezolve problema hirak ne’e iha 2022,” Prezidente Tribunál Rekursu hateten, iha Palásiu Prezidensiál Nicolau Lobato, Díli, hafoin audiénsia ho Xefe Estadu, Segunda (06/12/2021).

Prezidente Tribunál Rekursu informa ba Prezidente Repúblika kona-bá planu kapasitasaun ba juis sira iha rai-li’ur ne’ebé la konsega hala’o iha tinan ne’e tanba pandemia Covid-19 no hein bele realiza iha tinan oin.

Tribunál Rekursu sempre prontu ba eleisaun Prezidente Repúblika no eleisaun lejislativa. Tribunál Rekursu hala’o serbisu bainhira Prezidente Repúblika dekreta ona data ba eleisaun.

Jornalista: Rogério Cárceres