Hatutan.com, (10 Dezembru 2021), Díli— Aitana FC provizoriamente okupa klasifikasaun daneen iha tabela klasifikasaun provizóriu Liga Futeból Timor-Leste (LFTL), hafoin iha jogu tolu tutuir-malu rekolla de’it pontu ida no lakon dala-tolu.

Treinadór Aitana FC, Octávio da Costa. Foto/Hatutan.com.

Atu sai hosi zona okos, Aitana FC iha ambisaun atu manán adversáriu As Ponta Leste FC iha jornada da-limak Liga Timorense.

Notísia iha Relasaun:Emanuel FC Kampiaun ba Segunda Divizaun LFTL Époka 2021

Treinadór Aitana FC, Octávio da Costa hateten, Aitana FC atu halo oinsa mós tenke manán iha jogu Sábadu (11/12/2021) kontra As Ponta Leste FC.

“Joga hasoru As Ponta Leste FC, nu’udár jogu finál ba ami. Tanba ne’e, ami tenke manán atu bele sai hosi zona mean,” Octávio da Costa  hateten ba jornalista sira iha sede LFTL, Bairro dos Grilhos Dili, Sesta (10/12/2021).

Treinadór ne’e fó ona ultimatu ba jogadór sira atu respeita oras deskansa, nune’e labele falla tán hanesan jogu hirak ne’ebé ekipa ne’e enfrenta antes ne’e.

Treinadór As Ponta Leste FC, Francisco Araújo. Foto/Hatutan.com.

Nune’e mós treinadór As Ponta Leste FC Francisco Araújo, hateten sei esforsu atu asegura pontu tolu iha jornada da-lima, tanba jogu hasoru Aitana FC la’ós jogu bai-bain tanba Aitana FC rasik konsidera ida-ne’e finál hodi sai hosi zona mean.

“Hanesan treinadór klube iha tarjetu ba ha’u atu mantein ekipa As Ponta Leste FC iha primeira divizaun no tarjetu seluk ne’ebé sai hanesan mehi maka lori As Ponta Leste FC ba kampiaun primeira divizaun,” Francisco Araújo promete ho fiar aan.

Treindór ne’e sei halo mudansa ba tátika iha jogu kontra adversáriu Aitana FC, tanba iha jogadór íntimu rua ne’ebé sofre akumulasaun karta kinur, nune’e obrigadu labele reforsa ekipa iha jogu aban.

Ekipa rua mai ho ambisaun hakarak asegura pozisaun iha tabela klasifikasaun LFTL époka ne’e. As Ponta Leste FC iha ambisaun atu rekolla vitória iha jornada da-limak hafoin iha jogu tolu antes  manan rua no impata ida no provizoriamente rekolla pontu hitu no provizoriamente tuur iha segunda klasifikasaun, enkuantu adversáriu Aitana FC okupa pozisaun neen ho pontus ida hosi jogu tolu.

Jornalista: Vito Salvadór