Hatutan.com, (11 Dezembru 2021), Díli– Tribunál Distritál Díli (TDD), sábadu horiseik, hala’o primeiru julgamentu ba krime esplorasaun ilísita jogu ne’ebé deskonfia involve arguidu Luís Clementino Xavier nu’udar diretór kompañia TIXAR Unipessoal Lda, tanba laiha lisensa ba atividade jogu durante tinan 2016 to’o 2020.

Alende ne’e, laiha autorizasaun husi Inspesaun Jerál Jogu, Ministériu Turizmu Komérsiu no Indústria (MTCIA) ba lokal jogu ne’ebé lokaliza iha Audian,  Díli, maske arguidu iha lisensa no dividas kompañia husi SERVE.

Iha audiénsia, arguidu rekoñese katak nia laiha lisensa ba atividade jogu husi Ministériu Turizmu, Komérsiu  no Indústria, mas tempu ne’ebá trata ona lisensa maibé to’o agora seidauk sai, maske nune’e, husi parte komérsiu haruka arguidu kada fulan ba selu lisensa kompañia iha BNU.

Advertisement

“Kada fulan ha’u sempre ba selu lisensa kompañia iha BNU ho montante $15 to’o $20 no dividas kada fulan tolu mate no ha’u sempre ba renova no ha’u iha dokumentu kompletu kona-bá resibu pagamentu iha BNU,” arguidu deklara.

Relasiona ho arguidu nia deklarasaun, Tribunál husu atu arguidu bele lori resibu husi pagamentu ne’ebé kada fulan nia selu iha BNU hahú husi 2016 to’o 2020.

Hafoin rona arguido, Tribunál adia hikas julgamentu ba tinan oin hodi kontinua rona sasin sira.

Tuir akuzasaun husi Ministériu Públiku (MP) katak iha fulan-Dezembru 2014, SERVE atribui sertifikadu rejistu komersiál  ba kompañia TIXAR Unipessoal, Lda ho númeru TIN 1215986 no iha loron 21 fulan-Jullu tinan 2020 Autoridade Tributária husi Ministériu Finansas atribui sertifikadu Dívidas ba kompañia.

Maske nune’e, sistema inspesaun do jogu MTCIA la autoriza arguidu atu loke jogu ilísitu ne’e iha Audian, tanba ne’e iha loron 17 fulan-Agusto 2020, tuku 17:00 lOtl,  Polísia Sientífika Investigasaun Kriminál (PClC) ba halo buska no apreensaun ba kompañia hodi prende ekipamentu ne’ebé arguidu uza ba jogu ne’e iha Audian.

Advertisement

PCIC halo apreensaun ba ekipamentu ka mákina mak hanesan mákina pocker marka lucky Six alligator, mákina Pocker marka Dinasti ofsix Lion, mákina Rolete marka PY-005H, mákina Pocker marka Yenox, mákina Pocker marka cor de café, makina impressora marka Epson LX-310, Conector marka EGS, kadeira , mákina jogu ba konservasaun no funsionamentu jogu inklui osan ho montante $183,00 ne’ebé arguidu hetan husi koin ne’ebé nia fa’an bainhira ema atu tama ba joga.

Ho hahalok arguidu nian, Ministériu Públiku akuza arguidu ba pratika krime esplorasaun ilísita ne’ebé previstu iha artigu 322 husi kódigu penal Timor-Leste.

Audiénsia julgamentu preside husi juiz singular José Gonçalves, MP reprezenta husi Prokuradór Adérito Tilman no arguidu hetan asisténsia husi Defensor Públiku José da Silva.

Jornalista: Carmelita Isaac

Advertisement