Hatutan.com, (14 Dezembru 2021), Dili—Komandu Polisia Nasionál Timor-Leste (PNTL), Unidade Especial da Policia (UEP), Explosive Ordenance Disposal (EOD), muda sees ona, hodi asegura bomba ne’ebé komunidade hetan iha Aldeia Kuluhun de Baixo, Suku Akadiruhun, Postu Administrativu Na’in-Feto, Munisípiu Díli.

Komandu Polísia Nasionál Timor-Leste (PNTL), Unidade Especial da Policia (UEP), Explosive Ordenance Disposal (EOD), muda sees ona, hodi asegura bomba ne’ebé komunidade hetan iha Aldeia Kuluhun de Baixo, Suku Akadiruhun, Postu Administrativu Na’in-Feto, Munisípiu Díli, Tersa (14/12/21). Foto/Hatutan.com.

Bomba antiga ne’e, Komandu PNTL, liuhosi ekipa EOD sei lori ba halo destruisaun iha Suku Tibar, Munisípiu Likisá.

Xefe Explosive Ordenance Disposal (EOD), Sargentu Xefe, Estaquio de Jesus Ximenes, haktuir hafoin simu informasaun hosi komunidade iha Kinta semana kotuk, oras dadeersan, ekipa EOD to’o kedan iha Aldeia Kuluhun de Baixo hodi observa objetu funu (bomba) ne’ebé iha.

Rezultadu observasaun EDO nian, nota katak, objetu  ne’e nu’udár bomba hosi aviaun nian mak ema tiru tun hosi lalehan, ho kuantidade boot, ne’ebé ho nia todan kuaze iha tonelada (poun) 20. Bomba ne’e, kategoria hanesan unexplosive ordinance, nune’e bandu atu ajuda hi’it ho liman.

“Ita labele identifika katak nia orijen hosi ne’ebé, nia perigu ne’e iha ne’ebé, maibé ita konsidera nia perigu la halimar tanba ninia pin ou safety ne’e ita labele identifika ona. Ida ne’e ita extra kuidadu atu bele asegura. Lae, ida ne’e iha komunidade nia leet lori perigu,” Sargentu Xefe, Estaquio de Jesus Ximenes, haktuir ba jornalista sira, iha aldeia Kuluhun de Baixo, Suku Akadiruhun, Tersa (14/12/2021).

Xefe Operasaun ba EOD ne’e, esplika, bomba ne’ebé komunidade hetan iha kategória tolu. Ida, bomba insendiáriu, ida bomba kímiku, no seluk maka uza explosivu.

“Maibe, ida ne’e ita labele identifika nia kímiku, insendiáriu, ou explisivu. Entaun, ida ne’e risku aas teb-tebes,” Xefe EOD ne’e esplika.

Objetu Bomba ne’ebé komunidade hetan iha Aldeia Kuluhun de Baixo, Suku Akadiruhun, Postu Administrativu Na’in-Feto, Munisípiu Díli, Tersa (14/12/21). Foto/Hatutan.com.

Problema boot ida ba ekipa EOD maka, seidauk iha ekipamentu kona-bá fó protesaun ninian, liu-liu ekipamentu espesial sira ne’ebé mak bele utiliza hodi bele halo destruisaun ba materiál funu.

“Maibé, tanba ida ne’e perigu ba komunidade, maski PNTL iha difikuldade ba ekipamentu, maibé ami ekipa tékniku buka meius atu rezolve ida ne’e nune’e labele fó impaktu ba komunidade ne’ebé hela besik iha área ne’e,” Komandante EOD ne’e, dehan.

Bainhira ekipa EOD sira to’o iha lokál, sira halo avaliasaun katak, bomba ne’e iha nia medida ne’ebé boot tebes no iha momentu ne’ebá, ekipa husu ba komunidade atu koolabora.

“Tanba ne’e, mak até ohin, ita nia komunidade asegura hela, ohin mak ita bele halo evakuasaun no atu ba halo destruisaun,” Estaquio haktuir.

Bomba sira ne’ebé ho tipu un-exploided, iha maneira rua ne’ebé ekipa EOD sei uza hodi halo destruisaun.

Ida maka, halo destruisaun ho maneira lokál, no ida seluk tenke halo evakuasaun. Maibé, bomba sira ne’ebé ho kuantidade boot, ekipa sira bele halo destruisaun ho lokál, bainhira ho ekipamentu kompletu.

“Ita halo destroi lokál, tanba ita labele evakua ba fatin dook, tanba ne’e risku ba ema nia vida, risku ba públiku, liu-liu iha fatin sira ne’ebé ita movimentu ba ne’e, risku ba fatin ne’ebé iha halo destruisaun, nomós ba ema sira ne’ebé maki ta involve. Aleinde ne’e, PNTL rasik laiha ekipamentus prórpriu atu asegura ami nia vida,” Estaquio dehan.

Ekipa ne’ebé ekipa EOD sei menus maka, uza ba halo protesaun, investigasaun, no destruisaun.

Tékniku atu halo destruisaun ba bomba ne’e, iha maneira rua. Ida mak “low order”, ninia risku destruisaun ki’ik-oan, la rahun totál, tanba bele destrui de’it explozivu iha laran. Maneira seluk maka “high order”, katak halo destruisaun ho totál, maibé nia impaktu no fragmentasaun ne’e sei dook.

Komandu Polísia Nasionál Timor-Leste (PNTL), Unidade Especial da Policia (UEP), Explosive Ordenance Disposal (EOD), muda sees ona, hodi asegura bomba ne’ebé komunidade hetan iha Aldeia Kuluhun de Baixo, Suku Akadiruhun, Postu Administrativu Na’in-Feto, Munisípiu Díli, Tersa (14/12/21). Foto/Hatutan.com.

Tuir ekipa tékniku sira halo avaliasaun katak, bomba ho modelu boot ne’e, normalmente ninia letál destruisaun ne’e dala-ruma to’o 20%, 330 grau selsius, iha áreas involvidas.

“Tanba ne’e, iha maneira harahun ne’e, ita sei uza high order atu destroi totál de’it. Tanba bomba ne’e nia todan kuaze 200 poun, ita nia distánsia minimu atu halo destruisaun ne’e pelu-menus kilométru ida resin,” Xefe Operasaun EOD ne’e dehan tán.

Tuir dadus, durante tinan 2021, ekipa EOD konsege destroi ona materiál funu sira ne’ebé hetan hosi komunidade, hamutuk atus 2 resin.

Xefe Suku Akadiruhun, Juvinal da Conceiçăo informa, bomba ne’e nia komunidade sira hetan, bainhira hala’o hela servisu Programa Nasional Dezenvolvimentu Suku (PNDS). Komunidade kee hela bee-dalan atu halo valeta, maibé la espera hetan fali bomba iha rai-okos.

Hafoin hetan objetu funu ne’e, ofisial PNDS komunika kedan ho nia, nune’e mós ba Ofisiál Polisia Suku (OPS), hodi direta ba komandu atu tun direta haree bomba ne’ebé nia komunidade sira hetan.

“Ha’u mós mai diretamente fatin ne’e, haree katak ne’e perigu teb-tebes ba ita nia vida. Ne’ebé durante semana ida, ha’u sente preukupa. Maibé ohin, ita nia polisia sira mai muda sai ona hosi fatin ne’e, para lori ba halo destruisaun,” Xefe Suku Akadiruhun, Juvinal da Conceiçăo, hateten ba jornalista sira.

Jornalista: Rogério Pereira Cárceres