Hatutan.com, (20 Dezembru 2021), Díli—Tribunál Distritál Díli (TDD) iha loron 20 fulan ne’e, kontinua hala’o julgamentu ba kazu eis-koordenadór merenda eskolár Postu Administrativu Ataúro arguidu Ibrahim Soares, ba krime abuzu konfiansa agravadu no administrasaun danoza relasiona ho konstrusaun armazén foos iha tinan 2018 no motorizada inklui mobiliáriu ne’ebé Ministériu Edukasaun (ME) oferese ba arguidu.

Iha audiénsia julgamentu ne’e, sasin Duarte Braganza ne’ebé iha tempu ne’ebá hanesan Diretór Nasionál Ministériu Edukasaun deklara laiha koñesimentu kona-bá pedidu no proposta arguidu nian relasiona ho konstrusaun armazén fos iha Ataúro.

Notísia iha Relasaun:Eis-Koordenadór Merenda Eskolár Sai Arguidu

“Momentu ne’ebá nia mai husu duni ha’u, maibé ha’u hateten o hanesan funsionáriu kazuál ne’ebé laiha kompeténsia atu halo proposta,” arguidu deklara iha sala audiénsia.

Tanba ne’e, sasin laiha koñesimentu to’o faze inaugurasaun ba armajén ne’e, tanba sasin rasik la autoriza arguidu atu halo pedidu.

Hafoin rona sasin, Tribunál adi’a hikas julgamentu ba loron seluk, hodi kontinua rona sasin sira seluk.

Antes ne’e, tuir akuzasaun hosi Ministériu Públiku (MP), katak iha tinan 2014 to’o 2018, arguidu selebra kontratu ho Ministériu Edukasaun (ME) númeru Ref. 248/DNRI—IfNWI/2016 ba pozisaun Koordenadór Merenda Eskolár iha Postu Administrativu Ataúro ho saláriu mensál $221.00, tanba ne’e ME fornese fasilidade ba apoiu serbisu hanesan motór ho marka Honda Mega Pro, matrikula 1012 GA, termu entrega kupon mina, komputadór Desktop I, UPS I, printer HP I, tinta printer unidade 4, surat tahan rim 2 kada periodu trimestrál, armáriu vidru ba arkivu I, armáriu ki’ik ho gaveta l, meza servisu I, kadeira servisu l.

lha fulan-Dezembru 2018, ME hapara kontratu serbisu ba funsionáriu kontratadu hamutuk 273, inklui arguidu liu hosi Ministeriál Nú 14/GMEJD[XlV2018.

Maske nune’e, hahú husi fulan-Dezembru 2018 to’o fulan-Juñu 2020, arguidu Ia entrega fila fasilidade hirak-ne’e ba ME, maibé arguidu rai nafatin sasán hirak ne’e iha ninia uma.

Alende ne’e, arguidu utiliza komputadór, printer no tinta printer, meza no kadeira serbisu nian hodi imprime matéria ba ninia privadu no família nia interese.

Iha tinan 2018, arguidu hanesan funsionáriu kontratadu ba Ajente Administrasaun Públika, halo proposta konstrusaun armazén merenda eskolár iha Postu Administrativu Ataúro utiliza ME ba iha Rotary Club of Moruya (IRCM) iha Austrália ho apoiu osan dolar Austrália $14.250.00, ekivalente ho dolar amérikanu $10. 241,50.

Rezultadu hosi proposta ne’e, arguidu mak jere rasik hodi harii konstrusaun armazén ho medida naruk metru 12, Iu’an metro 6 no as metru 3 iha arguidu nia pai rasik nia kintál-laran, ho totál osan ne’ebé fundasaun IRCM transfere mai iha testemuña BH nia konta bankária iha ANZ Díli no entrega ba arguidu ho montante $14.250.00, ekivalente ho dolar amérikanu $10.241,50.

Arguidu aproveita oportunidade no konfiansa ne’ebé IRCM fó, tanba funsaun ne’ebé nia okupa iha momentu faktu ne’e akontese no arguidu hatene katak, apoiu osan ho montante $10.241,50 ne’e la’ós pertense ba nia, maibé arguidu jere no utiliza osan ne’e tuir ninia interese hodi fó benefísiu ba nia aan.

Arguidu hatene katak, fasilidade ne’ebé ME entrega ba arguidu liu hosi Diresaun Nasionál Lojístika, tanba funsaun ne’ebé arguidu okupa iha altura ne’ebá nu’udár koordenadór Merenda Eskolár iha Postu Administrativu Ataúro.

Fasilidade hirak ne’e, hetan ona apreensaun hosi Komisaun Anti-Korrupsaun (CAC, sigla portugés), hafoin hetan delegasaun kompeténsia hosi Ministériu Públiku hodi halo investigasaun ba arguidu no ekipamentu hirak ne’e agora CAC entrega ona ba MP.

Ho hahalok arguidu nian, MP akuza arguidu ba pratika krime rua mak hanesan abuzu konfiansa agravadu, administrasaun danoza ne’ebé previstu iha artigu 257, 274 hosi kódigu penál TL.

Audiénsia julgamentu ne’e prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór Rogério Viegas no arguidu hetan asisténsia legál hosi advogadu privadu.

Jornalista: Carmelita Isaac