Hatutan.com, (23 Dezembru 2021), Díli—Atleta natasaun Timor Leste (TL), Imelda Felicyta Ximenes Belo, hamorin tán Timor-Leste nia naran iha mundu liu hosi kompetisaun Federation  Internationale de Natation (FINA) World championship  iha Abu Dhabi.

Atleta natasaun Timor Leste (TL), Imelda Felicyta Ximenes Belo, iha hela kompetisaun. Foto/FNTL.

Atleta Imelda Felicyta Ximenes Belo no Jolanio arranka hosi TL ba Abu Dhabi hodi partisipa kompetisaun FINA Championship iha loron 12 Dezembru 2021, hosi aeroportu Internasional Nicolau Lobato ho aviaun Air Asia.

Iha Abu Dhabi, Imeld Belo kompete iha klase women freestyle, metru 50 no jogu ne’e rasik hala’o iha pisina Curta Abu Dhabi.

Prezidente Federasaun Natasaun TL, Laurentino Guterres, hateten maski la ultrapasa valór ba semi-finál, maibé atleta timoroan ne’e,  tama terseiru lugar iha nia “heat nú. 3 ho Personál Best 32.84” hafoin halakon nasaun neen hanesan Ethiopia, Gabon, Djibouti, Guinea, Tajikistan no Republika Congo.

“Ne’e hatudu atleta Timoroan reprezenta ona rai doben ho dignidade iha mundu Internasionál,” Hatutan.com sita hosi Laurentino Guteres nia pájina facebook, Kinta (23/12/2021).

Atleta natasaun Timor Leste (TL), Imelda Felicyta Ximenes Belo. Foto/FNTL.

Imelda Belo la manan medalla iha eventu ne’e, maibé nia manan ema nia fuan-laran, tanba liu hosi aprezentasaun ne’ebé hatudu durante kompetisaun dada tebes públiku no ema hotu nia atensaun hodi buka-tuir  kona-bá Timor-Leste ho nia rekursu sira iha modalidade oin-oin liuliu iha desportu.

Parte Federasaun Natasaun Timor Leste (FNTL) mós konsidera katak, bainhira desportu TL atu la’o di’ak no lori resultadu pozitivu persiza investimentu iha infraestrutura, rekursu umanu no finanseiru.

Alende ne’e, vídeo badak ne’ebé lansa iha Pájina ofisiál Federasaun Natasaun TL, Imelda Belo hato’o nia agradesimentu ba Governu Timor-Leste, Komité Olímpiku Nasionál no Federasaun, inklui ema hotu ne’ebé sempre akompaña nia ho orasaun durante partisipa iha kompetisaun Abu Dhabi Swimming.

“Ha’u agradese ba hotu-hotu, ba domin no orasaun tomak ikus mai ha’u tuir kompetisaun ne’e to faze ikus liu ho di’ak,” Imelda agradese.

Mensajen prinsipál hosi atleta ne’e katak, desportu la’ós de’it partisipa jogus, manan medlla, maibé deportu bele promove mós área sira seluk hanesan ekonomia, turizmu, kultura no identidade Timor-Leste.

Liu tán ida ne’e, desportu mós bele promove pás no estabilidade rai ida nian, bele sai diplomasia entre rai bo’ot no rai kik oan sira.

Jornalista: Vito Salvadór